Hatutan.com, (24 Fevereiru 2022), Díli—Tribunál Distritál Díli (TDD) liu hosi alegasaun hosi Ministériu Públiku (MP) ne’ebé reprezenta hosi Prokuradór António Tavares, husu ba Tribunál atu aplika pena mínimu tinan hitu ba arguidu na’in-haat Germanino Correia, Elias dos Santos, Felis dos Santos no Leandro Expedito Gonçalves ba krime rua, danu ho violénsia no arma branka tanba utiliza katana maubeka hodi baku no sunu ona lezadu Anselmo Soares no Gaspar Gama nia motór. 

Razaun MP husu pena ne’e, tanba faktus provadu bazeia ba arguidu, lezadu no sasin nia deklarasaun katak arguidu na’in-haat mak utiliza katana maubeka, ai-dona hodi ba asalta lezadu na’in-rua hodi baku no sunu lezadu nia motór.

Defensór Públiku Agostinha da Costa husu ba Tribunál atu tetu didi’ak hodi deside pena ne’ebé adekuadu ba arguidu na’in-haat, tanba iha arguidu nia deklarasaun katak la’ós arguidu sira mak ba sunu no foti lezadu nia motór maske arguidu rekoñese katak lori duni sasan kro’at hodi baku lezadu sira.

Hafoin alegasaun juiz prezide marka hikas audiénsia ba loron seluk hodi rona leitura sentensa.

Antes ne’e, tuir akuzasaun hosi MP, katak iha loron 10 fulan Dezembru tinan 2016 iha suku Leorema, Munisipiu Liquiça, arguidu Elias dos Santos hakbesik aan ba lezadu Anselmo Soares Alves hodi husu “O mak dehan ami asu badiu ka no lezadu hatan, ha’u la dehan, se mak ko’alia liafuan ne’e. Derepente arguidu Elias ho nia kolega halo agresaun fízika ba lezadu hodi dudu lezadu ba rai-naruk.

Liu loron ida, arguidu Felis dos Santos hamutuk ho grupu bo’ot ida kaer katana maubeka, besi-kanu, ai-dona no fatuk hodi ba asalta lezadu Anselmo Soares Alves iha nia uma, maibé la hetan lezadu.

Tanba ne’e, arguidu Germanino Correia, dudu sai lezadu Anselmo nia motór ho marka Honda Beat, matrikula J. 70 15 Tls, hodi sunu no dudu lakon mós motór marka Yamaha Vixion, Motór Honda Beat ho folin $1.300.

Bainhira arguidu na’in-haat halo asaun ne’e lezadu Gaspar Gama interven hodi hakalma maibé arguidu hakilar “buka Dili oan sira oho tiha hotu” no arguidu sira uza ai-dona baku lezadu Gaspar Gama no arguidu Germanino Correia uza kanuru suru rai ta’a lezadu nia ulun.

Ho hahalok arguidu na’in-haat nian ne’e, MP akuza arguidu sira ba prátika krime Danu ho violência ne’ebé previstu iha artigu 260 hosi kódigu penál TL no armas branka.

Audiénsia julgamentu ne’e prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór António Tavares no arguidu sira hetan asisténsia legál hosi Defensór Públiku.

Jornalista: Carmelita Isaac