Hatutan.com (03 Marsu 2022), Díli—Tribunál Distritál Díli (TDD), liu hosi primeiru interrogatóriu ne’ebé hala’o iha loron 03 fulan ne’e, liu hosi juiz singulár Afonso Carmona deside aplika medida koasaun prizaun preventiva ba arguidu ho inisiál ASF tanba na’ok ka foti ona lezada OCS nia motór iha área eskola 30 de Agosto Comoro.

Aplikasaun medida koasaun preventiva ne’e ba krime furtu agravadu ne’ebé previstu iha artigu 252 hosi kódigu penál Timor-Leste.

Alende ne’e, Tribunál konsidera iha indisius forte ba krime refere, bazeia ba arguidu nia deklarasaun durante primeiru interrogatóriu.

Hafoin desizaun, guarda prizionál sira lori arguidu ba iha prizaun Becora hodi kumpri prizaun preventiva.

Tuir kronolojia katak, arguidu foti lezadu nia motór iha área 30 de Agusto Comoro, sem koñesimentu hosi lezadu no ikus mai detekta katak, lezadu nia motór iha hela arguidu nia liman, maibé arguidu maka ba aprezenta an iha polísia.

Tanba ne’e, polísia detein arguidu durante oras 72 hafoin submete ba primeiru interrogatóriu.

Audiénsia julgamentu ne’e prezide hosi juiz Afonso Carmona, MP reprezenta hosi prokuradór Napoleão Soares no arguidu hetan asisténsia legál hosi Defensór Públiku João de Carvalho.

Jornalista: Carmelita Isaac