Hatutan.com, (09 Marsu 2022), Dili-Ministru Obras Públika (MOP), Salvadór Soares dos Reis Pires, Ministru Justisa (MJ), Manuel Cárceres da Costa, nonook de’it hodi la fó komentáriu ruma kona-bá sira-nia naran tama iha lista remodelasaun.  

Estrutura VIII Governu Konstitusionál. Foto/Espesiál

Ministru Koordenadár asuntu Ekonómiku, Joaquim Amaral rasik hateten, nia hanesan membru Governu ida ne’ebé hetan nomeasaun polítika submete ba desizaun superiór sira-nian.

Hosi sorin seluk, Sekrétariu Estadu ba asuntu Kombatente no Libertasaun Nasionál, Gil da Costa Monteiro “Oan Soru”, deklara prontu atu sai husi Governu ne’ebé lidera hosi Primeiru-Ministru Taur Matan Ruak.

Liuhusi kampaña kandidatu Prezidente Repúblika 2022-2027, José Manuel Ramos Horta iha Munisípiu Ainaro, Kuarta (09/03/2022), veteranu Gil “Oan Soru” nudár portavóz kampaña Kandidatu José Ramos Horta nian ne’e deklara katak, bainhira dei’t nia prontu atu Primeiru-Ministru (PM) Taur Matan Ruak, hasai nia husi Governu.

Advertisement

“Hanesan membru Governu ha’u moe ba inan-aman sira, tanba tinan-lima (5) ami ukun iha Governu ne’e la halo buat ida ba povu ida-ne’e. Ha’u ko’alia hanesan ne’e, atu hasai ha’u aban mós ha’u  prontu,” Gil da Costa Monteiro “Oan Soru” afirma tán.

Nia tenik, Estrada sira ohin loron di’ak husi Dili ba Ermera, husi Dili mai Ainaro, husi Dili ba Bobonaro no husi Dili ba Baucau, obra Governu Xanana nian.

“Tinan-lima ne’e, ami membru Governu ida-ne’e la halo buat ida ba povu no ba ha’u nia inan-aman sira. Ha’u moe. Ha’u prontu atu hasai aban no hasai bainhira de’it,” Gil “Oan Soru” afirma hikas.      

Responde ba Hatutan.com iha Palacio do Governo hafoin partisipa iha reuniaun Konsellu Ministru sira-nian, Ministru Salvadór Soares dos Reis Pires, liatun de’it dehan, asuntu kona-bá remodelasaun kompeténsia tomak iha PM Taur Matan Ruak nia desizaun.

“Ha’u laiha komentáriu. Obrigadu! Ne’e, exelénsia señor Primeiru-Ministru, Taur Matan Ruak nia kompeténsia. Ha’u laiha komentáriu,” Ministru Salvador Pires hatán.

Advertisement

Ministru Justisa (MJ), Manuel Cárceres da Costa, ne’ebé Hatutan.com hasoru iha Palacio do Governo, rezeita fó nia komentáriu no nonook de’it kona-bá nia naran tama mós iha lista remodelasaun.

Iha mós fatin hanesan, Minisru Joaquim Amaral, hateten, nia nudár membru Governu ne’ebé nomeasaun politíka bainhira sai prontu ba situasaun sira-ne’e.

“Ha’u la komenta kona-bá ha’u nia naran tama iha lista remodelasaun, tanba ha’u hanoin ne’e situasaun normál. Hanesan membru Governu no nomeasaun politíka no konfiansa polítika, ha’u hanoin  kompeténsia tomak iha Xefe Governu,” Ministru Joaquim Amaral hateten.

Dokumentu ne’ebé Hatutan.com asesu kona-bá lista naran membru Governu ne’ebé tama iha  remodelasaun maka hanesan, Sekretária Estadu ba Igualdade no Inkluzaun (SEII), Maria José da Fonseca Monteiro de Jesus, Sekretáriu Estadu ba Asuntus Kombatentes Libertasaun Nasionál (SEAKLN), Gil da Costa Monteiro “Oan Soru”,  Vise-Ministra Solidariedade Sosiál no Inkluzaun (VMSSI) Signi Chandrawati Verdial, Vise-Ministru Saúde (VMS), Bonifácio Mau Coli dos Reis, Vise-Ministra Finansas (VF), Sara Lobo Brites, Ministru Obras Públikas (MOP), Salvadór Soares dos Reis Pires, Ministru Justisa (MJ), Manuel Cárceres da Costa, Ministru Finansas (MF), Rui Augusto Gomes, ho Ministru Koordenadór Asuntu Ekonómiku (MKAE), Joaquim Amaral.

Jornalista: Rogério  Cárceres

Advertisement