Hatutan.com, (08 Marsu 2022), Díli—Primeiru Ministru (PM), Taur Matan Ruak hato’o mensajen rekoñesimentu ba feto Timoroan sira, tanba iha tersa 08 Marsu, mundu tomak selebra Loron Internasionál Feto.

Primeiru Ministru Taur Matan Ruak. Foto/Média GPM.

Selebrasaun ba tinan ida ne’e, konsagra ona ho tema “Igualdade jéneru loron-ohin ba loron-aban ida ne’ebé sustentável,” iha ne’ebé rekoñese papél importante Feto nian hodi hasoru dezafiu boot sira iha prosesu dezenvolvimentu nasionál nian.

PM Taur konsidera dezafiu sira hanesan mudansa klimátika ne’ebé sai gráve bele hamosu dezastre naturál no kalamidade iha país  ne’e.

Dezafiu sira mundu nian ida ne’ebé interligadu no interdependente liután, sujeitu ba krize hanesan Pandemia COVID-19 nian, ne’ebé prevensaun, mitigasaun no ninia kombate, depende liu ba kooperasaun individuál no koletiva no implementa ona iha país no nível internasionál.

Advertisement

“Dezafiu sira ba moris-di’ak, ekonómiku no sosiál iha kapasidade atu kria oportunidade foun sira ne’ebé disponível ba ema hotu-hotu iha prosesu konstrusaun ba futuru ida ne’ebé teknolojikamente modernu no sustentável liu,” Hatutan.com sita mensajen Primeiru Ministru, Taur Matan Ruak nian, ba komemorasaun loron Feto Internasionál ho “Igualdade jéneru loron-ohin ba loron-aban ida ne’ebé sustentável”, Tersa (08/03/2022).  

Dezafiu sira ne’ebé sai hanesan obstákulu loloos hodi fó risku ba implementasaun di’ak hosi polítika sira ne’ebé sensível ba kestaun jéneru no mitigasaun vulnerabilidade nian, hanesan halakon ki’ak, kombate subnutrisaun no asesu ba serbisu báziku importante sira hanesan saúde, edukasaun, hela-fatin ka seguransa sosiál, no selu-seluk tan.

Iha dezafiu sira ne’e hotu, konta ho Feto sira hanesan ajente transformasaun no mudansa iha família, eskola, iha servisu-fatin, empreza no komunidade.

Feto hotu-hotu, liuliu feto sira hanesan dirijente ho reprezentatividade iha lideransa, aleinde kontribui ho kapasidade no koñesimentu sientífiku, étiku no morál sira ne’ebé aumenta beibeik ba Igualdade Jéneru nian, sai mós nu’udár protagonista no na’in ba polítika públika kona-bá lejitimidade demokrátika, governasaun di’ak no dezenvolvimentu ne’ebé sustentável liu.

“Ba Feto nasionál no estranjeira hotu ne’ebé ohin selebra loron internasionál feto nian, loron festivu ba Empoderamentu Femininu, ha’u hato’o ha’u-nia parabéns no votu saúde di’ak no susesu iha família, akadémiku, profisionál no sosiál. Na’i Maromak haraik bensaun ba imi ho Ksolok liután,” Xefe Governu parabeniza.

Advertisement

Jornalista: Rogério Pereira Cárceres