Hatutan.com (9 Marsu 2022), Dili—Tribunál Distritál Díli (TDD), liu hosi alegasaun Ministériu Públiku (MP) Prokuradór Napoleão da Silva, husu ba Tribunál atu aplika pena efetivu tinan rua fulan neen ba Mambru Polísia Nasionál Timor-Leste (PNTL) hosi Unidade Batallaun Orden Públika (BOP) arguidu Joanico da Silva de Fátima Guterres.

Alegasaun pena efetivu tinan rua fulan ne’e ba krime maus tratus no violénsia doméstika, tanba baku no rega gas lakrimojéneo ba nia kaben lezada Bendita Amaral.

Razaun MP husu pena efetivu ne’e tanba konsidera faktus provadu maski arguidu nega katak nia la halo agresaun fizika beibeik no rega gas lakrimojéneo ba lezada, maibé lezada konfirma katak akuzasaun loos no arguidu baku lezada beibeik ona.

Parte defeza José da Silva husu ba Tribunál atu absolve nia kliente hosi krime ne’ebé imputa ba nia, tanba bazeia ba arguidu nia deklarasaun katak nia la halo agresaun fíziku hasoru lezada hanesan nia kaben.

Hafoin alegasaun juiz prezide marka hikas audiénsia ba loron seluk hodi rona leitura sentensa.

Antes ne’e, tuir akuzasaun hosi MP katak iha loron 04 fulan Jullu tinan 2017 iha sira nia hela fatin Tasi-Tolu arguidu kaer lezada nia telemóvel no loke facebook (FB) no lezada mós husu hakarak haree, maibé arguidu la hatan hodi tebe dala rua iha lezada nia kabun.

Iha fali loron 06 fulan Jullu tinan 2017, lezada sona hela hudi iha dapur laran, la kleur arguidu tama tuir tebe dala rua iha lezada nia knosen loos no arguidu kontinua halo agresaun fiziku hasoru lezada beibeik ona .

Ikus liu maka, bainhira arguidu atu ba servisu fatin lezada tenta hako’ak arguidu maibé arguidu hasai gas lakrimojéneo (gas air mata) hodi rega ba lezada nia oin.

Tanba ne’e, MP akuza arguidu ba prátika krime violénsia doméstika tuir artigu 2, 3, 35 hosi Lei númeru 7/2010, krime maus tratus no kónjuje ne’ebé previstu iha artigu 154 hosi kódigu penál TL.

Audiénsia julgamentu iha Kuarta loron 09 fulan ne’e, prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór Napoleão da Silva no arguidu hetan asisténsia legál hosi Defensór Públiku (DP) José da Silva.

Jornalista: Carmelita Isaac