Hatutan.com, (14 Marsu 2022), Díli- Ekipa susesu kandidatu Prezidente Repúblika (PR), Francisco Guterres “Lú Olo”, rekoñese insidente iha fatin kampaña área Darasula, Suku Gariuai, Postu Administrativu Baucau Vila, Munisípiu Baucau, Sábadu (12/03/2022), envolve militante sira FRETILIN rasik no vítima João Ximenes ne’ebé lakon vida iha insidente ne’e mós militante FRETILIN Baucau nian.

Notísia iha Relasaun: PNTL Konfirma Apoiante Lú Olo Mate iha Ámbitu Kampaña

Fernando Gusmão, reprezentante legál ekipa susesu kandidatu PR 2022-2027, Francisco Guterres “Lú Olo”. Foto/Hatutan.com

Reprezenta Legál Ekipa Susesu Kandidatu PR Lú Olo, Fernando Gusmão, lori kandidatu PR Lú Olo nia naran hato’o sentidu kondolénsia ba família  liliu tanba vítima mós nudár militante partidu FRETELIN no ida-ne’e signifika kandidatu Lú Olo lakon votu ida.

“Ami hato’o ami nia sentidu kondolensia ba familia ne’ebé lakon sira-nia membru família ida iha okaziaun kampaña kandidatu PR Lú Olo nian iha Baucau,”  Fernando Gusmão hateten hodi responde Hatutan.com iha sede nasionál kandidatu PR 2022-2027, Francisco Guterres “Lú Olo” iha Dili, Segunda (14/03/2022).

Parte legál ne’e rekoña problema ne’ebé akontese iha Baucau entre militante FRETELIN ne’ebé apoiu kandidatu  PR Lú Olo ho númeru sorteiu 6  no la’ós ho militante husi partidu seluk.

Fernando Gusmão hateten, prosesu investigasaun iha autoridade siguransa nia kompeténsia, nune’e rezultadu investigasaun de’it mak bele fó lolos movitu akontesimentu.

Notísia iha Relasaun: Mate iha Kampaña Lú Olo, PNTL Detein Ona Suspeitu Na’in-tolu

“Kona-bá sé-sé mak involve, mai husi organizasaun arte marsiál ka lae, sira iha problema antigu ka lae, ne’e ita-nia autoridade siguransa mak sei fó sai liu husi prosesu investigasaun ne’ebé sira halo dadauk,” Fernando Gusmão hateten.

Ekipa susesu iha ona responsabilidade morál liu husi estrutura partidu no ekipa susesu kandidatu PR Lú Olo iha baze kontinua tau matan ba vítima iha prosesu tomak tuir kondisaun no forsa ne’ebé ekipa susesu iha. 

Sei Servisu Hamutuk Autoridade Seguransa Hodi Asegura Kampaña Ikus iha Dili ho Pás

Tuir kalendariu husi Comição Nasional das Eleições (CNE), Kandidatu PR Lú Olo ho partidu  FRETELIN sei ensera kampaña publiku eleisaun prezidensial iha Tasi Tolu, Dili, Kuarta  (16/03/2022).

Iha loron ikus kampaña kandidatu PR Lú Olo, ekipa susesu sei mobiliza militante no apoiante ho kuantidade ema barak, nune’e oras ne’e, ekipa susesu koordena ona ho parte siguransa atu oinsá bele tulun fo siguransa no orienta militante no apoiante sira atu nafatin iha orden publiku hodi asegura estabilidade no pás.

“Kona-bá siguransa, ita hatene katak ne’e knar PNTL nian, maibé ekipa susesu koordena ona ho koordenador hotu iha munisípiu Díli atu kontribui hodi organiza militante no apoiante sira atu mantein disiplina no tuir orientasaun ne’ebé parte siguransa no ekipa susesu orienta,” Fernando Gusmão haktuir.

Notísia iha Relasaun: Na’in-ida Mate iha Ámbitu Kampaña Lú Olo iha Baucau

Jornalista: Vito Salvador