Hatutan.com, (21 Maiu 2023), Díli-Prezidente partidu CNRT, Kay Rala Xanana Gusmão ho prezidente partidu FRETILIN, Francisco Guterres “Lú Olo” ezerse ona sira-nia direitu votu iha ida-idak nia sentru votasaun ne’ebé besik sira-nia hela-fatin ka sira-nia suku.

Lee Mós : Xefe Estadu Husu Sidadaun Hotu-Hotu Ba Vota

Xanana Gusmão ne’ebé akompaña hosi nia oan-mane Kay Olo Gusmão ezerse direitu votu iha eleisaun parlamentár, 21 fulan-Maiu 2023, iha Sentru Votasaun Suku Balibar.

Lú Olo ne’ebé akompaña hosi nia espoza Cidália Mouzinho Nobre Guterres ezerse sira-nia direitu síviku ka direitu vota iha sentru votasaun EBC Faról, Díli. 

Prezidente FRETILIN, Francisco Guterres “Lú Olo” ho prezidente partidu CNRT, Kay Rala Xanana Gusmão, ezerse ona sira-nia direitu votu iha idaidak nia sentru votasaun, 21 fulan-Maiu 2023. Foto/Repro Espesiál

Prezidente partidu CNRT, Kay Rala Xanana Gusmão, hateten depois fulan ida la’o haree katak povu kolen tiha ona no povu kompriende saida mak CNRT halo iha tinan-10 kaer governasaun no paradu dadaun iha tinan sira ikus ne’e.

“Saida mak há’u hein mak CNRT manan, no klaru katak hotu-hotu husu bá ha’u tenke bá Primeiu-Ministru, ha’u simu nu’udár responsabilidade bá rai no povu ida-ne’e,” Xanana hateten.

Prezidente Partidu Frente Revolucionário Timor-Leste Independente (FRETILIN), Francisco Guterres Lú Olo, hateten desde prinsípiu FRETILIN garante  manan iha munisípiu hotu iha territóriu nasionál tamba iha mudansa barak ne’ebé akontese durante ukun.

Hafoin vota, Lú Olo deklara nia kontente tamba iha sentimentu para atu manan no sentimentu para hametin Estadu Timor-Leste nian hodi harii nasaun, sentimentu para atu hametin pás no estabilidade hodi kontribui bá dezenvolvimentu iha país ida-ne’e.

Lú Olo hatutan, programa partidu FRETILIN nian ko’alia ona iha kampaña no hakarak atu lori FRETILIN ba vitória para garante buat ne’ebé promete bá povu.

Lú Olo hateten FRETILIN iha nia aliadu (PLP ho KHUNTO) ne’ebé hamutuk iha plataforma entendimentu tamba ne’e FRETILIN sei bá ukun hamutuk ho sira, maibé ba governasaun inkluziva depois de eleisaun mak sei deside.

Xanana ho Lú Olo husu bá povu tomak atu nafatin ezerse direitu demokratiku, tamba ida ne’e mak reflete Estadu Direitu Demokratiku.

“Ha’u husu pás, estabilidade no dook hosi violénsia bá militante no simpatizante partidu CNRT tomak, tamba ha’u hatene CNRT sei manan no labele halo provokasaun oin-oin, festa demokrasia atu ema hotu-hotu kontente,” Xanana hateten.

Lú Olo mós husu bá eleitór sira  hotu atu kontīnua ba vota hodi ezerse direitu síviku hanesan sidadaun hodi ajuda Timor-Leste la’o bá oin ho sira-nia kontribuisaun direita iha eleisaun.

Rezultadu survey hosi institutu Matadalan Survey & Peskiza ka Matadalan Survey & Research Institute (M-SRI) ne’ebé fó sai tiha ona iha loron 4 fulan-Abríl 2023, hatudu, katak maioria ka 49.00% respondente vota ka hili partidu CNRT no 60,25% respondente hakarak Xanana Gusmão mak Primeiru-Ministru períodu 2023-2028.

Survey dahuluk M-SRI nian ho tema “Survey Pre-Eleitorál Elektabilidade Partidu Polítika Ne’ebé Sei Kontesta iha Eleisaun Parlamentár 2023” ho nia baze tuir dadus eleisaun prezidensiál 2022 ho total eleitór 859.613 iha Munisípiu 13, Sentru votasaun 1.200, Estasaun votasaun 1.500, la inklui eleitór sira iha diaspora 852.500.  

Iha survey ne’e M-SRI ninia ekipa survey sira koloka pergunta bá respondente sira; Karik eleisaun halo agora, ita sei vota ba partidu saida?

Baze bá pergunta ne’e respondente sira 400 iha Munisípiu 13 ho persentajen 49.00% vota bá CNRT, 25% respondente vota bá FRETILIN, 5.25% vota bá KHUNTO, 5.50% vota bá PD, 3.50% vota bá PLP, 0.25% vota bá PUDD, 1.00% vota bá PVT (Partidu Os Verdes Timor), 0.25% vota bá APMT, 0.25% la deside, 2.50% la hateten sai, no 7.50 mak la responde.

Hosi respondente 49.00% fó razaun hili partidu CNRT  ho nia kompozisaun mak 20.25% hili CNRT tanba vizaun, misaun no programa partidu klaru, 17,50% nu’udár militante, membru no simpatizante, 14.00% koñese figura ne’ebé influensia hosi partidu, 10,50% resposta seluk, 8.50% gosta ideolojia partidu, 6.25% hatene partidu nia istória, 6.25% partidu iha esperiénsia Governa, 5.75 família nia partidu favoritu, 5.50% iha relasaun família ho prezidente no kuadru partidu, 5,25% la hatene.

Hosi sorin seluk, rezultadu suvey hosi Alumni Parlamentu Foinsa’e Timor-Leste (APFTL) ne’ebé publika iha loron 18 fulan-Abríl 2023, hatudu katak joven sira-nia preferénsia hili partidu CNRT ho persentajen 39,9, hili partidu FRETILIN (28,5%), hili  Partidu Demokrátiku (18,3%), hili partidu KHUNTO (5,7%) no respondente 7,6% hili seluk.  

Survey Alumni Parlamentu Foninsae Timor-Leste ne’e hahú hala’o hosi fulan-Fevereiru to’o fulan-Abríl 2023 ne’ebé envolve respondente juventude na’in-350 hosi munisípiu 11.

Survey APFL nian ne’e hatudu mós katak razaun joven sira deside hili partidu polítiku ho porsentajen 37,89 tanba figura, 37,58% deside hili partidu politiku tanba vizaun, 13,68% tanba istoria no seluk 10,88%.

 Jornalista : Vito Salvadór