Hatutan.com, (21 Marsu 2022), Dili- Prezidente Komisaun Nasionál Eleisaun (CNE, sigla portugés) sei halo hikas verifikasaun ba akta rezultadu husi munisípiu sira, liuliu  akta orijinál husi sentru votasaun sira molok halo apuramentu nasionál ba rezultadu ikus husi eleisaun ne’ebé hala’o iha loron 19 fulan-Marsu ne’e.

Notísia iha Relasaun: MOE-UE Konsidera Eleisaun Prezidensiál iha TL Organizadu no Kompetitivu

Prezidente CNE, José António Belo. Foto/Hatutan.com

Prezidente CNE, José António Belo, liu husi konferénsia imprensa ne’ebé hala’o iha salaun konferénsia CNE, Caicoli, Dili, Segunda (21/03/2022), hateten komisáriu sira CNE nian sei halo plenária atu halo deliberasaun hodi halo re-verifikasaun ba akta sira husi munisípiu no CNE mós sei halo verifikasaun ba votu nulu sira ne’ebé iha tamba provizoriamente votu nulu atinje ona 10,000-liu no lei mós fó kompeténsia atu CNE halo hikas verifikasaun ba votu nulu no reklamadu ne’ebé iha ho prazu oras 72 atu iha desizaun finál hodi deside katak loos duni nulu ka lae,

“Eleisaun ida-ne’e Parlamentu muda lejizlasaun hodi fó kompeténsia ba CNE atu halo verifikasaun ba votu nulu no reklamadu ne’ebé iha. Hafoin halo verifikasaun, CNE sei hola desizaun katak ne’e válidu fali ka nafatin hanesan orijen ne’ebé sira haruka mai,” José António Belo hateten.

Hafoin fó sai rezultadu provizóriu apuramentu nasionál, CNE mós sei fó oportunidade ba reprezentante kandidatu ka kandidatu sira atu hatama sira-nia reklamasaun relasiona ho prosesu verifikasaun ba votu sira molok CNE haruka ba Tribunál Rekursu hodi halo validasaun ba rezultadu ne’ebé sei fó sai ba públiku.

Apuramentu ne’e importante tebes atu bele identifika no haree hikas votu sira ho didi’ak tamba iha votante balun intensaun votu loos, maibé tamba liman nakdedar ka matan haree la moos, tamba konsidera ba situasaun sira-ne’e maka CNE konsidera importante oinsá atu verifika hikas ho loos tamba votu ida importante ba kandidatu ida.

“Ami sei halo servisu ida ho parsiál no iha neutralidade atu asegura kandidatu sira hotu nia votu,” José António Belo esplika.

Ho pandemia COVID 19 sei difikulta mós akta sira husi diaspora tamba data legál ne’ebé CNE iha loron tolu de’it no tuir oráriu urna no akta sira husi diaspora sei to’o iha Timor-Leste iha loron 27 fulan-Marsu  ne’e. Ho nune’e, CNE sei rekorre ba tribunál atu husu konsiderasaun hodi prolonga tan tempu balun atu CNE bele mós finaliza nia servisu sira liga ho akta sira ne’ebé sei mai husi diaspora.

 “CNE preparadu ba servisu sira ne’ebé mai husi povu nia desizaun, importante mak ita labele adianta informasaun sira ne’ebé ita seidauk hatene nia rezultadu,” nia hateten.

Ramos-Horta Lidera Provizória Ho Votu 278.138 (46,02%)

Kandidatu PR 2022-2027, José Manuel Ramos-Horta. Foto/Hatutan.com

Tuir dádus husi STAE Nasionál to’o oras ne’e falta akta hamutuk 37 husi sentru votasaun sira iha Munisípiu Dili mak seidauk konta.

Husi totál akta sira ne’ebé nia prosesu kontajen remata ona,  hatudu kandidatu husi Partidu CNRT José Manuel Ramos-Horta lidera provizória ho votu 278.138 (46,02%), kandidatu husi partidu FRETILIN Francisco Guterres “Lú Olo”, hetan votu 134.969 (22,33%), Armanda Berta dos Santos 53,392.00 (8,9 %), Lere Anan Timur 44,185.00 (7,44%), Mariano Assanami Sabino 43,988.00 (7,41%), Anacleto Ferreira 12,675.00 (%2,14), Martinho Gusmão 8.102.00 (1,36%), Hermes da Rosa Correia Barros 7,395.00 (1,25%), Milena Pires 4,395.00 (0,74%), Isabel Ferreira 3,779.00 (0,64%), Felisberto Araujo Duarte 2,470.00 (0,42%), Constâncio Pinto 2,346.00 (0,40%), Rogerio Lobato 1,936.00 (0,33%), Virgílio Guterres 1,550.00 (0,26%), Antero Bendito 1,427.00 (0,24%) no Ângela Freitas 665 (0,11%).

Jornalista: Vito Salvador