Hatutan.com, (02 Abríl 2022), Díli—Mission Aviation Fellowship (MAF) hahú implementa voo doméstika regulár atu halo operasaun liuliu fasilita turista sira-nia viajen rute Díli-Ataúro.

Serimónia lansamentu Voo Doméstiku entre Mission Aviation Fellowship (MAF) ho Governu Timor-Leste liu-liu Ministru Turizmu Komérsiu no Indústria José Lucas do Carmo da Silva, Ministru Transporte no Komunikasaun, José Agostinho da Silva, Ministru Agrikultura no Peskas, Pedro dos Reis, ofisialmente hala’o ona lansamentu iha, Sesta (01/02/2022).Foto/MTKI.

Voo ida ne’e MAF hamutuk ho Governu Timor-Leste liu-liu Ministru Turizmu Komérsiu no Indústria José Lucas do Carmo da Silva, Ministru Transporte no Komunikasaun, José Agostinho da Silva, Ministru Agrikultura no Peskas, Pedro dos Reis, ofisialmente hala’o ona lansamentu iha, Sesta (01/02/2022).

Notisia iha Relasaun:Domingos Soares Simu Posse Nu’udár Administradór Munisípiu Ataúro

Country Director MAF, Nick Hitchins garante voo ne’e sei fornese viájen ne’ebé lalais, konfiável ba turista sira atu ba iha illa Ataúro.

Ho prezensa turista sira ba iha illa ne’e sei ajuda hamoris ekonomia lokál durante pandemia Covid-19 globál, no sei lori esperansa ba indústria turizmu lokál foun.

“Ne’e hanesan parte hosi ami-nia komitmentu ba dezenvolvimentu kapasitasaun nasionál, no mós ami-nia komitmentu atu ajuda, lori esperansa no rekuperasaun ba povu Timor-Leste ne’ebé izoladu,”  Nick Hitchins hateten.

Nune’e mós Ministru Turizmu Komérsiu no Indústria (MTKI0 José Lucas do Carmo da Silva reprezenta  Oitavu governu konstituisionál hato’o apresisaun ba esforsu tomak ne’ebé governu Amérika halo liu hosi USAID fundus povu amerikanu nian, ne’ebé durante ne’e halo parseiru ho Timor-Leste durante tinan 20 ona.

Mission Aviation Fellowship (MAF) hahú implementa voo doméstika regulár atu halo operasaun liuliu fasilita turista sira-nia viajen rute Díli-Ataúro. Foto/MAF.

“Agradese mós Mission Aviation Fellowship hamutuk ho Asosiasaun Ataúro (ATKOMA) durante ne’e servisu hamutuk ne’ebé di’ak ohin bele realiza lansamentu ida-ne’e. Hosi parte governu nafatin halo kolaborasaun di’ak ho USAID, MAF, nune’e  ezenvolvimentu hosi parte turizmu nian iha Ataúro bele la’o ho di’ak,” nia agradese.

Kona-bá ne’e, Enkarregadu Negósiu Embaixada EUA, Thomas Daley konsidera Voo foun ne’e hanesan pasu importante ida hosi Estadus Unidus nia apoiu ba Timor-Leste nia dezenvolvimentu indústria turizmu.

“Liu hosi USAID nia projetu Turizmu Ba Ema Hotu, ami servisu hamutuk ona ho ATKOMA hodi prepara lori hikas turista internasionál sira fila mai Timor-Leste. Servisu ida ne’e selu ona dividendu importante sira ne’ebé mai hosi Covid-19, inklui liu hosi inaugurasaun Sentru Informasaun Turístika ida no progressu sira seluk,” nia hateten.

Haree hosi perspetiva turizmu, Ataúro nu’udár illa ida ne’ebé riku ho paizajen naturál, kulturál no istória ne’ebé bele atrai ema barak atu ba esplora hodi kontribui ba ekonomia lokál no nasaun.

Tanba ne’e, importante tebes atu iha meius transporte tantu marítima no aero atu hasa’e númeru turista ba iha illa Ataúro ne’ebé oras ne’e ho nia estatutu hanesan Munisípiu.

Jornalista: Carmelita Isaac