Hatutan.com, (31 Dezembru 2023), Díli – Moris ne’e hanesan admira de’it tanba hamosu sofrimentu oioin no presiza tempu atu halo reflesaun.

Lee Mós: Hamutuk Agradese bá Maromak no Harohan Husu Pás

Misa agradesimentu tinan tuan 2023 iha Kapela São José Aimeti-Laran, Domingu (31/12/2023). Foto/Lazaro Quefi

Iha filozofia ida naran Sokrates dehan hanesan ne’e moris ida ne’ebé mak ema la reflete ne’e la serve atu moris tanba ne’e presiza atu reflete duni bá moris durante tinan ida nia laran atu bele hetan inspirasaun foun no di’ak hodi bele hakat bá ka tama fila fali bá tinan ne’ebé foun ho lala’ok ne’ebé la hanesan katak sempre moris ho reflesaun. Nune’e, moris ne’e admira tanbasá mak iha moris ne’ebé di’ak furak no beleza tan ne’e ba sira ne’ebé mak hatudu mai hamosu duni admirasaun ida maske buat hotu-hotu organiza malu ho di’ak, tanba ne’e admira hamosu liafuan dehan tanbasá mak mosu sofrimentu no akontese maldade iha mundu ne’e.

“Ne’e atu ajuda ita no valoriza ita-nia esperiénsia durante tinan ida nia laran no hanesan ema sarani ita agradese bá Na’i Maromak tanba Maromak kria no koloka ita iha tempu no espasu nia laran. Na’i Maromak mak Na’in bá tempu no Nia mak kriadór bá tempu no reguladór bá tempu no mós Nia mak kriadór bá tempu ne’e rasik tanba ne’e nia lori ita hosi inísiu bá to’o iha ikus,” Padre  Joel Pinto, OFM hateten iha omilia misa agradesimentu tinan tuan 2023 iha kapela São José Aimeti-Laran, Díli,  Domingu  (31/12/2023).

Amu selebrante ne’e dehan buat hotu-hotu mai hosi Nia no sei fila fali bá Nia reflesaun tomak konsentra iha Na’i Jesus Kristu tanba Nia mak sentru hosi realidade moris ne’ebé ema hotu presiza agradese bá grasa no bensan ne’ebé mak fó ona mai iha mundu ne’e.

“Ita hamoris tinan ida 2023 ne’e oinsá husu hosi loron 01 Janeiru 2023 no remata iha loron 31 Dezembru 2023. Se ita hala’o tempu ne’e hanesan rutinidade ida, ne’e mak hanaran tempu kronos” Padre Joel Pinto hateten.

Na’i Maromak, tuir nia,  manifesta Nia vontade ne’e iha tempu nia laran la’ós fora hosi tempu, Nia hatudu buat hotu-hotu iha espasu nia laran la’ós fora hosi espasu enkamiña Nia istória no hatama nia an iha tempu no espasu finitu nia laran.

“Hanesan ema sarani ita-nia tempu maka tempu kairos katak Maromak manifesta ba ita ne’e buat di’ak atu liu hosi ne’e. Atu admira Na’i Maromak Nia di’ak no ita hasae louva, agradesimentu no hosu mós bensan nafatin atu hala’o moris ne’e sai di’ak liu tan. Ne’e tempu sekuénsia ida atu prienxe iha it- nia moris,” amu selebrante tenik iha nia omilia.

Nia hatutan katak tempu sei to’o mai katak sei mate, iha at no termina tamba ne’e keta husik tempu ne’e sai hanesan vaidade maibé presiza transforma an hanesan vaidozu no vaidoza hamoris tempu ho pozitivu iha família, servisu fatin no fatin sira seluk tanba tempu ne’e sei la repete ba dala-rua.

Jornalista Estajiáriu: Lazaro Pereira Quefi