Hatutan.com, (04 Juñu 2023), Díli-Partidu Frente Revolusionáriu Timor-Leste Independente (FRETILIN), Domingu (04/6/2023), halo enkontru reflesaun maratona iha fatin enkontru Tower-Fatuhada, Díli, hodi ko’alia no análize kauza hosi FRETILIN nia “derrota” iha eleisaun parlamentár (ElPar), 21 fulan-Maiu 2023.

Lee Mós : Deskobre Estratéjia sira Kontribui bá Vitória CNRT iha Eleisaun 2022-2023

Enkontru ne’ebé hala’o durante oras-10, hosi tuku 09:00 to’o tuku  18:00 kalan. prezide hosi lideransa Troika FRETILIN, Marí Alkatiri, Francisco Guterres “Lú Olo” ho  Tito da Costa “Lere Anan Timur”,  no pastisipa hosi membru Komité Sentrál FRETILIN (CCF) ativu sira, inklui delegadu balun hosi Munisípiu, hodi  halo mós  avalisaun ida kle’an para  deskobre fukun ka lakuna sira ne’ebé kontribui bá FRETILIN nia derrota ne’e.

Membru CCF, José Manuel “Nakfilak”. Foto/Elio dos Santos da Costa

Enkontru reflesaun ko’alia mós estratéjia partidu FRETILIN nian bá eleisaun prezidensiál 2027 ho eleisaun parlamentár 2028. Iha ámbitu enkontru ne’e, jornalista hosi mídia nasionál halo tentativa oioin atu bele halo entrevista direita ho Sekretáriu Jerál partidu FRETILIN, Marí Alkatiri,   maibé laiha biban. Nune’e, CCF delega hikas José Manuel “Nakfilak” hodi fó entrevista ho jornalista liga hosi rezultadu ElPar nian.

“Reuniaun traballu ho objetivu atu hala’o avaliasaun bá rezultadu eleisaun nian ne’e. Laiha tán buat seluk! Avaliasaun kona-bá rezultadu. FRETILIN dezde uluk kedas simu rezultadu,” membru CCF ativu, José Manuel “Nakfolak” lia tun bá jornalista sira.

Hatán kona-bá, dalan saida mak FRETILIN sei halo fali hodi manán konfiansa povu Timor-Leste nian, José Manuel Nakfilak dehan, povu seidauk lakon konfiansa totál bá partidu FRETILIN no nia konsidera derrota ida agora FRETILIN enfrenta ne’e normal

“Eleisaun iha fatin hothotu, sempre iha ema mak derrota, sempre iha ema mak manán. Ha’u la fiar katak, imi haree eleisaun ne’e, ho nia evolusaun rasik. Ha’u la fiar katak, ami sei bele hela de’it ho kadeira ida ne’e,” Manuel Nakfilak argumenta.

Ho derrota ida-ne’e, FRETILIN tenke halo preparativus ida di’ak bá oin no servisu maka’as iha baze.

José Manuel Nakfilak husu bá kuadru sira, militante, apoiante no simpatizante sira tomak katak, hafoin eleisaun ida-ne’e, sira hotu agora tenke konsentra no dedika sira-nia aan tomak atu hametin estadu, lori nasaun, harii nasaun ne’e didi’ak bá oin.

“FRETILIN nia esperansa bá futuru, liu-liu 2028, FRETILIN  tenke fila bá ukun. Ami hatene katak, vontade povu ne’e sei muda hosi momentu bá momentu. Será-ke, promesas ne’ebé ita halo ne’e, ita bele kumpri ka lae,” Nakfilak hateten.

Atu Koopera ho CNRT Desizaun iha Prezidente Repúblika

Maske rezultadu kona-bá eleisaun parlamentár 2023, Tribunál Rekursu (TR) seidauk fó sai nia rezultadu ofisial, maibé, rezultadu provizóriu hosi apuramentu nasionál STAE ho akta hodi CNE  hatudu katak partidu Congresso Nacional Reconstrução Timorese (CNRT) nu’udár partidu vensedór ka primeiru mais vitadu, ho totál votu válidu hamutuk 288.289 (kadeira 31), no FRETILIN okupa iha segundu mais votadu ho  votu 178.338 (kadeira 19).

Haree bá rezultadu ne’e, tuir lei, partidu ne’ebé votu barak liu (mais votadu) mak hakat bá forma Governu foun dala-IX (9). Maibé, bá FRETILIN, atu atu koopera ka la koopera ho CNRT bá formasaun Governu foun ne’e, sei hein desizaun ruma hosi Prezidente Repúblika (PR), José Ramos-Horta.

Hatán kona-bá karik, CNRT konvida FRETILIN atu bele ukun hamutuk ka apoiu malu iha manaiera insidénsia parlamentár, Nakfilak dehan, jornalista sira hatene bainhira mak CNRT atu husu mai ho FRETILIN atu ukun hamutuk.

Tuir akta kona-bá rezultadu provizóriu apuramentu nasionál CNE nian, bá Eleisaun Parlamentár, 21 Maiu 2023 foin lalais, ho rezultadu sira mak hanesan: Totál akta sira ne’ebé apura ona iha 1472 (100,00%).

Totál eleitór sira ne’ebé rejistadu 890.145. Totál eleitór sira ne’ebé partisipa iha eleisaun 705.693, mai hosi feto 343.278 (48,64%), mane 362.415 (51,36%). Taxa partisipasaun 79%. Totál votu sira ne’ebé válidu 692.521 (98,13).

Totál boletin sira ne’ebé abandonadu 26. Totál votu sira ne’ebé Nulu 10.387 (1,47%). Totál votu sira ne’ebé branku 2.698 (0,38%). Totál votu sira ne’ebé reklamadu 0 (0,00%). Totál votu sira ne’ebé rejeitadu 61 (0,01%).

Hosi rezultadu provizóriu apuramentu nasionál ne’e, atribui votu bá kada partidu sira mak hanesan tuir mai ne’e; PDN 597 (0,1%), PLPA 3.272 (0,5%), PLP 40.720 (5,9%), PD 64.517 (9,3%), KHUNTO 52.031 (7,5%), PVT 25.106 (3,6%), UDT 1.256 (0,2%), PUDD 21.647 (3,1%), PR 1.558 (0,2%), UNDERTIM 1.023 (0,1%), FRETILIN 178.338 (25,8%), CNRT 288.289 (41,6%), CASDT 3.170 (0,5%), MLPM 642 (0,1%), PST 2.415 (0,3%), PDC 1.261 (0,2%), no APMT 6.678 (1,0%).

Maske nune’e, partidu neen (6) de’it mak liu barreira 4%, hodi hetan asentu Parlamentár iha Paralementu Nasionál (PN), CNRT 288.289 (kadeira 31), FRETILIN 178.338 (kadeira 19), PD 64.517 (kadeira 6), KHUNTO 52.031 (kadeira 5), no PLP 40.720 (kadeira 4).

Iha Kinta, 01 fulan-Juñu ne’e, Comissão Nacional de Eleições (CNE), remete ona rezutadu provizóriu apuramentu nasionál bá Tribunál Rekursu (TR  no tuir kalendáriu iiha kuarta,  (07/06/2023) Tribunál Supremu Justisa ka Tribunál Rekursu sei deklara rezultadu ofisiál.

Jornalista: Rogério Pereira Cárceres