Hatutan.com, (06 Abríl 2022), Dili- Negosiante roupa uzadu (obralan) iha estada ibun Tasi Tolu nian husu ba Ekipa Jestaun Merkadu Munisípiu Dili halo atuasaun iha terrenu ho imparsiál.

Negosiante roupa uzado (obralan) iha Tasi Tolu, Bosco da Conceição Lobato ho nia família asiste hela Ekipa Jestaun Merkadu Munisípiu Dili sobu baraka sira ne’ebé fa’an roupa uzadu iha Tasi Tolu, Dili, Kuarta (06/04/2022). Foto/Hatutan.com

Iha atuasaun Ekipa Jestaun Merkadu Munisípiu Dili sobu baraka-oan sira ne’ebé negosiante sira estabelese iha estada-ibun Tasi Tolu nian, deskonfia iha favoritizmu tanba negosiante balun nia baraka sobu, seluk fali la sobu.

“Deskulpa de’it, ami kumpre de’it orden, baraka sira-ne’e tama iha ordenasaun no espasu sira iha estrada ninin (sorin-sorin) ne’e zona livre, espasu sira-ne’e Governu selu hotu ona indenizasaun para sobu no muda,” pesoál Ekipa Jestaun Merkadu Munisípiu Dili ida hateten bainhira halo hela atuasaun sobu no barak negosiante roupa uzadu (obralan) nian ida iha Tasi Tolu, Dili, Kuarta (06/04/2022).  

Bosco da Conceição Lobato ho nia kaben hanesan baraka na’in ne’ebé sira-nia baraka fa’an roupa obralan nian hetan sobu, konsidera atuasaun Ekipa Jestaun Merkadu Munisípiu Dili nian ne’e nakonu ho favoritizmu. Tanba iha sorin ida, Ekipa Jestaun Merkadu Munisípiu Dili nian sobu, maibé sorin seluk, baraka balun ne’ebé sira koñese ka iha relasaun família la sobu fali.

“Ami hatene no ami simu ona indenizasaun hosi Governu. Maibé tanba seidauk utiliza maka ami harii baraka hodi fa’an roupa obralan ajuda sustenta ami nia uma-laran no selu oan sira-nia eskola iha situasaun ida difisil ne’e, krize ekonomia,” Bosco da Conceição Lobato hateten ba Hatutan.com.

Bosco da Conceição Lobato, ho negosiante roupa obralan seluk tan la kontente bainhira Ekipa Jestaun Merkadu Munisípiu Dili tun ba sobu baraka sira-ne’e la iha informasaun antes ka la fó hatene antes, nune’e fó tmepu ba sira atu sobru rasik hodi la bele estraga sira-nia sasán balun ne’ebé sira fa’an hamutuk ho roupa uzadu iha baraka okos.

“Dezde horiseik sira mai derrepente de’it sobu ami nia fatin la iha informasaun. Tanba de’it dehan fatin sira-ne’e Estadu selu ona indenizasaun,” Bosco hateten.

Ekipa Jestaun Merkadu Munisípiu Dili sobu baraka sira fa’an roupa uzadu (obralan) iha Tasi Tolu, Dili. Foto/Hatutan.com

Nia rekoñese hetan  indenizasaun husi Governu nia simu ona, maibé husu atu Ekipa Jestaun Merkadu Munisípiu Dili, atu povu ka negosiante sira ho dignu.

“Negosiante Xina balun nia fatin sira la sobu, sira mai loos deit mak ami timoroan sira ne’e. tanba de’it, fatin sira-ne’e Estadu ka Governu selu tiha ona indenizasaun. Ida-ne’e mak dehan tane povu no serbí povu. Ami nia laran susar no triste,” Bosco hateten.

Bosco, haktuir, Fatin ne’ebé agora halo ne’e, la’ós atu halo permanente, no Estadu fó duni osan ona iha tinan ida ho balun, maibé kondisaun uma laran mak obriga, entaun osan ne’e  uza hotu hodi sustenta oan sira ba eskola, nune’e dada baraka oan hodi fa’an obralan atu bele sustenta nesesidade báziku uma-laran nian.

Bosco  ho negosiante roupa obralan sira prontu koopera ho Governu atu sai husi fatin ne’e, maibé komunidade sira ne’ebé hetan risku ba konstrusaun ne’e, tenke sai hotu labele balun de’it mak sai balun nafatin iha fatin ne’e hodi halo negósiu.

Bosco ho nia família nia atividade loro-loron nian  mak fa’an roupa obralan  hodi sustenta nesesidade uma-laran no sustenta oan sira asesu ba eskola.

Jornalista: Elio dos Santos da Costa