Hatutan.com, (12 Abríl 2022), Díli-Vítima sira  dezastre naturál ka tropical cyclone iha loron 04 fulan-Abríl 2021, konsidera Governu kontinua abandona sira tanba to’o agora sira seidauk simu apoiu materiál konstrusaun hosi Governu atu hadi’a fali sira-nia uma.

Vítima Amelia de Jesus nia uma ne’ebé rahun tanba inundasaun iha loron 04 fulan-Abríl 2021. Foto/Hatutan.com

“Ami haree Governu kontinua abandona ami. Dezde akontese dezastre naturál ka tropical cyclone iha 04 fulan-Abríl 2021 to’o agora Estadu, Governu, Xefe Aldeia sira mai haree hela de’it, ami seidauk simu ajuda materiál konstrusaun  hosi Governu atu bele hadi’a hikas ami nia uma,”  Amelia de Jesus Ribeiro, nudár vitima inundasaun 04 Abríl 2021 ne’ebé hela iha Aldeia Moris ba Dame, Suku Bairru-Pité,  Dili, haktuir ba ekipa Hatutan.com, foin lalais ne’e.

Nia hatutan, antes ne’e nia simu apoiu emerjensia dauluk hosi Madre sira hosi Grupo Familia São Carolos Boromeu no Amu sira no ikus apoiu sasan emerjensia hosi Governu, maibe’e to’o agora nia labele hela iha ninia uma tanba  moru balun monu no rai tama nakonu iha uma laran no seidauk iha apoiu materiál konstrusaun hosi Governu.

To’o agora Amelia de Jesus Ribeiro, sei hela iha ninia oan mane ninia uma, maske uma ne’ebé sira hela hamutuk agora hetan mós estragu sériu hosi inundasaun hanesan.

Iha tempu hanesan vítima seluk, Marcelino Martins ne’ebé antes ne’e nia uma bee-tama no estraga sasán um- laran rekoñese katak, to’o agora ekipa tékniku hosi Governo seidauk mai halo identifikasaun atu ajuda hadi’a uma, hadi’a valeta ka muda vitima sira ba fatin seluk.

Depois  inundasaun akontese ne’e apoiu hanesan hahán, sasán sira hanesan dapur no sasán sira todan ne’e nian ne’e iha, mai hosi sosiedade sivíl no igreja, setor privadu balun, inklui Governu mos iha, maibé esforsu Governu nian atu reabilita fali fatin sira, liuliu harii moru protesaun ba komunidade sira nia uma ne’ebé rahun to’o agora seidauk iha.

Xefe Aldeia Moris Ba Dame, João Gudino, hateten nia hato’o relatóriu ona ba Governu, maibé seidauk iha resposta.

Xefe Aldeia ne’e mós rekoñese katak, alem de vitima akontesemntu inundasaun iha loron 04 fulan-Abríl 2021, vitima seluk ne’ebé uma hetan estragu iha tinan 2019 mós to’o agora balun seidauk simu apoiu materiál konstrusaun husi Governu atu bele ajuda hadi’a  fali sira-nia uma.

SEPS Rekoñese Vítima Uma-Kain 3,000 Seidauk Halo Rekuperasaun

Foin lalais ne’e, liuhusi selebrasaun misa ba hanoin hikas dezastre natural, 04 Abríl 2021, ne’ebé hala’o iha Igreja Parokia São José, Aimutin, Comoro, Díli, Sekretáriu Estadu Protesaun Sivíl (SEPS), Joaquim José Gusmão dos Reis Martins, konfirma katak, dezastre naturál liubá fó impaktu ba uma-kain 31,000 iha territóriu Timor-Leste no husi númeru ne’e maioria husi kapitál Dili hamutuk 25,000.

Iha dezastre naturál ka tropical cyclone, 04 Abríl 2021 rezulta ema na’in-47 lakon vida (mate) no na’in-14 mak seidauk hetan to’o agora.

Governu liuhusi SEPS apoia nesesidade báziku hanesan ai-han no material konstrusaun ba vítima  uma-kain  3,000 no falta uma-kain 3,000 seidauk halo rekuperasaun ba hela fatin tanba kestaun orsamentu.

“Iha Orsamentu Jerál Estadu 2022 nian, ami prevee de’it orsamentu ba vítima uma-kain 3,000, maibé dezastre naturál ne’ebé akontese ne’e iha territóriu Timor-Leste ne’ebé rezulta vítima 6,000, mas ami iha ona dalan atu apoia ba sira hotu,” hateten SEPS Joaquim Gusmão.     

Jornalista: Elio dos Santos da Costa