Hatutan.com, (22 Abríl 2022), Díli- Hafoin rekonsiliasaun akta husi Sekretariadu Tékniku Administrasaun Eleitorál (STAE)  ne’ebé hatudu José Ramos-Horta, hetan votu barak liu husi povu, Sesta ne’e, (22.04/2022), embaixadór sira no enkarregadu negósiu husi nasaun sira membru ASEAN nian hasoru direita Ramos-Horta hodi hato’o sira-nia parabéns no afirma sira-nia apoiu adezaun Timor-Leste bá ASEAN.

Lee Mós : Lú Olo Kongratula Ramos-Horta, Espera Sei Koopera ho Órgaun Soberania Tolu

Reprezentante ka embaixadór no enkarregadu negósiu husi nasaun membru ASEAN parabéniza Prezidente Eleitu, José Ramos-Horta, Sesta (22/04/2022). Foto/Hatutan.com

Hafoin simu bainaka  embaixadór nasaun sira membru ASEAN iha Díli,  Prezidente Eleitu, José Ramos-Horta hateten, enkontru ne’e nu’udár momentu importante ida bá adezaun Timor-Leste nian bá iha ASEAN tamba embaixadór no reprezentante hotu nasaun sira ASEAN nian, afirm sira-nia pozisaun hodi apoiu Timor-Leste tama bá ASEAN.

Liu husi sorumutuk ne’e prezidente eleitu, José Ramos-Horta, simu mós kongratulasaun direita husi nasaun membru ASEAN nian liu husi embaixadór no reprezentante sira bá vitória ne’ebé hetan iha eleisaun prezidensiál, liuliu bá povu Timor-Leste ne’ebé ho matenek no neon na’in kontribui bá prosesu demokratizasaun iha Timor-Leste.

Advertisement

Durante enkontru, Ramos-Horta mós haktuir bá embaixadór no reprezentante sira nasaun membru ASEAN nian kona-bá prosesu demokratizasaun ne’ebé la’o durante kampaña to’o eleisaun no haktuir mós situasaun real no akontesimentu sira durante eleisaun no liuliu ba vitória ne’ebé povu fó atu asume hikas knaar nu’udár Xefe Estadu.

Reprezentante ka embaixadór no enkarregadu negósiu husi nasaun membru ASEAN parabéniza prezidente eleitu, José Ramos-Horta. Foto/Hatutan.com

“Ha’u koalia ho sira kona-bá Timor-Leste nia adezaun bá ASEAN.  Sira hotu kontente no afirma sira-nia pozisaun atu apoiu Timor-Leste atu sai nasaun membru bá ASEAN,” Ramos-Horta tenik.

Prosesu adezaun Timor-Leste atu sai nasaun membru ASEAN la’o dezde tinan-10 bá kotuk, tamba ne’e, Horta hatuir, bá oin presiza iha estabilidade polítika iha rai- laran ho governasaun di’ak atu garante setor ekonomiku Timor-Leste labele monu ba krize ne’ebé lori impaktu negativu bá povu nia moris.

“Ha’u sei ko’alia ho Governu buka mobiliza apoiu internasional para salva ekonomia Timor-Leste hodi bele sai membru ASEAN iha tinan ida rua oin mai,” Horta kompromete.

Reprezentante embaixadór no enkarregadu  negósiu husi nasaun membru ASEAN hamutuk  na’in-lima (5) maka halo sorumutuk ho prezidente eleitu José Ramos-Horta, kompostu husi embaixadór Filipina iha Timor-Leste, AbdulMaid Kiram Muin, embaixadór Indonéziu Okto Dorinus Manik,  embaixadór Tailándia, Ekapol Poolpipat, enkarregadu negósiu husi Brunei Darusalam Waifi Nairul Anawar ho Nur Hidayah Mohd husi Malázya.

Jornalista: Vito Salvador

Advertisement