Hatutan.com, (25 Maiu 2022), Díli– Tribunal Distritál Díli (TDD) liu husi leitura sentensa ne’ebé lee sai husi Juiza singular Maria Solana, kondena estudante universidade na’in-17 ho pena multa ho montante $40.00 kada ema seen kustu judisiáriu.

Lee Mós : Tribunál Bolu Universitáriu Na’in-17 Ne’ebé Halo Manifestasaun iha MESSK

Tribunál Distritál Dili (TDD). Foto/Hatutan.com

Estudante na’in-17 ne’e hetan pena multa ne’e  bá krime dezobediénsia tanba halo manifestasaun iha Ministériu Ensinu Superiór, Siénsia no Kultura (MESSK) seen autorizasaun husi Polísia.

Estudante universidade na’in-17 ne’ebé hetan pena ne’e mak hanesan Leonisio Mariz, Nilton Alves, Rino da Costa, Ajor Domingos Amaral, Martinho da Costa, Jeconias Segelolo, Domingos da Costa, Marito Lopes, Pedro Gomes, Nelson do Carmo, Venceslau de Araujo Fernandes, Raimundo Alves, Joanico Lopes, Fizai Boni Goro, Rosalino Soares de Jesus, Abel da Cruz, Gilberto Caldas.

Razaun TDD aplika pena multa tanba provadu katak distánsia halo manifestasaun tama liu laran ka besik liu MESSK. Maibé Tribunál konsidera sirkunstánsia hotu ne’ebé iha katak arguidu sira foin primeira vez bá Tribunál no koopera di’ak hodi konfesa parsialmente bá faktu hotu ne’ebé konsta iha akuzasaun laran.

Antes ne’e, tuir akuzasaun husi Ministériu Públiku (MP) katak arguidu sira maioria estudante  husi Universidade Nasionál Timor Lorisa’e (UNTL), Universidade Dili (UNDIL) ho Universidade Oriental (UNITAL), iha loron 11 fulan-Setembru 2020 tuku 9:00 dadeer,  arguidu sira realiza reúne hodi halo manifestasaun uza spanduk hodi hamriik iha edifísiu MESSK nia oin sen autorizasaun husi Polísia Nasionál Timor-Leste (PNTL).

Ekipa PNTL hakbesik hodi husu atu arguidu sira sees husi fatin ne’e, tanba distinsaun tuir akordu atu halo manifestasaun iha resintu UNTL nia oin.

Maske PNTL fó hatene bá arguidu sira, maibé arguidu sira mantein no kontinua nafatin halo manifestasaun iha Edifísiu MESSK nia oin tanba ne’e ekipa PNTL halo kedas detensaun bá arguidu sira.

Audiénsia julgamentu prezide husi Juiza singular Maria Solana, MP reprezenta husi Prokuradór Ricardo Leite no arguidu sira hetan asisténsia legál husi Defensor Públiku Nelson Borges.

Jornalista: Carmelita Isaac