Hatutan.com, (25 Maiu 2022), Díli—Tribunál Distritál Díli (TDD), Kinta (25/05/2022), kontinua hala’o julgamentu bá kazu eis-koordenadór merenda eskolár Postu Administrativu Ataúro arguidu Ibrahim Soares, bá krime abuzu konfiansa agravadu no administrasaun danoza relasiona ho konstrusaun armazén foos iha tinan 2018 no motorizada inklui mobiliáriu ne’ebé Ministériu Edukasaun (ME) oferese bá arguidu.

Lee Mós : Kazu Eis Diretór Merenda Eskolár, Sasin Haruka Koordena ho Autoridade Lokál

Tribunál Distritál Dili.

Iha julgamentu kontinuasaun ne’e, sasin Mariano da Costa ne’ebé iha tempu ne’ebá asumu knar hanesan diretór eskola Filial Atauro Villa nia parte laiha koñesimentu kona-bá pedidu konstrusaun armazén foos merenda eskolár, tanba durante ne’e eskola refere prepara sala ida hodi rai foos no bainhira foos hotu, sasin halo pedidu bá Ministériu Edukasaun (ME) ho ME maka responsabiliza transporta foos refere to’o Eskola inklui osan selu karreta hodi tula foos ba Eskola.

“ME maka transporta foos husi Díli bá Atauro no to’o iha portu, karreta hein kedas hodi tula foos bá ami-nia eskola, tanba ne’e durante ne’e laiha problema tanba ME maka selu karreta tula foos no ami prepara sala ida hodi rai foos,” sasin deklara.

Hafoin rona sasin TDD adia hikas julgamentu bá loron seluk hodi kontinua rona sasin sira seluk.

Antes ne’e, tuir akuzasaun hosi Ministériu Públiku (MP), katak iha tinan 2014 to’o 2018, arguidu selebra kontratu ho Ministériu Edukasaun (ME) númeru Ref. 248/DNRI—IfNWI/2016 ba pozisaun Koordenadór Merenda Eskolár iha Postu Administrativu Ataúro ho saláriu mensál $221.00, tanba ne’e ME fornese fasilidade ba apoiu serbisu hanesan motór ho marka Honda Mega Pro, matrikula 1012 GA, termu entrega kupon mina, komputadór Desktop I, UPS I, printer HP I, tinta printer unidade 4, surat tahan rim 2 kada periodu trimestrál, armáriu vidru ba arkivu I, armáriu ki’ik ho gaveta l, meza servisu I, kadeira servisu l.

lha fulan-Dezembru 2018, ME hapara kontratu serbisu ba funsionáriu kontratadu hamutuk 273, inklui arguidu liu hosi Ministeriál Nú 14/GMEJD[XlV2018.

Maske nune’e, hahú husi fulan-Dezembru 2018 to’o fulan-Juñu 2020, arguidu Ia entrega fila fasilidade hirak-ne’e ba ME, maibé arguidu rai nafatin sasán hirak ne’e iha ninia uma.

Alende ne’e, arguidu utiliza komputadór, printer no tinta printer, meza no kadeira serbisu nian hodi imprime matéria ba ninia privadu no família nia interese.

Iha tinan 2018, arguidu hanesan funsionáriu kontratadu bá Ajente Administrasaun Públika, halo proposta konstrusaun armazén merenda eskolár iha Postu Administrativu Ataúro utiliza ME ba iha Rotary Club of Moruya (IRCM) iha Austrália ho apoiu osan dolar Austrália $14.250.00, ekivalente ho dolar Amerikanu $10. 241,50.

Rezultadu hosi proposta ne’e, arguidu mak jere rasik hodi harii konstrusaun armazén ho medida naruk metru 12, Iuan metru 6 no as metru 3 iha arguidu nia pai rasik nia kintál-laran, ho totál osan ne’ebé fundasaun IRCM transfere mai iha testemuña BH nia konta bankária iha ANZ Díli no entrega ba arguidu ho montante $14.250.00, ekivalente ho dolar Amerikanu $10.241,50.

Arguidu aproveita oportunidade no konfiansa ne’ebé IRCM fó, tanba funsaun ne’ebé nia okupa iha momentu faktu ne’e akontese no arguidu hatene katak, apoiu osan ho montante $10.241,50 ne’e la’ós pertense ba nia, maibé arguidu jere no utiliza osan ne’e tuir ninia interese hodi fó benefísiu ba nia aan.

Arguidu hatene katak, fasilidade ne’ebé ME entrega ba arguidu liu hosi Diresaun Nasionál Lojístika, tanba funsaun ne’ebé arguidu okupa iha altura ne’ebá nu’udár koordenadór Merenda Eskolár iha Postu Administrativu Ataúro.

Fasilidade hirak-ne’e, hetan ona apreensaun hosi Komisaun Anti-Korrupsaun (CAC, sigla portugés), hafoin hetan delegasaun kompeténsia hosi Ministériu Públiku hodi halo investigasaun ba arguidu no ekipamentu hirak ne’e agora CAC entrega ona bá MP.

Ho hahalok arguidu nian, MP akuza arguidu ba pratika krime rua mak hanesan abuzu konfiansa agravadu, administrasaun danoza ne’ebé previstu iha artigu 257, 274 hosi kódigu penál TL.

Audiénsia julgamentu ne’e prezide hosi juis koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór Rogério Viegas no arguidu hetan asisténsia legál hosi advogadu privadu Tomázia Umbelina Magno no Xisto Pedroso.

 Jornalista: Carmelita Isaac