Hatutan.com, (26 Maiu 2022), Díli- Liu tiha tinan-neen (2016-2022) Governu suspende atividade grupu arte marsiál no arte rituál sira, Kinta (26/05/2022), VIII Governu ne’ebé lidera husi Primeiru-Ministru (PM), Taur Matan Ruak, ofisializa reativa fali atividade arte marsiál ho arte rituál sira.

Lee Mós : PSHT ho KORK Iha Ona Lisensa Atividade, IKS Seidauk

Atrasaun husi PSHT iha eventu lansamentu ofisiál atividade GAM iha Jinaziu Dili, 26 Maiu 2022. Foto/Hatutan.com

Iha tinan-6 liubá, IV Governu Konstitusionál ne’ebé lidera husi Primeiru-Ministru (PM), Xanana Gusmão, deside no hasai rezolusaun Governu nian hodi suspende totalmente atividade arte marsiál no arte rituál tanba mosu asalta-malu entre membru grupu sira ne’e to’o balun lakon vida no populasaun barak mak sai vítima tanba sira-nia uma hetan sunu no estragu.

Grupu arte marsiál ne’ebé tempu ne’ebá Governu suspende maka Persaudaraan Setia Hati Terate (PSHT), Ikatan Keluarga Silat Pemuda Timor Leste (IKSPTL) Kera Sakti ho  Kmanek Oan Rai Klaran (KORK), inklui arte rituál Sete-Sete (77).

Atividade lansamentu ofisial ne’ebé hala’o iha Jináziu Díli  asiste mós husi Ministru Edukasaun Juventude no Desportu (MEJD), Armindo Maia, Vise Ministru Edukasaun, Juventude no Desportu, António Guterres, Sekretáriu Estadu Juventude no Desportu (SEJD), Abrão Saldanha, Prezidente Komisaun Reguladór Arte Marsiál (KRAM), Octavio da Conceição hamutuk ho prezidente Federasaun Silat Nasional, inklui responsabilidade membru arte marsiál sira.

Arte marsiál sira ne’ebé hola parte iha serimónia hamutuk ho prezidente arte marsiál sira husi organizasaun silat sira hanesan Perisai Diri (PD), Seruling Dewata, Pedjajaran, PSHT, IKSPTL Kera Sakti, inklui KORK.

PM Taur Matan Ruak iha nia intervensaun ba membru arte marsiál sira hateten Estadu no Governu Timor-Leste iha polítika ida de’it, maka inkluzaun katak halibur no la’ós fahe.

Atrasaun husi Perisai Diri (PD). Foto/Hatutan.com

Taur Matan Ruak dehan, polítika ida-ne’e la’ós agora mak Timor-Leste adopta maibé hahú hori uluk kedas Timor-Leste uza no  lori polítika ida-ne’e mak Timor-Leste manan funu.

Tuir nia, eventu ida-ne’e importante tanba ne’e  Taur Matan Ruak parabeniza MEJD liu husi SEJD servisu maka’as ho autoridade tomak no ho prezidente KRAM bele iha kbi’it no forsa atu halibur organizasaun arte marsiál sira no organiza eventu sira nune’e atu hatudu katak arte marsiál iha dunik unidade.

“Ita boot sira nia lider barak iha ne’e husi organizasaun oin-oin balun uluk servisu ho ha’u ba luta ukun rasik an, ha’u kontente ita halibur hikas fali atu hahú luta foun bá dezenvolvimentu Timor-Leste nian,” Taur Matan Ruak hateten.

Nia dehan, saida mak VIII Governu halo liuliu husi SEJD halo mak atu ajuda regularize arte marsiál sira-nia situasaun no kondisaun hodi prevene konflitu entre joven.

KRAM husu Hakaruk Bá Lei Nú 5/2017

Atrasaun husi KORK. Foto/Hatutan.com

Prezidente KRAM, Octavio da Conceição husu atu organizasaun arte marsiál hotu ne’ebé hamahon an iha Federasaun Silat Timor-Leste atu mantein disiplina no hakaruk ba Lei Nú 5/2017 ne’ebé regula atividade arte marsiál kontinua aplikavel nafatin no rezolusaun Governu Nú 4/2020 hodi reativa atividade arte marsiál.

 “Organizasaun Arte Marsiál sira ne’ebé la kumpre sei iha sansaun hanesan suspensaun bá sira-nia atividade, koima bá sira nia aktu infrasaun sira no xamada atensaun áa membru sira ne’ebé halo problema iha nivel organizasaun,” Octavio da Conceição afirma.

Ohin bá oin ranting no sub-ranting sira husi kada organizasaun arte marsiál hotu bele ona hahú sira nia atividade treinu bazeia bá segunda diretiva KRAM nian ne’ebé publika ona iha Jornál da Repúblika.

 “Ita husu atu kada ranting no sub ranting ne’ebé iha tenke hetan autorizasaun husi sira-nia superior no mai rejistu iha KRAM,” nia tenik.

Jornalista: Vito Salvador