Hatutan.com (14 Juñu 2022), Díli—Comissão Anti-Corrupção (CAC) daudaun ne’e hala’o hela prosesu abiriguasaun hodi halibur no analiza dokumentu ne’ebé iha relasaun ho kazu rekrutamentu funsionáriu Guarda Floresta.

Dokumentu hirak ne’ebé konsege CAC halibur ona mak hanesan avizu rekrutamentu inklui rezultadu teste ikus nian.

Lee Mós: CAC Suspende Kontratu Guarda Florestál Na’in-184

“Kazu Guarda Floresta ami rejista keixa hafoin média SMnews halo publikasaun ka live, entaun ami nia investigadór sira rejista kedan hanesan informasaun hodi halo abiriguasaun no iha momentu ne’ebá hosi parte Komisaun Funsaun Publiku (KFP) hamutuk ho CAC tun diretamente halo inspesaun. Maibé, iha parte investigasaun CAC nian ami rekolla ona dokumentus hotu liga ho prosesu rekrutamentu no daudaun iha faze halo analiza. Karik iha indisius krime maka ami sei manda ba Ministériu Públiku (MP) hodi rejista hanesan auto inkéritu,” Diretór Jerál Investigasaun CAC, José Verdial hateten ba Hatutan.com iha Díli, Tersa (14/06/2022).

Daudaun ne’e CAC sei halo analiza ba prosesu rekrutamentu ne’e, tuir regra ne’ebé aplika ka la’e, maibé bainhira mosu krime maka CAC sei prepara auto haruka ba MP.

Tanba ne’e, CAC sei esforsu hodi finaliza prosesu analiza no halibur dokumentu ne’e, nune’e bele halo auto ba MP hodi haree karik MP delega fali kompeténsia ba CAC hodi halo investigasaun maka CAC foin bele notifika ema balun hodi presta deklarasaun.

Jornalista: Carmelita Isaac