Hatutan.com, (13 Juñu 2022), Díli—Ekipa Kontrolu Comissão Anti-Corrupção (CAC) no Provedoria dos Direitos Humanos e Justiça (PDHJ) lidera hosi Komisáriu Adjuntu Prevensaun no Sensibilizasaun Luis de Oliveira Sampaio no Adjuntu Boa Governasaun-PDHJ José Cristovão hasoru malu ho Vise-Ministru Comérsiu no Indústria ho ekipa hodi partilla infromasaun ba malu kona-bá prosesu preparasaun implementasaun programa Cesta-Bázika segunda faze iha edífisiu MTKI Bebora, Díli, Segunda (13/06/2022). 

Ekipa Kontrolu CAC no PDHJ lidera hosi Komisáriu Adjuntu Prevensaun no Sensibilizasaun Luis de Oliveira Sampaio no Adjuntu Boa Governasaun-PDHJ José Cristovão hasoru malu ho Vise-Ministru Comérsiu no Indústria ho ekipa hodi partilla infromasaun ba malu kona-bá prosesu preparasaun implementasaun programa Cesta-Bázika segunda faze iha edífisiu MTKI Bebora, Díli, Segunda (13/06/2022). Foto/CAC.

CAC no PDHJ hakbesik ba Vise-Ministru Turizmu Komérsiu no Indústria hodi rona no buka hatene informasaun profunda ba prosesu preparasaun programa Cesta-Bázika, liu-liu iha parte MTKI ninian.

Lee Mós: CAC-PDHJ Kontinua Fó Atensaun ba Implementasaun Cesta Bázika Faze Daruak Atu Prevene Korrupsaun

CAC no PDHJ hato’o mós kestaun balun kona-bá informasaun sira liga ho preparasaun tékniku hosi órgaun implementadór ba implementasaun programa Cesta-Bázika ne’e.

“Ekipa CAC no PDHJ ko’alia ba Vise Ministru MTKI katak, instituisaun rua ne’e nia akompañamentu no halo koordenasaun ho Sekretariadu Tékniku durante ne’e, nota no identifika lákuna no defisiénsia balun iha preparasaun programa CB ne’e tanba seidauk kompleta rekezitu balun relasiona ho provizaun sira dekretu lei nú 10/2022- kona-bá Medida Reforsu Implementasaun Programa Cesta-Bázika nian,” Hatutan.com sita komunikadu.

Identifikasaun hirak ne’e inklui ona ho difikuldade tékniku hodi reuni dadus konsolidadu benefisiáriu sira hosi Sekretariadu Tékniku iha tempu badak, no la klareza kona-bá produtu lokál sira iha ‘stock’, tanba ekipa kontrolu sira seidauk hetan informasaun ka dadus ruma hosi ST kona-bá prosesu mobilizasaun no koordenasaun ho kooperativa ka produtór lokál sira kona-bá disponibilidade produtu lokál ba objetivu implementasaun programa ne’e.

CAC no PDHJ mós aprezenta kestaun no dúvida balun ba Vise-Ministru MTKI hodi halo klarifikasaun kona-bá lista kompaña sira ne’ebé partisipa iha prosesu konkursu programa Cesta-Bázika nian, no husu atu fasilita dadus kompaña hirak ne’e mai órgaun kontrolu hodi halo akompañamentu ba prosesu sira ne’e.

Vise-Ministru MTKI nian mós preokupa ho kestaun lubuk ida ba implementasaun programa Cesta-Bázika faze daruak nian ne’e no rekoñese iha defisiénsia balun iha aspetu politika no téknika nian ba programa refere.

Vise-Minsitru MTKI mós husu tulun mós ba ekipa kontrolu CAC no PDHJ atu nafatin hala’o servisu tuir mandatu ne’ebé lei fó no kontinua fó-hanoin juridikamente no téknikamente sira ba órgaun implementadór hodi hadi’a sistema judisiál no administrasaun públika ida moos no promove boa guvernasaun. 

Enkuantu ba servisu interese Estadu no garante administrasaun públiku ida efisiensia no efetividade ba programa Cesta-Bázika nian, antes ne’e, ekipa konjunta CAC no PDHJ mós halo ona komunikasaun akonsellamentu no rekomendasaun beibeik ona ho parte Sekretariadu Tékniku nian hodi hato’o pontus krítikus sira kona-bá elementu legál ba programa Cesta-Bázika nian hodi hadi’a lákuna no defisiénte ne’ebé iha antes implementa programa refere.

CAC no PDHJ halo ona sorumutu akonsellamentu ho Sekretariadu Tékniku liu-hosi enkontru prezensiál no mós haruka karta akonsellamentu beibeik ona ba Sekretariadu Tékniku hodi kumpre dekretu lei nú 10/2022-Medida Reforsu Implementasaun Program Cesta-Bázika nian no prevene poténsia rísku korrupsaun.

Sorumutu akonsellamentu ne’ebé realiza beibeik ne’e mós nu’udár responsabilidade juridika órgaun kontrolu CAC no PDHJ nian no nu’udár servisu integrante iha ámbitu prevensaun krime korrupsaun no promosaun boa governasaun nian ne’ebé estipula iha Artigu 5 (1) letra (c) Lei nú. 8/2009 kona-bá Kriasaun CAC, iha ámbitu prevensaun krime korrupsaun nian no tuir artigu 24 (a) no Artigo 35 hosi Lei 7/2004, alterada hosi Lei 8/2009, kona-ba Estatuto PDHJ; Nune’e mós Artigu 3 (3) hosi Estatutu PDHJ, ne’ebé mak aprova hosi Lei nu. 7/2004 ho nia alterasaun dahuluk hosi Lei nú. 8/2009.

Jornalista: Carmelita Isaac