Hatuan.com, (13 setembru 2021), Díli—Loron hirak, ikus-ikus ne’e, públiku mundu virtuál nian (Facebook) preokupa ho publikasaun foto no video balun kona-ba karau vaka ne’ebé han hela du’ut iha jardín Edífisiu Ministériu Negósiu Estranjeiru no Kooperasaun (MNEK) nian.

Situasaun no fenómena karau han du’ut iha Jardín MNEK nian ne’e lori mós preokupasaun ba Servisu Jestaun Merkadu Munisípiu Díli. Nune’e, Xefe Departamentu Jestaun Merkadu Munisípiu Díli, Berta Santa Gonçalves Viera, deklara katak, durante ne’e  ekipa Jestaun Merkadu Munisípiu Díli halo patrullamentu hale’u sidade Díli laran tomak hodi fó atensaun ba komunidade, oinsá bele tau matan ba animal ne’ebé hakiak, atu nune’e, bele asegura sidade moos.

Xefe Departamentu Jestaun Merkadu Munisípiu Díli, Berta Santa Gonçalves Viera. Foto/Hatutan.com

“Loron hirak ikus ne’e ita haree, situasaun aat uitoan, karau kuaze hat ka lima ba tama iha jardín MNEK halo ema hotu preokupa no ami rasik mós preokupa ho situasaun ne’e,” Berta Santa Gonçalves Viera, haktuir hodi responde Hatutan.com iha nia servisu fatin, Díli.

Servisu Jestaun Merkadu Munisípiu Díli orienta ona nia ekipa guarda Munisípiu Díli ba iha edifísiu MNEK atu bele haree animal hakiak sira labele husik la’o livre iha sidade laran.

“Ami  fó atensaun  beibeik ona atu sulan animal hakiak sira, hanesan fahi, bibi, no karau sira atu la bele la’o iha sidade laran. Se kontinua nafatin, ami hetan animal hirak ne’e sei oho,” Berta Santa Gonçalves Viera afirma tan.

Nia dehan, durante ne’e ekipa jestaun merkadu liuhusi guarda Munisípiu Díli halo ona avizu ba komunidade sira atu labele husik animal arbiru no asegura animal labele lao livre iha dalan públiku sira iha sidade laran.

Ekipa Jestaun Merkadu Munisípiu Díli, ohin mós halo ona avizu jerál ba iha área edifísiu MNEK nian, liu-liu ba komunidade ne’ebé hakiak animal besik edifísiu públiku atu tau iha atensaun tanba uainhira ekipa jestaun merkadu halo patrullamentu mak hetan nafatin animal hirak ne’e sei kaer no oho hafoin lori ba entrega iha instituisaun karidade sira tuir termu entrega ne’ebé estabelese ona.

Lito Rambo halo live video iha nia kronolojia Facebook, Domingu (12/09/2021). Foto/Repro Hatutan.com

Molok ne’e, iha Domingu (12/09/2021), purvolta tuku rua meiudia, liu minutu balun, Joven rezisténsia koñesidu ho naran Lito Rambo, ho halo video laive iha nia kronolojia Facebook hodi espera nia lakontente haree karau livremente han duun iha jardín Edifísiu MNEK nian.

Iha espresaun  ne’e Lito Rambo lansa  kritika hasoru Ministra Negósiu Estranjeiru no Kooperasaun, Adaljiza Albertina Xavier Reis Magno, atu bele toma atensaun no halo jestaun ba ambiente iha MNEK hodi asegura imajen no integridade Timor-Leste hanesan nasaun soberanu no independente.   

Intensaun hosi video live ne’ebé Lito Rambo halo ne’e hodi responde ba ema balun ne’ebé antes ne’e halo defeza de onra, kona-ba imajen karau lima ne’ebé han duut iha MNEK nia oin ne’e imajen antigu.

Iha vídeo ne’e, seguransa sivíl hosi MNEK nian mós hakbesik mai Lito Rambo hodi esklarese buat ruma kona-bá karau hirak ne’ebé sempre han du’ut iha jardín MNEK nian. Sira sempre duni karau hirak-ne’e, maibé karau sempre mai hela de’it.

Lito Rambo lia tun ba pesoál seguransa sivíl ne’e hateten, “imi la sala, ha’u fó hanoin. Ha’u hanesan mós rai ida-ne’e nia oan triste haree situasaun ne’e.  Ha’u kritika jestór sira, labele hatene okupa de’it. Ha’u hakarak ko’alia ho jestór sira, ha’u lakohi ko’alia ho ita-boot sira. Tuir loos Ministra Negósiu Estranjeiru no Kooperasaun (MNEK) maka tenke  jere situasaun MNEK no asegura imajen MNEK nian.”

“Hateten ba Ministra Adalzija labele okupa de’it pozisaun hanesan ministra, maibé la hatene jere. Ami laiha ódiu, maibé hanesan sidadaun no joven ne’ebé partisipa iha luta, la aseita situasaun ne’e. Ko’alia ho ministra atu hatene jere. Hanesan juventude rezisténsia, ita triste haree MNEK hanesan foho. Triste tebetebes,” Lito Rambo afirma tan.

Jornalista Hatutan.com  halo tentativa ona atu konfirma ho Ministra Adalzija Magno, iha serimónia hasa’e bandeira meiu mastro  hodi deklara lutu nasionál loron tolu ba eis prezidente Portugal, Jorge Sampaio nia mate iha Palacio do Governo, segunda (13/09/2021), maibé Ministra Adalzija Magno, okupadu ho servisu Estadu nian.  (bit)