Hatutan.com, (16 Setembru 2021), Díli-“Ami iha esperiénsia bainhira konvida mídia balun (ha’u la presiza temi nia naran iha ne’e) ba halo kobertura ba ami nia atividade, sira kobra ami tenke selu maka sira autoriza jornalista sira ba halo kobertura. Ami  pasiénsia ba selu tiha iha mídia ne’e nia dirijente marketing maka sira foin ba halo kobertura ba ami nia atividade. Hakarak husu de’it ba Conselho de  Imprensa, notísia ne’e bele selu ka oinsá?”

Conselho de Imprensa rezlia atividade sosializasaun kona-ba direitu de resposta no retifikasaun. atividade ne’e hala’o iha salaun CI, Konta-Boot, Díli, kinta (16/09/2021). Foto/CI

Preokupasaun no pergunta ne’e hato’o hosi pesoál relasaun publika hosi Kuartél Jenerál FALINTIL-Forsa Defeza Timor-Leste (F-FDTL) ida  iha sesaun pergunta no resposta iha atividade sosializasaun hosi Conselho de Imprensa de Timor Leste (CI) kona-ba   oinsá pesoál singular ka koletiva (privadu no públiku) hatene ezerse sira-nia direitu de resposta no retifikasaun bainhira iha ofensa ba sira-nia direitu personalidade husi órgaun ka meiu komunikasaun sosiál.

Liuhusi sosializasaun ne’ebé hala’o iha salaun enkontru Conselho de Imprensa iha Kintal-Boot, Díli, kinta (16/09/2021), xefe departamentu relasaun publika Ministériu Negósiu Estranjeiru no Kooperasaun (MNEK)  nian ho mós portavós Komandu Jerál  Polísia Nasional Timor Leste (PNTL),   Superintendente Xefe Arnaldo de Araújo, mós aprezenta preokupasaun hanesan no husu atu CI bele fó esplikasaun kona-ba situasaun sira, mídia kobra osan bainhira konvida ba halo kobertura ba atividade sira ne’ebé iha relasaun ho atividade ministériu sira nian, atividade PNTL nian no mós atividade balun F-FDTL nian.   

Tuir sira nia entendimentu katak kobertura ba atividade ne’ebé iha valor notísia ne’e la bele selu. Maibé, realidade hatudu katak mídia balun, bainhira ba konvida halo kobertura ba atividade ka konferénsia imprensa ruma, sira husu fali osan tanba dehan ne’e regra instituisaun mídia ne’e nian  no tanba mós dehan mídia ne’e mídia  komersiál.

Hatán ba  preokupasaun sira-ne’e, membru Conselho de Imprensa, Francisco Belo Simões da Costa esplika, buat ida naran notísia ne’e la bele lori osan sosa. Notísia ne’e notísia. Oin-seluk, kuandu konteúdu  husu halo advertorial ka iklan, ne’e depende fali ba parte sira nia negosiasaun folin.

“Iha ne’ebé de’it,  kobertura ba notísia, mídia la bele kobra osan. Anaun-ser  halo advertorial ka iklan ka pakote ne’ebé atu promove interese instituisaun sira-nian no divulga programa instituisaun sira nian ne’ebé interese instituisaun nian. Maibé bainhira ita ba konvida mídia halo kobertura ba informasaun ne’ebé iha nia sentidu notísia no ba interese públiku, mídia la bele kobra osan,” Francisco Simões klarifika tan.

Nia mós dehan, sé mídia sira husu osan ba halo kobertura ba serimónia ho konteúdu notísia, ne’e bele afeta ba integridade no independénsia órgaun no meiu komunikasaun sosiál sira-nian.  Tanba lójika ne’e, bainhira ema selu ona notísia, maka notísia ne’e tenke obedese ba ema nia hakarak.

Di’ak liu, tuir Konselleiru Francisco Simões, komunika ho parte sira ne’ebé fo konvite atu prodús pakote de’it para bele kobra osan. Maibé mídia tenke fó hatene katak konteúdu pakote ne’e selu no tenke tau disclaimer  atu nune’e bele públiku bele hatene katak ne’e nudár advertorial ne’ebé iha ligasaun ho konteúdu pakote programa. La’ós notísia.

Iha biban ne’e, diretór Diresaun Dezenvolvimentu Analiza Mídia (DDAM), Alberico D.C Junior, reforsa katak CI mós peskiza balun haree mídia sira halo publikasaun advertorial, maibé nia konteúdu ne’e notísia fali.

“Ita hakarak programa ne’ebé entidade sira selu ne’e  nia modelu tenke pakote  ketak ida,  labele tau iha notísia no halo nia estrutura notísia fali. Ida-ne’e  hamosu konfuzaun,” Alberico hateten.

Hosi relasaun públiku MNEK relata katak sira-nia parte simu kleur tiha ona dokumentu  hosi mídia refere (la temi mídia nia naran) kona-ba tarefa pagamentu bainhira konvida halo kobertura iha Díli ho nia kustu kobertura  hanesan ne’e no karik sai hosi Díli ho kustu  hanesan ne’e la inklui ho selu pediam  sira-nia jornalista.

“Ami agora ne’e MNEK konvida sira hala’o kobertura ba de’it ami nia atividade iha Díli laran tanba selu purvolta $75.00, no karik iha munisípiu sira seluk selu liu ida-ne’e. la sura ho perdiam ba jornalista sira. ne’e ami selu ketak. Tanba ne’e maka MNEK konvida sira iha Díli laran de’it no sai hosi Díli, ami la konvida tanba osan laiha atu selu,” pesoál relasaun públiku MNEK nian ne’e aprezenta informasaun ne’e.

Pesoal relasaun públika F-FDRL nian fundamenta liután dehan,  iha Tour FALINTIL, foin lalais ne’e, mídia ne’e mós kobra osan bainhira F-FDTL konvida halo kobertura ba Tour FALINTIL hale’u Timor.

“Atividade Tour FALINTIL ne’e komu paradu tiha, ami selu mídia ne’e purvolta $1,000-liu no pediam ba jornalista ami selu ketak pesoal relasaun públiku ne’e klarifika.

Konselleiru Francisco Simões, hatán dehan, atividade istóriku Tour FALINTIL ne’e interese públiku no nia valor notísia ne’e importante hodi fó hanoin fali ba jerasaun foun sira kona-ba istória no sakrifisiu FALINTIL nian, liuliu hosi Tour FALINTIL ne’e halo mós atividade umanitária balun, tuir loos ne’e notísia no la presiza selu.

“Hanesan foin ha’u esplika ona katak, se parte sira iha konkordánsia halo pakote espesiál ida liu tempu minutu 15 bele konsidera atu selu. Depende ba negosiasaun parte sira nian. Mas, buat ida naran notísia ne’e la ‘merese’ selu,” Francisco Simões hateten. 

Kona-ba direitu de resposta no retifikasaun  

Liuhosi sosializasaun kona-bá direitu de resposta no retifikasaun ne’e, Konselleiru Francisco Simões, klarifika katak bainhira iha jornalista no mídia sira publika sira-nia notísia ofende indivíduu balun karik,  justu liu maka  uza artigu 34  kona-ba Direitu de Resposta no Retifikasaun.

“Esperiénsia ne’ebé CI nota durante ne’e maka entidade sira no sosiedade sira la uza direitu de resposta no retifikasaun ne’e bainhira mídia no jornalista sira hakerek ofende sira-nia integridade pesoál no integridade koletiva. Dala barak liu, uza Facebook hodi halo direitu de resposta no retifikasaun ne’ebé bele hamo konfuzaun meik liu tan no sei la hetan solusaun ba problema. Ha’u nia susesaun uza Direitu de Resposta no Retifikasaun ne’e haruka ba mídia ne’ebé pulbika sala no ninia koñesimentu haruka mai Conselho de Imprensa atu Conselho de Imprensa akompaña to’o loron 30 maka mídia ne’e la publika, maka Conselho de Imprensa sei halo notifikasaun,” Francisco Simões esplika.

Lei Komunikasaun Sosiál iha Kapítulu V kona-ba Direitu de Resposta no de Retifikasaun, iha artigu 34 (Kondisaun Sira Efetivasaun Nian) garante ba fontes informasaun no ba públiku nia direitu de resposta no retifikasaun.

Iha rohan ba atividade sosializasaun ne’e, partisipante sira espresa sira-nia entuziazmu tanba CI bele fasilita enkontru sosializasaun ne’e hodi bele introdús Lei Komunikasaun Sosiál no bele ih interasaun entre pesoál relasaun públiku ka media officer entidade públiku nian ho CI.

“Ami sujere atu enkontru sira ne’e la bele hotu iha ne’e no kontinua ho tópiku interesante sira no ami sujere bele karik CI bele fasilita atividade hanesan ne’e entre ami pesoál relasaun públiku Estadu nian ho jornalista sira hasoru malu hodi tuur hamutuk ko’alia ba malu no buka hatene saida maka ami bele halo no saida maka jornalista sira presiza. Ne’e di’ak liu,” partisipante sira rekomenda. (fya)