Hatutan.com, (04 Jullu 2022), Díli—Taxa ezekusaun reál Orsamentu Jerál Estadu (OJE) Retifikativu 2022 ba Governu Sentrál, esklui Seguransa Sosiál no RAEOA, to’o iha kinta 30 Juñu 2022, atinji millaun $597,7 ka 19% hosi totál OJE Retifikativu 2022 ba Governu Sentrál ho montante billiaun $3,1.

Edífisiu Ministériu Finansa, Aitarak Laran, Díli. Foto/Média MF

Enkuantu taxa ezekusaun reál OJE Retifikativu 2022 ba Governu Sentrál esklui Fundu Kombatentes Libertasaun Nasionál ho montante billiaun $1 atinji ona 33%.

Lee Mós: Prezidente Repúblika Promulga OJE Retifikativu 2022

“Taxa ezekusaun reál Governu Sentrál aas liu mak iha Ajénsia Autónoma sira ne’ebé ezekuta ona millaun $69,7 ka 40% hosi orsamentu alokadu millaun $173,1. Tuir kedan ho FDCH millaun $4,5 hosi orsamentu alokadu millaun $12,” Hatutan.com sita komunikadu hosi Ministériu Finansas, Segunda (04/07/2022).

Autoridade Munisipál hamutuk 13, ezekuta ona millaun $20,4 hosi orsamentu alokadu millaun $56,1. Liña Ministériu sira ezekuta ona milliaun $475,8 ka 19% husi orsamentu alokadu billiaun $2,5.

Enkuantu, Fundu Covid-19, Fundu Espesiál ne’ebé mak jere hosi Ministériu Finansas, ezekuta ona millaun $8,5 hosi orsamentu finál millaun $56,4 (montante orsamentu finál ne’e inklui ona saldo tranzitadu hosi 2021 ho montante millaun $18,7).

Enkuantu Fundu Infraestrutura foin mak ezekuta millaun $18,7 ka 6% hosi orsamentu alokadu millaun $332,4.

Ba oin, Governu sei kontinua aselera prosesu aprovizionamentu no estabelese kontratu sira hodi hasa’e taxa ezekusaun liuliu iha Fundu Infraestrutura iha Segundu Semestre tambá komponente ne’e sei ajuda dudu kresimentu ekonómiku, kria empregu iha rai-laran no hadi’ak imajen nasaun liu hosi dezenvolvimentu infraestrutura estratéjiku sira.

𝗘𝘇𝗲𝗸𝘂𝘀𝗮𝘂𝗻 𝗢𝗝𝗘 𝟮𝟬𝟮𝟮 𝗥𝗔𝗘𝗢𝗔

Taxa ezekusaun reál OJE 2022 ba RAEOA to’o iha kinta-feira, 30 juñu 2022, atinji ona millaun $17,3 ka 19% husi totál orsamentu alokadu millaun $89,6.

Akompaña nafatin ami-nia pájina tambá iha tempu badak nia laran, ami sei atualiza Ita-Boot sira ho informasaun sobre detalla progresu ezekusaun OJE Retifikativu 2022 tuir Klasifikasaun Ekonómiku, Ezekusaun tuir Programa, kada Liña Ministériu, kada Munisípiu, no seluk tán.

Jornalista: Rogério Pereira Cárceres