Hatutan.com, (06 Jullu 2022), Díli- Prezidente Repúblika (PR), José Ramos-Horta, enkoraja no kompromete atu hamutuk ho Rede Feto hodi hapara ka hakotu violénsia hasoru feto no labarik feto sira.

Lee Mós : CAUCUS Dezafia SEII Foun Halo Advokasia Reativa Rede Referral

Ramos-Horta Hamutuk Ho Rede Feto Servisu Hakotu Violénsia Hasoru Feto. Foto/Hatutan.com

Prezidente Rede Feto Timor Leste, Zelia Fernandes haktuir mensajen Prezidente Repúblika nian ne’e hafoin hasoru malu ho Prezidente Repúblika, José Ramos-Horta iha Palásiu Prezidensial, Díli, Kuarta (06/07/2022).

Zelia Fernandes  hateten, Rede Feto Timor Leste nu’udár organizasaun mahon bá organizasaun membru 40 ne’ebé hala’o servisu iha área oin-oin, liuliu kona-bá asuntu direitu Feto no Labarik Feto. Tamba ne’e, liu husi reuniaun ida ne’e, Rede Feto aprezenta mós kona-bá progresu saida mak iha ona no mehi saida mak Rede Feto iha bá konstrusaun Estadu RDTL no mós kontribuisaun Rede Feto nian durante ne’e to’o iha ne’ebé ona.

“Rede Feto aprejenta mós difikuldade ka dezafiu sira ne’ebé Sekretariadu Rede Feto Timor Leste enfrenta fasilidade, rekursu umanus  no rekursu finanseiru,” Zelia Fernandes hateten.

Rede Feto Timor Leste nia membru 40 iha Timor-Leste servisu maka’as bá promove igualdade jéneru no haree bá lei kontra violénsia doméstika nian, maibé servisu asisténsia bá iha vitima violénsia bazeia bá jéneru no violénsia doméstika nian iha membru sira ne’ebé halo servisu besik liubá iha asuntu ida ne’e mak hanesan FOKUPERS nu’udár mós jestor bá uma mahon sira ne’ebé eziste iha Timor laran tomak.

Asuntu polítiku nian iha organizasaun membru Rede Feto ninian ne’ebé hala’o oinsá asegura partisipasaun feto nian iha polítika no mós ba iha foti desizaun ninian, advokásia ida ne’e mai kedas ona husi primeiru kongresu.

Prezidente Rede Feto ne’e hatutan ko’alia kona-bá empoderamentu ekonomia iha organizasaun lubuk ida, empoderamentu polítiku iha OPMT no mós organizasaun sira seluk hanesan Fundasaun Alola, FOKUPERS nafatin servisu hamutuk.

Bainhira Timor Leste hakarak atinji metas Igualidade Jéneru nian, presija reforsa mós asuntu ekonómia atu nune’e feto bele forte iha area ida ne’e.

Rede Feto Timor Leste simu kazu oin-oin husi feto vitima sira no mós labarik sira, transfere ka inkamina ba iha FOKUPERS ne’ebé haree ka foku liu ba asisténsia vitima feto no labarik feto sira tanba ne’e ohin mai la lori dadus ruma labele hatete dadus konkreta liu-liu entermus númeru maibé enkoraja imi bele hetan dadus atualiza kada loron husi FOKUPERS sira sempre iha dadus ida ne’e.

Númeru violensis domestika no violasaun hasoru feto no labarik feto sira kontinua aumenta, maibé iha parte ida Rede Feto haree katak sosiedade hahú sente katak violénsia hasoru feto no labarik feto ne’e lá’os ona problema uma laran, sira hahú hatene ida ne’e hanesan krime ida tanba ne’e mak keixa iha justisa formál mós kontinua sa’e ka boot. Tanba ne’e hanoin katak sosializasaun sira ne’ebé Rede Feto halo kontinua la’o nafatin atu nune’e bele enkoraja komunidade sira, sosiedade tomak atu bele brani hatete sai sa violénsia mak sira hasoru iha sira nia uma no sira nia komunidade inklui ninia kauza sira ne’ebé sira hasoru.

Jornalista: Vito Salvadór