Hatutan.com, (14 Jullu 2022), Díli-Bankada Partidu Demokrátiku (PD) iha Parlamentu Nasionál ‘nota’ katak Prezidente Repúblika (PR) José Ramos-Horta ho Primeiru-Ministru (PM), Taur Matan Ruak, hahú “rekonsilia” malu bá balansu polítika.

PR Horta ho PM Taur sae karreta hamutuk hodi halo viajen bá Ermera, Sábadu (09/07/2022). Foto/Espesiál

Xefe bankada PD, António da Conceiçao “Kalohan”, nota katak, Ramos-Horta ho Matan Ruak, hahú hatudu sinál rekonsiliasaun polítika bá povu ho nasaun bainhira sa’e hamutuk  iha karreta ida iha atividade viajen bá Munisípiu Ermera, Sábadu (09/07/2022).

Deputadu António da Conceição “Kalohan” louva ho ambiente ida ne’ebé mak foin lalais akontese entre Taur Matan Ruak ho José Ramos-Horta, sira ninia aktu sa’e hamutuk de’it iha karreta, hodi vizita ba populasaun sira iha Ermera.

“Depois de eleisaun  prezidensiál, komunikasaun polítika ne’ebé maka iha, hahú daudauk ona fó fila-fali esperansa foun. Ha’u elejia aktu ne’ebé maka señór primeiru ministru hola, foin daudauk hamutuk ho señór prezidente repúblika, iha karreta ida ne’e fahe  ona mensajen esperansa bá ita-nia populasaun. Ho prezensa señór prezidente do parlamentu nian, hamutuk ho Governu, hamutuk ho prezidente da repúblika, fó ona esperansa ida, atu ita sei iha futuru ida,” deputadu António da Conceição “Kalohan” hatete iha intervensaun polítika, durante diskusaun iha plenária estraordinária kona-bá nasaun iha Uma Fukun PN, Kinta (14/07/2022).

Hatán ba ida ne’e, Primeiru Ministru (PM), Taur Matan Ruak, dehan, foin ba dala-uluk, nia halo aktu ida ne’e, hodi sa’e karreta hamutuk ho PR Ramos-Horta.

Taur Matan Ruak mós sente  kontente liután tanba Parlamentu Nasionál halo aprovasaun bá viajen PR ninia vizita Estadu bá Repúblika Indonézia ho votu afavór 60.

“Ha’u sa’e karreta ho prezidente, ha’u primeira vez mak ha’u halo ida ne’e. No ha’u kontente loos, ha’u kontente liután, kuandu iha parlamentu vota bá viajen sua-exelénsia prezidente nian ho votu  60 afavór. Ne’e buat ida estra ordináriu. Mensajen saida mak ami hakarak fó, ami hakarak ami nia mensajen mak ida ne’e, menus konflitu, mais kooperasaun. Tanba ha’u mós halo parte, no ha’u esperiénsia durante períodu uitoan ne’ebé ha’u iha priviléjiu bá lidera Governu ida ne’e,” Primeiru Ministru, Taur Matan Ruak hateten.

Taur Matan Ruak sente laran moras, tanba bainhira nia sei prezidente repúblika, durante 2012 to’o 2017, la hetan priviléjiu hanesan ida ne’e. Maske nune’e, iha sira ninia vizita bá Ermera, akompaña no partisipa mós hosi Prezidente Parlamentu Nasionál (PPN), Aniceto Guterres.

Eis xefe estadu ne’e konta katak, uluk nia sei asume kna’ar nu’udár prezidente repúblika, sempre ho kritika maka’as bá nia maun Kay Rala Xanana ninia governasaun. Maibé nia la hanoin katak, to’o ida sei sai fali hanesan primeiru ministru.

“Ha’u lahatene, Maun Xanana halo hodi  depozita ha’u bá primeiru ministru hodi  koko ha’u karik. Ha’u lahatene, to’o agora ha’u sei hanoin hela. Maibé pelu faktu ha’u hetan ita-boot sira (deputadu) nia apoiu, para labele mate iha dalan, ne’e priviléjiu boot ida,” Taur Matan Ruak hateten ho hamnasa.

Jornalista: Rogério Pereira Cárceres