Hatutan.com, (14 Jullu 2022), Díli- Membru Comite Central FRETILIN (CCF) Segundu Jerasaun, Tenente Jenerál reformadu, Lere Anan Timur, deklara katak FRETILIN tenke manán eleisaun jerál 2023 no nia tenke okupa fatin ruma iha FRETILIN atu lori FRETILIN bá oin no hakuak povu tomak, lider polítiku sira ho mós partidu CNRT no lider karizmátiku Kay Rala Xanana Gusmão.

Lee Mós : Lere Husu Governu Kontrola Ajénsia Traballadór Prátika Trafiku Umanu

Membru Comite Central FRETILIN (CCF) Segundu Jerasaun, Tenente Jenerál reformadu, Lere Anan Timur. Foto/Hatutan.com

Tenente Jenerál reformadu, Lere Anan Timur bá jornalista sira, Kinta (14/07/2022),  hateten Partidu boot labele depende bá partidu ki’ik, ki’ik mak tenke depende ba boot, tanba se boot mak depende nafatin bá ki’ik ne’e hanoin katak luta bá ida-idak nia kadeira no luta bá ida-idak nia moris no la luta bá moris di’ak, ida ne’e maka nia esforsu atu avansa nu’udár servidór iha partidu FRETILIN iha kongresu nasionál partidu FRETILIN ne’ebé tuir ajenda sei akontese iha fulan-Setembru 2022.

“Ha’u seidauk deside atu forma ka la forma pakote ho se-se, maibé ha’u nia ambisaun no interese mak hakarak serví partidu FRETILIN, FRETILIN la’ós kualkér partidu tanba FRETILIN lulik,” Lere Anan Timur afirma tan.

Prezidente Repúblika (PR), José Ramos-Horta husu rasik ona Lere nia pozisaun oras ne’e oinsá, maibé Lere Anan Timur subliña nia prinsípiu bainhira reativa fila fali nu’udar militante bá FRETILIN no nu’udar membru segundu jerasaun CCF hakarak hadi’a partidu uainhira iha buat ruma naksala.

Lere afirma sei haforsa partidu atu manán eleisaun 2023 tamba prinsípiu harii partidu atu ukun la’ós tu’ur harii de’it.  Partidu nia ema mak servi partidu la’ós partidu mak serví nia kuadru sira tamba ohin loron interese ema ida-idak nian ás liu fali interese Estadu no nasaun nian.

 “FRETILIN iha responsabilidade moral no polítika hamutuk ho lider rezisténsia sira hotu lori nasaun ne’e ba naroman no moris di’ak no ema labele lori FRETILIN serví ninia interese pesoál, ne’e lulik,” Lere afirma.

Mensajen Prezidente Repúblika José Ramos Horta nian hanesan fundadór ASDT/FRETILIN nia mós preokupa ho vida Partidu FRETILIN nian no hanesan Xefe Estadu no Komandante Supremu Forsa Armada preokupa bá vida nasaun no mós dezenvolvimentu forsa armada nian.

“Nu’udar aman ba nasaun mensajen ne’ebé Xefe Estadu emfaze maka’as mak estabilidade nasionál no ida ne’e mak prinsipál,” Nia dehan.

Iha sorumutuk ho Xefe Estadu  ne’e ko’alia mós kona-bá relasaun armonia entre lider rezisténsia sira liu-liu  Xanana Gusmão, Ramos-Horta ho Marí  Alkatiri inklui mós Taur Matan Ruak.

Nia subliña katak foin daudauk maun boot Xanana fila husi ema nia rain ko’alia kona-ba Greater Sunrise husu bá matebian, rai lulik atu labele dada kadoras Greater Sunrise bá Austrália maibé líder sira ne’e atu resolve problema ne’e mak sai hanesan fatór internu determinante.

“Hanesan nasaun Timor Leste ita nia maun boot na’in tolu ka na’in haat mak aman bá nasaun sira tenke responsabiliza tanba sá mak joven sira barak mak bá ema nia rain tanba servisu laiha,” Lere Anan Timur afirma tan.

Jornalista: Vito Salvadór