Hatutan.com, (18 Jullu 2022), Díli—Ekipa konjunta Servisu Sekreta kompostu hosi Servisu Informasaun Polisia (SIP) Nasionál, Servisu Nasionál Intelijénsia (SNI) no Seksaun Investigasaun Kriminál Munisípiu Covalima, hala’o vijilánsia hodi kaptura timor-oan na’in-haat iha karreta ida hatama mina ilegál liu hosi fronteira Indonézia mai Timor-Leste, iha área tasi-ibun Salele, Aldeia Ai-Oan, Suku Lalawa Postu-Administrativu Tilomar, Munisípiu Covalima.

Ekipa konjunta SIP Nasionál, SNI no Seksaun Investigasaun Kriminál Munisípiu Covalima, hala’o vijilánsia hodi kaptura timor-oan na’in-haat iha karreta ida hatama mina ilegál liu hosi fronteira Indonézia mai Timor-Leste, iha área tasi-ibun Salele, Aldeia Ai-Oan, Suku Lalawa Postu-Administrativu Tilomar, Munisípiu Covalima (17/07/2022). Foto/PNTL.

Suspeitu timor-oan nain-haa ne’e ho naran inisiál, MA tinan 30, hela fatin Suai Vila, aldeia Sukavilaran, Suku Suai Loro, Postu-Administrativu Suai Vila, AN tinan 21, Aldeia Wetaba, Suku Beiseiuk, Posto-Administrativu Tilomar, FN tinan 17, hela iha aldeia Wetaba, Suku Beiseiuk, Posto-Administrativu Tilomar no suspeitu ne’ebé ho motór sai mata-dalan maka JC tinan 18, Aldeia Wetaba, Suku Beiseiuk, Posto-Administrativu Tilomar.

Lee Mós:UPF Detein Timor-oan Na’in-Haat Hatama Gazolina Ilegál

Prosesu kapturasaun ne’e kategoria hanesan “flagrante de lito” ba suspeitu na’in-haat iha Karreta laran ho marka Rava ho xapa matríkula 20.558 ne’ebé tula kombustível iha karreta laran inklui suspeitu ho motór honda Supra X 125 kor me’an ne’ebé sai mata-dalan iha prosesu transaksaun ilegál ne’e.

“Hafoin halo inkéritu, suspeitu sira deklara sai na’in ba mina ne’e ho naran inisiál AM tinan 26, hosi aldeia Ahinarai, Suku Debos ne’ebé pertense ba Postu-Administrativu Suai-Vila no nia sai hanesan Matadalan hodi observa situasaun durante transaksaun,” Hatutan.com sita komunikadu ne’ebé asesu ho data 17 Jullu 2022.

Agora daudaun suspeitu no objetu kontra bandu hirak ne’e asegura ona iha Komandu Munisipiu Covalima hodi kontinua halo prosesu investigasaun.

Joven Ida Hatama Motór Ilegál

Ekipa konjunta kaptura timor-oan mane ida ho naran inisial AG tinan 22, husi Suku Kasabauk ne’ebé hala’o transaksaun ilegál ba motór ida tipu Honda Sonic 150R, iha fronteira terestre Timor-Leste ho Indonézia (17/07/2022). Foto/PNTL.

Hafoin simu informasaun hosi fontes kredível, Polisia Nasionál Timor-Leste (PNTL), liuhosi Servisu Informasaun Polisia (SIP) Nasional no Munisipal junta hamutuk ho SNI Servisu Nasionál Intelijénsia (SNI) destakadu iha Munisípiu Covalima, kaptura timor-oan mane ida ho naran inisial AG tinan 22, husi Suku Kasabauk ne’ebé hala’o transaksaun ilegál ba motór ida tipu Honda Sonic 150R, iha fronteira terestre Timor-Leste ho Indonézia.

Suspeitu AG, ekipa konjunta halo vijilánsia durante oras haat nia laran no kaptura iha tuku 1:08 kalan, 17 jullu 2022, bainhira halo transaksaun iha tasi-ibun aldeia Ai-Oan, Suku Lalawa Postu-Administrativu Tilomar, Munisipiu Covalima.

Iha prosesu identifikasaun suspeitu AG deklara, nia sosa motór ne’e hosi Indonézia ho montante osan $900 no modus operandi ne’ebé sira uza maka tula hosi Rô jhonson mai hatun iha tasi-ibun Lagoa Maria maka nia ba simu rasik iha hodi mai rai maran.

Oras-ne’e daudaun ekipa konjunta entrega ona evidénsia no suspeitu AG ba iha Servisu Investigasaun Kriminál (SIK) Munisipiu Covalima, hodi kontinua halo prosesu investigasaun.

Asegura Mina Ilegál Masa 19

Iha 15 jullu 2022 tuku 13h07, Membru Servisu Intelijénsia hosi Komandu UPF, Kompañia Bravo -Suai, hala’o atividade vizilánsia la’o-ain iha área Lo’akabas parte Postu Moruk-Laran no Postu Wesei nia klaran no identifika atividade transaksaun ilegál ba kombustível. Foto/PNTL.

Antes ne’e iha 15 jullu 2022 tuku 13h07, Membru Servisu Intelijénsia hosi Komandu UPF, Kompañia Bravo -Suai, hala’o atividade vizilánsia la’o-ain iha área Lo’akabas parte Postu Moruk-Laran no Postu Wesei nia klaran no identifika atividade transaksaun ilegál ba kombustível.

Iha situasaun ne’e, membru sekreta bolu apoiu ba Komandante Kompañia Bravo hodi mai halo atuasaun ba atividade ilegál ne’e.

Bainhira ekipa apoiu to’o iha fatin akontesimentu, komunidade sira konsege halai  so’e hela sasan no ekipa halo aprensaun ba kombustivel tipu Gazolina masa 35 ltr  iha masa 18 no Gazoel masa ida.

Ekipa mós tula kedan evidénsia sira hodi asegura iha kompañia Bravo-Suai no kontinua buka-tuir autór sira ne’e.

Jornalista: Rogerio Pereira Carceres