Hatutan.com, (18 Jullu 2022), Díli-Iha Kuarta liubá, (06/07/2022), ekipa fiskalizasaun konjunta kompostu hosi Comissão Função Públika (KFP), Comissão Anti Corrupção (CAC), Provedória dos Direitos Humanos e Justiça (PDHJ), ho Inspesaun Jerál Estadu nian (IJE), hala’o inspesaun direta bá Comissão Nacional de Aprovisionamento (CNA).

Lee Mós :  Funsionáriu Na’in-38 iha CNA Nomeia De’it Hosi MF

Ministru Finansas, Rui Augusto Gomes. Foto/MF.

Iha inspesaun no fiskalizasaun ne’e, ekipa konjunta deteta katak iha funsionáriu hamutuk na’in-38 mak nomeia ‘de’it’ hosi Ministru Finansa (MF), Rui Augusto Gomes, ne’ebé mak la kumpre bá prosedimentu sira administrativu nian iha Rejime Jerál Funsaun Públika nian.

Funsionáriu sira ne’e, na’in-rua (2) assume pozisaun nu’udár kargu xefia ka ezekutivu hodi lidera CNA, funsionáriu ida (1) destaka duni iha MF, no sira na’in 35 seluk, nu’udár funsionáriu baibain hodi servisu iha CNA, Balide, Dili.

Advertisement

Maske nune’e, Ministru Finansa (MF), Rui Augusto Gomes, esklarese katak, funsionáriu sira ne’e, la’ós halo fali nomeasaun, maibé nia delega ‘de’it’ ‘ninia ema’ ruma hodi bele lidera instituisaun estadu hanesan Comissão Nacional de Aprovizionamento (CNA).

“Saida mak Ministru das Finansas halo, halo delegasaun de kompeténsia, la’ós nomeasaun. La hanesan, ne’e ka. Delegasaun de kompeténsia ne’e, iha korredór lei. Ha’u la nomeia diretór, ha’u delega kompeténsia ministru nian bá ema ne’ebé atu halo, toma konta bá unidade sira ne’e,” Ministru Finansa (MF), Rui Augusto Gomes, hateten ba jornalista sira, hafoin aprezentasaun dokumentu importante balu ba Primeiru Ministru (PM), Taur Matan Ruak, iha Palásiu Governu, Dili, Segunda (18/07/2022).

Hatán kona-bá tuir lei Funsaun Públika, sidadaun ne’ebé mak hetan fiar atu lidera iha instituisaun direta sira hanesan CNA, tenke mai funsionáriu públiku no funsionáriu permanente, ka la’ós sidadaun baibain, Rui Gomes dehan, nia la halo nomeasaun ruma, maibé delega ‘de’it’, tanba lei fó dalan.

“Sim-sim, ha’u la nomeia, ha’u delega. Delegasaun de kompeténsia ne’e, lei fó dalan,” Ministru Finansa (MF), Rui Augusto Gomes argumenta tan.

Hafoin fiskalizasaun iha CNA, Komisáriu CFP, António Freitas hateten, molok nomeiasaun ne’e akontese, ministru finansa rasik hato’o duni karta rekoñesimentu ida bá CFP atu bele husu autorizasaun. Infelizmente, CFP rasik rejeita ka la konkorda dala-rua atu desizaun bá nomeasaun ne’e akontese.

Advertisement

Tuir lei, ema ka sidadaun ne’ebé mak atu lidera iha instituisaun direta sira hanesan CNA, tenke funsionáriu públiku no permantente. La’ós ajente, no la’ós funsionáriu ho tipu kazuál.

“CFP preokupa uitoan situasaun iha CNA nian ne’e, tanba ami halo korrespondénsia dala-rua ona, para husu bá ita nia sua-exelénsia ministru finansas, para atu bele esplika servisu ida ne’e. Maibé defaktu ami la resposta kona-bá karta delegasaun ka kompeténsia bá koordenadór sira, inklui diretór CAN, Hermingaldo Albano Soares, maibé, CFP antes ne’e rejeita kargu ida ne’e,” Komisáriu António Freitas hateten.

Jornalista: Rogério Pereira Cárceres    

Advertisement