Hatutan.com, (20 Jullu 2022), Jakarta- Organizasaun Islamiku Muhammadiyah iha kompromisu  boot hodi apoia adezaun Timor-Leste nian bá Assosiation Souteast Asian Nations (ASEAN).

Lee Mós : Ramos-Horta Perkuat Hubungan Persahabatan Dengan NU dan Muhammadiyah

Prezidente Muhammadiyah, Haedar Nashir, simu prezensa Prezidente Repúblika Timor-Leste, José Ramos-Horta iha sekretariadu Muhammadiyah nian iha Jakarta, Kuarta (20/07/2022). Foto/Hatutan.com

Hafoin simu vizita kortezia Prezidente Repúblika Timor-Leste, José Ramos-Horta iha sekretariadu Muhammadiyah  nian iha Jakarta, Kuarta (20/07/2022), prezidente  Muhammadiyah, Haedar Nashir, afirma Muhammadiyah ho Ramos-Horta fahe hanoin kona-bá relasaun amizade Indonézia ho Timor-Leste, ne’ebé besik tebetebes hanesan maun-alin, liuliu iha entermu kultura ne’ebé kuaze hanesan.

Muhammadiyah apoia tebes Timor-Leste atu sai lalais membru ASEAN hanesan mós ho apoiu husi Prezidente Repúblika Indonézia Joko Widodo atu loron ida Timor-Leste sai membru ASEAN.

“Ami afirma Muhammadiyah nia apoiu bá Timor-Leste atu sai membru ofisiál bá ASEAN,” Haedar Nashir hateten.

Nia esplika Muhammadiyah durante ne’e hala’o mos servisu umanitáriu sira ne’ebé iha ligasaun iha área edukasaun no saúde no umanidade. Tamba ne’e, Muhammadiyah hanoin katak ho Prezidente Repúblika Timor-Leste, José Ramos-Horta nia opiniaun no apoiu sira bolu mós atensaun bá kestaun sira kona-ba pás no umanidade iha nivel global.

“Ami hein katak iha futuru ami mós bele loke ramu Muhammadiyah ida iha Timor-Leste no loke instituisaun edukasaun ida ne’ebé bele tulun mós Governu Timor-Leste ba promove pás no valores umanu sira seluk,” Nia hateten.

Prezidente Muhammadiyah ne’e ko’alia  ona ho Prezidente Republika Timor-Leste preokupasaun sira konaba valór umanu, multikultural, pluralizmu no modernizasaun hodi kontinua hametin relasaun bilateral nasaun-rua no liuliu lori pás no estabilidade entre sidadaun sira iha rai-rua ne’e.

Jornalista: Vito Salvadór