Hatutan.com, (27 Jullu 2022), Díli—Polísia Nasionál Timor-Leste (PNTL), liuhosi Servisu Informasaun Polísia (SIP) hosi nasionál, halo kapturasaun ba suspeitu mane na’in-tolu ho naran inisiál AJG tinan 20, hela iha Matadouro, LRF hela iha Fomento 1 no FCM Estudante ho kategoria minoridade hela iha Becora.

Polísia Nasionál Timor-Leste (PNTL), liuhosi Servisu Informasaun Polísia (SIP) hosi nasionál, halo kapturasaun ba suspeitu mane na’in-tolu ho naran inisiál AJG tinan 20, hela iha Matadouro, LRF hela iha Fomento 1 no FCM Estudante ho kategoria minoridade hela iha Becora, ne’ebé konsidera envolve iha krime públiku ba kazu na’ok no hadau komunidade nia telefone iha Kapitál Díli . Foto/PNTL.

“Suspeitu na’in tolu ne’e  konsidera  envolve iha krime públiku ba kazu na’ok no hadau komunidade nia telefone iha Kapitál Díli,” Hatutan.com sita komunikadu iha Kuarta (27/07/2022).

Lee Mós:SIP Kaptura Autór Harahun Vidru Karreta no Foti Laptop

Hafoin halo vizilánsia durante oras ualu nia laran hosi dader to’o 12:35, SIP nasionál deteta uluk suspeitu AJG ho LRF no tenta halai, maibé membru SIP duni-tuir no konsege kaptura uluk LRF iha área Matadouro.

Iha horas 13:00, ekipa hamutuk ho suspeitu LRF buka-tuir hodi kaptura tan suspeitu AJG iha área Matadouro no foti mós evidénsia motór ida ho marka Honda Beat, koor metan azul xapa matrikula laiha ne’ebé sira uza hodi hadau telefone.

Iha prosesu identifikasaun suspeitu AJG deklara katak, iha semana kotuk nia hamutuk ho nia kolega ida ho naran FCM hela fatin iha Becora, hadau telefone ho marka Samsung Galaxi A02 kor metan bainhira telefone na’in kondúz hela motór iha área Fatuhada-Comoro, besik Warung Sate kambing nia oin.

Suspeitu AJG mós deklara telefone ne’e nia fa’an ona ba negosiante ida naran Marcelino de Jesus Guterres iha Matadouro ho folin $70, nune’e ekuipa SIP hamutuk ho suspeitu ba foti fali telefone refere inklui nia maluk LRF iha área Becora.

Relasiona ho akontesimentu ne’e suspeitu sira deklara la’os foin mak halo asaun na’ok ne’e maibé beibeik ona hahú hosi tinan 2019 hamutuk ho nia kolega seluk ne’ebé tama ona iha tarjetu SIP nasionál nian hodi buka-tuir suspeitu seluk tán ba kazu na’ok motór.

Hafoin halo identifikasaun Ekuipa SIP lori  ona suspeitu na’in-tolu inklui evidénsia telefone rua ho motorizada-ida ba iha Seksaun Investigasaun Kriminál, Eskuadra PNTL Dom-Aleixo Comoro hodi kontinua Prosesu investigasaun.

Jornalista: Rogério Pereira Cárceres