Hatutan.com, (10 Agostu 2022), Díli—Hafoin simu orientasaun hosi Xefe Servisu Informasaun Polísia (SIP) Nasionál hamutuk ho Servisu Nasional Intelijensia(SNI) hodi buka-tuir autór sira ba krime públiku, ekipa servisu sekreta konsege asegura tán joven na’in-lima ne’ebé involve iha kazu na’ok motór ida lakon iha loron 06 Agostu 2022, iha aldeia Boulok Fugira, Suku Dare, Postu Administrativu Vera-Cruz, Munisipiu Díli.

Joven na’in lima ne’ebé SIP Nasionál ho SNI asegura tanba involve iha kazu na’ok motór ida lakon iha loron 06 Agostu 2022, iha aldeia Boulok Fugira, Suku Dare, Postu Administrativu Vera-Cruz, Munisipiu Díli.Foto/PNTL.

Inisia iha tuku 21:00 kalan, ekipa Servisu rekolla uluk informasaun iha fatin akontesimentu motór lakon no konsege identifika uluk suspeitu na’in-tolu ho naran inisiál MP tinan 22, hela iha Dare, CS tinan 21 hela iha Lahane Osidentál, no AT tinan 23 hela iha Lahane Osidentál, lori mai iha edifísiu SIPN hodi halo Identifikasaun.

Lee Mós: PNTL Díli Detein Joven Na’in-tolu Sa’e Motór Ida Laiha Xapa Matríkula

“Iha prosesu identifikasaun, suspeitu sira koopera di’ak hodi deklara katak motór ne’e suspeitu na’in-rua seluk ho naran MF alias MM tinan 27 no LC tinan 29 no sira na’in-rua hela iha Suku Mascarenhas, ne’ebé halo knaar hodi fa’an motór ba JAF iha Postu-Administrativu Lekidoe, Munisipiu Aileu,” Hatutan.com sita komunikadu.

Hafoin rona deklarasaun, ekipa SIP Nasionál hamutuk ho suspeitu sira ba kedan Liquidoe hodi hatudu fatin no to’o iha dalan klaran konsege kaptura suspeitu na’in-rua iha tuku 12:27 hamutuk ho evidénsia motór rua marka Honda Revo Fit, ho númeru polisia G.4823 no E.7321 iha aldea Deluhati, Suku Fahisoi, Postu-Administrativu Remexio, Munisipiu Aileu.

Suspeitu MF deklara nia an ho nia maluk ida naran JAF mak na’ok motór no fa’an ona ba ema ida ho naran JA iha Lequidoe ho folin $300, maibé fó uluk osan ho montante $100.

Ho deklarasaun hirak ne’e, ekipa SIP Nasionál ba kedan Lequidoe no foti fali motór ne’e iha JA nia rezidénsia ne’ebé lokaliza iha aldea Maukornamo, Suku Namolesu, Postu Leqidoe, Munisipiu Aileu.

Maibé, suspeitu JAF konsege halai no ekipa servisu mós buka-tuir nafatin tanba nia nu’udár autór prinsipál ba kazu na’ok motór refere.

Hafoin konklui prosesu identifikasaun, SIPN ho SNI halo kedan auto entrega suspeitu na’in-lima ba Servisu Investigasaun Kriminál Nasionál hodi asegura iha Komandu PNTL Munisipiu Díli no halo detensaun durante oras 72 no sei kontinua halo prosesu investigasaun.

Jornalista: Rogério Pereira Cárceres