Hatutan.com, (11 Agostu 2022), Díli—Comissão Anti Corrupção (CAC) termina ona investigasaun hodi remese no submete ona relatóriu investigasaun ba Ministériu Públiku (MP) relasiona ho kazu krime abuzu de poder no partisipasaun ekonomia iha negósiu ne’ebé deskonfia involve Adjuntu Prezidente Autoridade Rejiaun Administrativa Espesiál Oecusse Ambeno (RAEOA) ho inisiál MN.

Ekipa Investigadór Comissåo Anti-Corrupcão (CAC) tutelár ba operasaun, ezekuta mandadu buska no apreensaun Tribunál Distritál Oecusse, Kinta (20/01) ofisialmente entrega objetu apreensaun ne’ebé hala’o iha loron Tersa (18/01), ba prokuradór tutelár liu hosi ofisiál justisa iha edifísiu Prokuradór Distritál Oecusse, Pante Makassar. Foto/CAC.

“Investigasaun termina ona no relatóriu remesa ona ba MP,” Diretór Investigasaun CAC, José Verdiál ba Hatutan.com via WhatShap, Kinta (11/08/2022).

Lee Mós: Kazu Abuzu Podér iha RAEOA Iha Faze Relatóriu Finál

Hosi kazu ne’e, CAC konklui kedan arguidu na’in-rua ne’ebé involve direta iha kazu ne’e bazeia ba rezultadu investigasaun no provas dokumentál, inklui depoitmentu sasin hamutuk 10-resin.

Antes ne’e, iha loron 18 fulan-Janeiru 2022, Ekipa Investigadór CAC nian lidera hosi Diretór Investigasaun Kriminál (UIK), Emílio Quintas, akompaña hosi Polísia Nasionál Servisu Investigasaun Kriminál (PNSIK) ezekuta no asegura mandadu Tribunál RAEOA ho númeru NUC 0057/21.PDOEC loron 17/12/2021.

Mandadu ne’e hasai hosi juiz Yudi Pamungkas fó podér ba investigadór CAC hodi halo operasaun buska no apreensaun ba suspeitu diretór emprezáriu na’in-ida, hanesan mós subriñu hosi suspeitu seluk nu’udár Jerente Seniór RAEOA/ZEESM ho inisiál MN ho ninia espoza hanesan co-autór ne’ebé posibilidade bele sai suspeitu, tanba deskonfia involve iha kazu krime korrupsaun.

Mandadu ba buska iha domisiliáriu no prende sasán ne’e, juiz haruka no fó órden atu halo buska iha domisiliáriu ho posibilidade ba prende sasán ne’ebé mak iha ligasaun ho faktu hirak ne’ebé investiga ona, tuir dispozisaun iha art 37 no nú 2, hosi KRTL, iha artigu 226 no 1, al. c) artigu 108 no 1 artigu 170, hotu-hotu hosi KPP ba suspeitu ninian hela fatin.

Ba kumprimentu efetivu ba mandadu ida-ne’e, iha autorizasaun ba asesu iha dependénsia hotu-hotu, inklui kofre, fatin hirak rai sasán nian, veíkulu hirak ne’ebé uza hosi suspeitu, bele fera odamatan, hakat sai hosi moru no neutraliza animál sira, se presija duni ho observánsia ba dispozisaun iha artigu 169 no 170 hosi KPPTL.

Iha operasaun buska domisiliáriu no apreensaun ne’e, investigadór CAC halibur dokumentu lubun boot; konta bankária, osan cash ho montante boot, dokumentu kompañia nian, telefone no dokumentu sobre projetu eletrifikasaun, no projetu balun iha RAEOA/ZEEMS ne’ebé suspeitu ho ninian espoza nian kompañia manán nu’udár evidénsia no objetivu krime.

Kazu ne’e rasik hetan delegasaun kompeténsia hosi Prokuradór Distritál Oé-Cusse hodi fó delegasaun ba investigadór CAC tuir podér lei hodi halo prosesu investigasaun ho kuidadozu hanesan rona sasin sira, halibur dokumentu no halo survelénsia ba iha intervenenti prosesuál liu-liu arguidu nian bens sira.

Jornalista: Carmelita Isaac