Hatutan.com, (13 Agostu 2022), Díli-Partido Sociálista de Timor (PST), oras ne’e daudaun, hahú halo movimentasaun polítika iha nivel komunidade no sosiedade, hodi kondús no promove formasaun  kultura debate polítika ideolójika bá kuadru polítika no juventude sira.

Prezidente PST, Avelino Maria Coelho da Silva, halo diskursu iha ámbitu konferénsia no debate ida ho tema sentrál “A ideologia orienta a acção, a acção liberta o homen e a mulher”, Sábadu (13/08/2022). Foto/Hatutan.com

Iha Sábadu (13/08/2022), partidu ho ideolojia eskerda ne’e liuhosi Departamento de Orientação Politica ideológica Centro Formação Politica-Ideológica “Akita Tama-Laka”, organiza eventu konferénsia no debate ida ho tema sentrál “A ideologia orienta a acção, a acção liberta o homen e a mulher”

Prezidente PST, Avelino Maria Coelho da Silva, hateten eventu ne’e realiza tanba PST instala tiha ona ninia sentru formasaun polítika ideolójika “Akita Tama-Laka”, oinsá mak bele fasilita formasaun bá juventude sira hodi iha kultura debate. Maibé, sentru formasaun ne’e rasik, la halo formasaun klase ka laiha aula.

“Formasaun de debates ne’e, hanesan ohin ne’e, ami ko’alia, joven sira halo pergunta, debates, para orienta ona ita-nia pensamentu polítika ideolójiku. Tanba sá, atu muda nasaun ida ne’e, ita rona ema hothotu halerik, ami bee laiha, ami ahi laiha, ida ne’e la di’ak, ida ne’ebá ladi’ak. Sasán folin iha ne’e, ema li’ur okupa hotu, no problema hothotu ne’ebé mak mosu, tanba polítika ne’ebé mak sala,” Avelino Maria Coelho da Silva, hateten ba jornalista sira, hafoin konferénsia  ho tema “A ideologia orienta a acção, a acção liberta o homen e a mulher”, iha Salaun CNE, Caicoli, Díli.

Advertisement

Avelino dehan, polítika hirak ne’e sala, mai hosi ema ka partidu sira ne’ebé mak povu fó konfiansa bá sira, liuhosi votu iha eleisaun. No la’ós kulpa fali bá ema ida ne’ebé la hetan podér.

Prezidente PST ne’e nota katak, durante tinan hira ne’e akontese impase polítika no sé mak bele muda polítika sira ne’e, tenke ema ne’ebé iha koñesimentu no tenke ema ne’ebé iha vizaun ideolójiku polítika.

“Entaun, konferénsia ida ohin ne’e, para konferénsia de debates, PST nia hanoin, joven sira ne’e diskute, tenke haree bá oin,” Avelino Coelho afirma tán.

Konferénsia ne’ebé hala’o ne’e, sai hanesan mós  parte hosi preparativus sira PST nian hodi hasoru eleisaun parlamentár 2023, tanba hanesan organizasaun partidária, tenke preparadu duni juventude sira, atu bele sai kuadru di’ak ida futuru.

Maske nune’e, la’ós obrigatóriu atu vota bá PST, tanba depende bá joven sira, partidu aprezenta nia vizaun jerál, partidu hakarak prepara joven atu bá ukun.

Advertisement

Tuir Avelino Coelho, atu liberta povu, ema ida tenke iha koñesimentu sientífiku, nu’udár joven, nia tenke hatene uza lei kona-bá dezenvolvimentu sosiál nian, atu nune’e nia bele muda nasaun.

Prezidente PST ne’e dehan, atu muda lei, muda Estadu, no muda polítika, tenke iha ema ne’ebé mak matenek. Maibé, nia dalan mak tenke liuhosi eleisaun. Bainhira partidu ida hetan maioria parlamentár ka iha dois tarços.

Jornalista: Rogério Pereira Cárceres 

Advertisement