Hatutan.com, (15 Agostu 2022), Díli—Prezidente Repúblika (PR), José Ramos-Horta apela ba autiridade lokál no autoridade munisipál sira atu servisu makas hodi halo sosializasaun no sensibilizasaun ba komunidade iha baze nune’e partisipa máximu iha sensu uma-ka’in 2022.

Prezidente Repúblika (PR), José Ramos-Horta. Foto/Hatutan.com.

Xefe Estadu husu ne’e tanba Sensu ne’e importante tebe-tebes hanesan eleisaun tinan kada lima laiha rai ka mundu ne’ebé la halo.

Lee Mós:Implementasaun Sensu Populasaun no Uma-Ka’in 2022 ho Millaun $3,1

Tanba sensu ne’e baze importante tebe-tebes atu governu, ema hotu-hotu, parseiru internasionál sira, akadémiku, jornalista, estudante sira hatene loloos letratu sosiál, letratu umanu, polítiku rai ne’e ninian.

Advertisement

Sensu populasaun no uma-ka’in fó baze atu governu bele halo planefikasaun didi’ak, fó resposta ba dezafiu ne’ebé rai ne’e enfrenta.

“Ha’u apela ba Xefe aldeia, Xefe Suku, Prezidente Munisípiu atu kontribui halo sensibilizasaun no sosializasaun atu hotu-hotu partisipa. Ita hatene iha ita nia sosiadade familia balun sira lakohi fó hatene sai buat hotu-hotu sira iha. Tendénsia atu hateten menus, tanba sira tauk hateten iha karau 20, depois la simu ajuda karik hateten ha’u laiha buat ida, laiha karau, laiha bibi, uma ne’e at loos, imi haree ba ne’e nia espera bele simu ajuda ruma karik ita iha esperénsia ida ne’e,” José Ramos-Horta hateten iha lansamentu sensus populasaun no uma-ka’in 2022, iha CCD, Segunda (15/08/2022).

Sensus la’ós deit atu define ema hira, maibé nu’udár baze atu governu bele haree loloos oinsá atu ajuda halo polítika dezenvolvementu hahú kedan ho kosok oan sira, inan to’o adultu ferik katuas sira.

“Ha’u husu ba ita hotu-hotu atu kontribui fó dadus loloos, fó resposta loloos ba ajente sira ne’ebé halo perguntas ne’e, depois ita sei haree nia rezultadu, estastestika balun ita haree tinan sira nia laran ne’e loos duni ka la’e, kooresponde duni ba realidade sosiál ekonómika Timor nian ka la’e,” nia husu.

Xefe Estadu ne’e hatutan ho sensu populasaun no uma-ka’in 2022, governu no parseiru internasionál sira servisu hamutuk bele hadia di’ak liu tan dezenvolvementu ba rai ida ne’e nian

Advertisement

Sensus populasaun no uma kain Importante tebe-tebes, Timor Leste atu tama ba ASEAN, realidade ida ne’e besik ona, entaun tenke fornese mós ba parseiru sira ASEAN dadus ne’ebé bele hateten siéntifiku, ne’ebé loos duni, estastestika labele manipula, estatistika labele bosok, estatistika tenke kredível 100,% ne’e duni povu tenke partisipa iha sensus ida-ne’e.

Jornalista: Vito Salvadór