Hatutan.com, (24 Agostu 2022), Díli—Embaixadora Timor-Leste ba Vatikanu, Juvita Rodrigues B. Ataide Gonçalves hamutuk ho komunidade timoroan iha Itália (COMTIL) simu Arsebispu Arkedioseze Metropolitana Díli, Dom Virgílio do Carmo da Silva SDB ho delegasaun iha aeroportu Aeroportu Internasionál Leonardo da Vinci.

Embaixadora Timor-Leste ba Vatikanu, Juvita Rodrigues B. Ataide Gonçalves hamutuk ho komunidade timoroan iha Itália (COMTIL) simu Arsebispu Arkedioseze Metropolitana Díli, Dom Virgílio do Carmo da Silva SDB ho delegasaun iha aeroportu Aeroportu Internasionál Leonardo da Vinci, Kuarta (23/08/2022). Foto/Média PR.

Delegasaun ne’ebé akompaña Arsebispu ba Roma-Itália mak hanesan ekonomatu Arkedioseze Metropolitana Díli Padre Ivo Martins Hi da Silva no delegasaun hosi Parlamentu Nasionál (PN) xefia hosi vise Prezidente PN Angelina Sarmento hamutuk ho Deputadu Luis Roberto no Lídia Martins to’o iha Kuarta, iha Aeroportu Internasionál Leonardo da Vinci iha tuku 01:25 oras Roma-Itália.

Lee Mós: Xanana nia Ajenda Hanesan Enviadu Espesiál Estraordináriu Durante iha Roma

Embaixadora Timor-Leste ba Vatikano, Juvita Rodrigues B. Ataide Gonçalves hato’o benvindu bá arsebispu Arkedioseze Metropolitana Díli no ho orgullu nia dehan Embaixada TL hamutuk ho komunidade Timoroan sira bele simu Amu Bispu hamutuk ho deputadu sira hodi hala’o viazen hosi Timor-Leste to’o Italia, atu hein prosesu investidura ba Kardeál dahuluk Timor-Leste nian.

“Agradese no orgullu tanba arsebispu ho delegasaun bele to’o Vatikanu ho di’ak hodi hein serimónia investidura ba Kardeal,” Hatutan.com sita deklarasaun Juvita Rodrigues B. Ataide Gonçalves iha komunikadu.

Reprezentante Madre Kongregasaun SSpS, Joana Soares hamutuk ho komunidade Timoroan sira sente orgullu, tanba bele halo preparasaun hodi simu D.Virgilio ho delegasaun ho atividade simples tara tais no entrega ai-funan fresku.

“Ami reprezenta Timoroan tomak organiza hamutuk ho ita nia Embaixadora ho orgullu hodi reprezenta Timoroan tomak ne’ebé hela iha Europa liu-liu iha Itália, ho domin boot hato’o ami nia Benvindu ba Amu Bispu, tanba agora ami sente la mesak agora mai hamutuk ho ita iha Italia,” Madre  Joana Soares hateten.

D.Virgílio do Carmo da Silva hato’o mós agradesimentu ba preparasaun hosi Embaixada Timor-Leste iha Vatikanu hamutuk ho Timoroan sira hodi simu nia ho delegasaun iha Aeroportu.

“Ha’u agradese ba imi nia preprasaun tomak hodi simu viazen ida-ne’e, ha’u hato’o de’it ba ita hotu  agradese ba Nai Maromak nia planu furak sira ba ita nia rain Timor-Leste,”Arsebispu hateten.

Hosi Aeroportu, ekipa akompaña Arsebispu kontinua ba hela iha rezidénsia Kaza de Santa Marta iha Vatikanu.

D.Virgílio sei simu investidura hosi Papa Francisco sai Kardeál dahuluk Timor-Leste nian iha loron 27 fulan Agostu, nu’udár prezente furak ida hosi Papa Francisco, hodi fó orgullu ba povu Timor-Leste ne’ebé maioria nu’udár sarani Katálika iha rejiaun ASEAN.

D.Virgílio sei hela hamutuk ho bispu na’in-21 seluk kompostu hosi kandidatu Kardeál foun na’in-ualu (8) hosi Europa, neen (6) hosi Ázia, rua (2) hosi Áfrika, ida (1) hosi Amérika Norte, haat (4) hosi Amérika Sentrál no Latina Amérika nian sei hela hamutuk hodi prepara hamutuk serimonia kriasaun ba sai Kardeál foun iha Basilika São Pedro Vatikanu.

Jornalista: Vito Salvadór