Hatutan.com, (08 Setembru 2022), Díli—Kongresu Partidu Frente Revolucionário do Timorense Independente (FRETILIN) ba dá-limak, atu hametin nasionalizmu no patriotizmu iha Estadu Direitu demokratiku hodi liberta povu hosi ki’ak no mukit.

Prezidente FRETILIN, Francisco Guterres Lú Olo akompaña hosi Sekretáriu Jerál Mari Alkatiri hamutuk ho konvidadu sira inklui Primeiru Ministru loke kongresu da-V ne’ebé hala’o iha CCD, Kinta (08/09/2022). Foto/Elio dos Santos da Costa.

“Tema ‘Lori Naroman ba Povu’ atu hamoris hikas prinsípiu no valores ne’ebé FRETILIN hametin no haburas hodi hatudu nasionalizmu no patriotizmu, hamutuk iha forsa polítika ida hodi liberta povu hosi mukit no ki’ak. Delegadu sira sei hili líder nasionál partidu nian no hili mós pessoa importante sira ba partidu atu bele hamoris partidu sai boot liután,” Prezidente FRETILIN, Francisco Guterres Lú Olo  hateten ba delegadu sira iha kongresu da-V ne’ebé hala’o iha CCD, Kinta (08/09/2022).

Lee Mós:Lere Hakarak “Avansa” Ho Jerasaun Foun iha Kongresu FRETILIN

FRETELIN iha nia istória pasada ne’ebé nakonu ho sakrifísiu, hadi’a no hala’o re-organizasaun  iha rezisténsia armada liu hosi difikuldade oi-oin maibé FRETILIN  kontinua hamrik metin tanba simu legadu ida boot hosi erói no mártir sira atu liberta povu ida ne’e hosi ki’ak no mukit.

FRETILIN nia patrimóniu istóriku to’o ohin loron sei nafatin valoriza, hodi kaer metin prinsípiu no valór sira ho karakter atu halibur povu tomak no liberta povu hosi ki’ak no mukit, nune’e iha kongresu da-V, FRETILIN komunga konseitu ida atu lori naroman ba povu.

“Delegadu sira ohin ita iha kongresu ida ne’e, há’u fiar katak kamarada sira hotu hosi munisípiu ho espíritu demokratiku, konstrutivu atu diskute di’ak liután matéria sira ne’ebé sei aprezenta iha kongresu ho vizaun ida atu konsentra no fo liman ba malu atu hakat hamutuk nafatin hasoru eventu boot sira ne’ebé sei mai,” Lú Olo hateten.

FRETILIN tenke unidu atu hasoru dezafiu sira ne’ebé sei mai, ne’e duni kongresista sira mai hamutuk hahi istória FRETILIN nian hodi hadi’a no hametin di’ak liután partidu ne’e.

Kongresu nasionál ne’e prepara hosi Komisaun Nasionál Preparasaun no Organizasaun (KNPO), tuir desizaun, 19 Setembru 2021 CPN, no Deliberasaun CCF N° 03/CCF/2021, 25 setembru, elabora no aprezenta ba Komité Sentrál FRETILIN ba aprova, Rejimentu Kongresu Nasionál ba da-V.

Kongresu ne’e sei hala’o durante loron tolu hahú hosi 08 to’o 10 Setemru 2022 no hetan partisipasaun másimu hosi delegadu no delegada sira hosi munisipiu 12 inklui RAEOA ho totál 992 ho observadór na’in 197.

Nune’e mós Prezidente Partidu Libertasaun Popular (PLP) atuál Primeiru Ministru (PM), Taur Matan Ruak hateten partidu FRETILIN desde hahú to’o ohin loron iha lider ne’ebé forte no nakonu ho jerasaun lutador, persistente no la rejiste.

Tinan 48 ezisténsia partidu FRETILIN, ohin sai momentu ida importante no priviléjiu tanba bele hato’o nia diskursu iha ambitu konferênsia nasionál partidu FRETILIN nian.

Durante nia vida, Taur Matan Ruak servisu tinan 12 ba FRETILIN no tinan 14 nia laran servisu ho FRETILIN.

“Ha’u rai rekordasaun sira di’ak hamutuk ho líder sira primeira no segunda jerasaun Partidu FRETILIN nian no lori sira mak Timor-Leste afirma nia an hanesan nasaun no povu,” Taur Matan Ruak hateten.

Iha primeira jerasaun sira FRETILIN nian mak jerasaun sira lutadór, persiste no la rejiste. Iha kada istória jerasaun sira FRETILIN nian rejubinese, purifika no konsolida hodi la’o ba oin la interese dezafiu saida de’it mak sira sei hasoru.

Iha tinan 20 nia laran hafoin Timor-Leste restaura nia indepedénsia timoroan hamutuk halo ona buat barak hodi hametin paz no demokrasia.

“Timor-Leste nia destinu iha partidu boot sira nia liman hanesan FRETILIN ho CNRT, maibé labele haluhan mós ho partidu kiik sira, tanba ne’e hanesan sidadaun saida mak ema ida bele kontribui ba nasaun,” nia dehan.

Jornalista: Vito Salvadór