Hatutan.com, (09 Setembru 2022), Díli- Kongresu nasionál partidu FRETILIN  da-limak nian, Kinta kalan (08/09/2022), re-eleitu Francisco Guterres “Lú Olo” bá Prezidente ho   Marí Bin Amude Alkatiri  bá Sekretáriu Jerál períodu 2022-2027.

Lee Mós : Kongresu FRETILIN Dá-limak, Hametin Nasionalizmu no Patriotizmu

Lú Olo ho Mari Alkatiri re-eleitu bá lidera partidu FRETILIN períodu 2022-2027. Foto/Elio dos Santos da Costa

Iha loron dahuluk Kongresu Nasionál partidu FRETELIN, Kinta (08/09/2022), ne’ebé hala’o iha Sentru Konvensaun Díli (CCD, sigla portugés), haktuir ba rekizitu statutóriu no rejimentu Kongresu Nasionál nian, ne’ebé aprova husi Comite Central FRETILIN (CCF) no konfirma iha Kongresu, kongresista sira aprezenta pakote rua ne’ebé atu kompete iha eleisaun lideransa FRETILIN nian.

Durante prosesu verifikasaun ne’ebé komisaun verifikasaun poder kongresu nian hala’o, proponente sira husi pakote ida husi pakote rua ne’ebé aprezenta, retira sira nia pakote, nune’e pakote ida de’it mak kontinua no ikus mai prienxe rekizitu atu kompete.

Kona-bá oinsá atu hili Prezidente no Sekretáriu Jerál FRETILIN iha kongresu, Rejimentu kongresu nasionál nian ne’ebé CCF aprova, Artigu 12 aliena 3. b hatete katak lista ida tenke mai husi pelo menus 20% delegadu kongresu nian, fahe proporsionalmente tuir representatividade jeográfika, delegadu 10 kada munisípiu  ka rejiaun, exetu Atauro ho delegadu na’in-lima (5).

Lei Sobre Partidu Polítiku sira númeru 3/2004 ne’ebé mak altera ho Lei Númeru 2/2016, rekere lideransa topu partidu polítiku sira so bele eleje liuhosi eleisaun sekreta. Artigu 18 pontu c husi Lei Nú. 2/2016 hatete katak titular sira órgaun diresaun nian so bele eleitu, liuhosi votu direitu no sekretu hosi filiadu sira hotu ka assembleia ne’ebé reprezenta sira.

Tuir termu Lei ida ne’e, kongresista sira ne’ebé iha direitu bá vota, ezerse sira nia direitu no liuhosi eleisaun sekretu, diretu no universal re-eleitu  Francisco Guterres “Lú Olo” bá kargu Prezidente FRETILIN no Mari Bin Amude Alkatiri ba kargu Sekretáriu Jerál FRETILIN periode 2022-2027.

Total votu afavór bá pakote ida hamutuk 764, vota kontra hamutuk 106 no vota nulu hamutuk 47, enkuantu delegadu na’in-ualu (8) mak la fó votu iha kongresu da-limak  ne’e.

Prezidente FRETILIN no Sekretáriu Jerál FRETILIN eleitu toma pose iha loron-9 fulan-Setembru 2022 iha kongresu nasionál nia oin.

Prezidente FRETILIN Francisco Guterres “Lú Olo” hateten, FRETILIN iha vizaun no misaun atu liberta povu husi mukit ,nune’e lori povu ba naroman tuir lema kongresu FRETILIN bá da-limak nian ne’e.

“FRETILIN sai partidu ida ne’ebé mak metin, ho vizaun no misaun klaru bá Timor-Leste nia futuru atu lori naroman bá povu,” Lú Olo  hateten.

Ko’alia kona-bá rezultadu eleisaun ba lideransa FRETILIN iha kongresu, Lú Olo esplika katak prosesu eleisaun ne’e prosesu interna FRETILIN nian. Ne’e demokrasia no iha FRETILIN, laiha ida mak lakon laiha ida mak manan.

LAT: Labele Lakon Esperansa  Mantein Serbí FRETILIN

Mari Alkatiri dada-lia ho Lere Anan Timur. Foto/Elio dos Santos da Costa

Tenente Jenerál reformadu Lere Anan Timur (LAT) hanesan membru CCF segundu jerasaun liuhosi rezultadu kongresu CCF  Maubai 1981 afirma bá delegadu sira iha kongresu da-limak partidu FRETELIN katak nia sei la okupa pozisaun importante ruma iha CCF, maibé sei kontinua servisu no serbí FRETELIN hanesan militante baibain.

“Ha’u uluk nunka dehan katak há’u forma pakote ho se de’it, ha’u uluk dehan ba kongresu mak há’u deside, ne’e mak ha’u horisehik iha kongresu dehan katak se imi asembleia ne’e maka hakarak fó konfiansa bá ha’u atu kandidata hodi forma ho pakote ida, imi mak deside mas iha ne’ebá ne’e ema ida la deside no ha’u hateten tan kuantu maun Marí ho Lú Olo avansa nafatin, ha’u la bele kompete fali ho sira tamba ha’u nia konseitu ida ne’ebé uluk ha’u kaer mak ida ne’e, ha’u mai la’ós atu kompete ho ema ida no la’ós mós atu sai adversáriu bá ema ida entaun ida ne’e mak horisehik mosu pakote úniku de’it no irmaun Marí ho Lú Olo mak manan nafatin sem duvida tamba pakote úniku ne’e no parabéns bá sir,” Lere Anan Timur hateten.

Nia afirma susesu ne’ebé nia atinje iha kongresu nasionál FRETILIN ba da-limak  maka rekoñesimentu ba segunda jerasaun CCF. La’ós atu rekoñese de’it nia  maibé rekoñese mos companheiro sira ne’ebé la hamutuk ona iha CCF tamba destinu hanesan Saudozu Mau Hudu, Kilik, Neluk Hadomi Timor, Saki Nere, Hare Nere, Oli Naca, Lere Malai Laka, Konis Santana no Daitula.

LAT mós apela ba nia apoiante sira atu labele lakon esperansa naran FRETILIN ema hotu nian nafatin, FRETILIN labele lakon iha povu maubere nia oin no matan.

Alternativa iha FRETILIN la’ós nia de’it mak halo, alternativa povu mak halo no iha kongresu delegadu sira mak halo alternativa no sira ne’ebé ko’alia alternativa iha kotuk de’it no iha oin laiha ne’e mak apela hodi dehan kuandu tiru malu, tiru malu ho ema ne’ebé barani, bá oin dehan bá oin no hakiduk hamutuk la’ós balun bá oin no balun hakiduk.

“Hamutuk iha FRETILIN nafatin no ha’u nia susesu boot ba kongresu ida ne’e mak rekoñesimentu bá FRETILIN segunda jerasaun, tamba iha 2015 katuas sira ne’ebé reforma hakarak fila mai uma lulik FRETILIN maibé dehan katak estatutu la fó dalan entaun sira bá fali buka maun sira seluk hanesan Maun Xanana no Taur Matan Ruak no sira la’ós ba tamba CNRT no PL,” nia haktuir.

LAT hatutan hodi afirma katak nia sei hola parte iha estrutura partidu FRETILIN nian no apenas hanesan membru CCF segunda jerasaun nian, ida ne’e de’it mós to’o ona.

Somoxo Rekoñese Retira Tanba La Prienxe Rekizitu

Membru CCF, José Agostinho Sequeira ‘Somotxo’ hateten, pokote loloos ne’ebé sira prepara mak Jenerál Lere ho Rui Maria Araújo hodi kompete ho pakote Lú Olo ho Marí Alkatiri, maibé iha último ora, Jenerál hanesan baibain nia hateten nia lakohi lakon dala-rua, entaun deside hasees aan.

“Ohin ami hatene katak la prienxe rekizitu mak hanesan kada munisípiu pelumenus tenke 10%, agora munisípiu tolu ka haat blokeia ami, Baucau kuaze laiha, Ermera no Díli pelumenus,” José Agostinho Sequeira ‘Somotxo’ hateten.

Pokote prienxe duni rekizitu númeru ne’e to’o maibé kada munisípiu tenke iha assinantes 10 bá leten entaun iha ne’e mak dehan la prienxe rekizitu.

“Ami hakarak mudansa iha FRETILIN laran. Sé 2023 mak nune’e hela konserteza ké kongresu estraordinária ida tenke iha para ami hili lideransa foun, sira mós tenke toma konsiderasaun bá situasaun. To’o momentu ida-ne’ebé mantein nafatin situasaun ne’e sira ne’e dehan la’ós problema. Ne’e problema sei boot iha 2023,” Nia afirma.

“Militantes no kuadru barak mak hanoin ami sai husi FRETILIN, ami la sai, ami hakarak loke odamatan demokrasia partidu nian. Hakarak FRETILIN manán, FRETILIN lakon ne’e mak hotu-hotu hotu ulun moras hanesan militantes sira ne’ebé mantein nafatin nia votu, maibé nunka hanoin atu halo mudansa, sira mós to’o momentu ida sei sente,” Somotxo tenik.

Jornalista: Vito Salvadór