Hatutan.com, (11 Setembru 2022), Díli- José Agustinho Sequeira ‘Somotxo’, hamutuk ho Rui Maria de Araújo, Osório Flórindo ho Luis Lobato, deside sai hosi membru ezekutivu Comite Central  FRETILIN (CCF) ho razaun hakarak fó oportunidade bá kuadru partidu hosi munisípiu no servisu de’it bá FRETILIN hanesan militante baibain. 

Lee Mós : Lú Olo-Alkatiri Re-eleitu, LAT: Labele Lakon Esperansa

José Agustinho Sequeira ‘Somotxo’,. Foto/Elio dos Santos da Costa

José Agustinho Sequeira ‘Somotxo’ bá jornalista sira iha sentru konvensaun Díli (CCD), Domingu (11/09/2022), esplika katak atu halo kaderizasaun no transformasaun jerasionál iha partidu FRETILIN maka sira deside retira hosi membru CCF atu bele fó fali oportunidade bá kuadru sira seluk ne’ebé iha kapasidade no potensialidade atu servisu bá partidu.

Nia afirma lider potensiál iha FRETILIN barak no haree ba kuota bá membru CCF ne’ebé fó ba munisípiu 40% de’it, nune’e konsiente katak kuadru sira ne’ebé mai hosi munisípiu mesak di’ak de’it, iha vontade serbisu no iha posibilidade boot atu halo FRETILIN hetan vitoria iha eleisaun jerál 2023, nune’e sira-nia  deside fó fatin bá munisípiu sira hodi servisu bá susesu partidu nian iha tempu oin mai.

Advertisement

“Ami hatene ami nia responsabilidade bá partidu, ho situasaun no problema sira ne’ebé partidu iha ezije ami atu iha inisiativa di’ak hodi tulun lideransa ne’e fó alternativa foun atu membru CCF sira ne’ebé iha poténsia okupa fali ami nia fatin hodi halo servisu bá partidu,” Somotxo hateten.

Nia ho nia grupu ne’ebé servisu dezde tinan-haat (4) bá reforma iha partidu FRETILIN laran nia iha pozisaun klaru hakarak halo mudansa iha partidu FRETILIN hodi hamosu pakote alternativu Lere Anan Timor ho Rui Araújo, maibé militantes sira la fó konfiansa hodi la prienxe rekizitu. Tamba iha realidade delegadu barak ta’uk no la hatudu aan.

Kuandu akontese situasaun ne’e iha partidu ida nia laran, tuir Somotxo, signifika katak iha intimidasaun, ta’uk buat ruma, buat ne’ebé mak akompaña iha partidu laran ema barak hanesan ohin loron asume kargu kala ta’uk oportunidade ne’e, maibé lolós oportunidade ne’e la’ós Lú-Olo ho Marí Alkatiri mak fó maibé nu’udar sidadaun iha direitu mós ba oportunidade.

“Ami afirma katak pakote alternativu ne’e sei la mate iha kongresu da-limak ne’e de’it, sei organiza an nafatin tamba ami sente katak ho alternativa ne’ebé ami forma sei bele muda situasaun polítika interna partidu nian no mós nasaun nian,” Somotxo subliña.

Ba oin Somotxo ho nia grupu   servisu makas liután atu konvense kuadru no militante sira atu bele kompriende situasaun atuál iha partidu FRETILIN, nune’e bele iha responsabilidade polítika no moral bá desizaun partidu nian.

Advertisement

Francisco Guterres “Lú Olo” ho Mari Alkatiri lee termu posse hafoin re-eleitu bá Prezidente ho Sekretariu Jerál partidu FRETILIN període 2022-2027. Foto/Elio dos Santos da Costa

Uainhira iha 2023 mak FRETILIN la manan no la ukun, Smotxo tenik, konserteza  kongresu estraordinária ida tenke iha para hili lideransa foun, sira mós tenke toma konsiderasaun bá situasaun.

Prezidente Komisaun Nasionál Preparasaun no Organizasaun (KNPO) Kongresu partidu FRETILIN bá da-limak, Flavio Maria Guterres da Silva, hateten lista inisiál ne’e Somotxo, Rui Maria de Araújo, Osório Flórido no Luis Lobato tama hotu iha lista, maibé hanesan públiku hatene katak diskusaun ne’e boot tuir mekanizmu estatutu partidu FRETILIN define membru CCF 40% mai hosi baze no 60% maka kompeténsia lideransa sira nian, entaun 40% ne’ebé iha hili husi konferénsia munisipál sira no iha ne’ebá mak defini se mak númeru um no se mak númeru dois tuir partidu liu husi KNPO hatún bá no nia baze ne’e mak militante eskritu no eleisaun sira ne’ebé hala’o ona iha nivel munisípiu tuir prinsípiu ne’ebé estatutu partidu haruka.

“Hosi diskusaun ida naruk ikus mai kamarada sira balun husu atu hasai naran husi lista hodi fó oportunidade bá kamarada sira seluk no ida ne’e aktu ida di’ak atu servisu bá partidu,” Flavio Maria Guterres da Silva hateten.

Nia subliña atu servisu bá vitória partidu FRETILIN nian la’ós membru CCF de’it, maibé kuadru no militante hotu-hotu ne’ebé la tuur iha estrutura mós servisu atu hodi hanoin katak oinsá mak FRETILIN bele forte hodi hasoru eleisaun 2023.

Flavio hateten kamarada sira ne’ebé husu atu hasai sira-nia naran hosi lista membru CCF sei kontribui atu servisu bá vitória partidu FRETILIN nian iha eleisaun sira mai.

Iha fatin hanesan  Tenente Jenerál reformadu Lere Anan Timur konsidera aktu ne’ebé Somotxo no kamarada sira seluk halo ne’e hanesan aktu demokrátiku, nune’e sei la fó komentáriu tamba hotu-hotu sei hamutuk iha FRETILIN.

Advertisement

“Ne’e demokrasia ne’ebé há’u lakohi halo komentáriu, kuandu há’u hasoru sira mak bele ko’alia ida ne’e,”  Lere Anan Timur hateten.

Iha kongresu partidu FRETILIN ba da-limak ne’e iha alterasaun bá membru CCF ne’ebé antes ne’e membru efetivu 65 ho suplementu 25 maibé iha alterasaun no oras ne’e daudaun membru CCF sa’e bá 100 ho efetivu 75 no suplementu 25.

Jornalista: Vito Salvadór

Advertisement