Hatutan.com, (12 Setembru 2022), Díli—Prezidente Repúblika (PR), José Ramos-Horta konsidera Grupu Arte Marsiál (GAM) no Grupu Arte Rituál (GAR) iha responsabilidade bo’ot atu halakon konflitu no kria Pás ho estabilidade iha Timor-Leste (TL).

Lee Mós : Xanana Triste ho Grupu Joven sira Halo Violénsia bá Malu

Prezidente Repúblika José Ramos-Horta. Foto/Elio dos Santos da Costa

Ramos-Horta apoia desizaun Governu nian ne’ebé halo operasaun konjunta entre Polísia Nasionál Timor Leste (PNTL) ho FALINTIL-Forsa Defeza Timor Leste (F-FDTL), tanba Governu iha responsablidade ida-ne’e atu garante seguransa ba sosiadade tomak.

Bainhira grupu ruma, elementu ruma, kualkér se mak hakarak provoka instabilidade iha rai laran, Governu iha responsablidade atu mobiliza forsa seguransa.

Joven sira liu-liu sira ne’ebé meta iha arte marsiál ne’e tenke ida-idak simu nia responsablidade, ho konsiénsia atu kontribui ba estabilidade nasionál, nune’e sei halo diálogu ho GAM-GAR atu asegura labele iha tán konflitu entre sira.

“Ha’u prontu iha loron hirak mai ne’e ka semana sira mai ne’e, halo diálogu ho grupu sira arte marsiais no arte rituál. Ha’u to’o agora seidauk halo diálogu ho sira, tanba ha’u simu posse fulan tolu liu ba, situasaun oi-oin ne’ebé okupa ha’u nia atensaun nune’e ha’u promete atu halo diálogu ho sira hodi haree oinsa bele hadi’a situasaun no garante pás no estabilidade iha ita nia rain,” Ramos-Horta hateten iha Aeroportu Internasionál Nicolau Lobato Comoro, hafoin fila hosi Austrália, Segunda (12/09/2022).

Maski Xefe Estadu seidauk halo diálogu ho GAM no GAR, la signifika haluha tiha problema sira ne’e, iha mekanizmu hosi Governu nian ne’ebé halo diálogu daudaun ona, liu hosi Sekretária Estadu Juventude no Desportu (SEJD).

Xefe Estadu sei buka pessolamente halo diálogu ho grupu sira ne’e, atu haree oinsa GAM no GAR bele sai elementu pozitivu ba dame iha rai laran, joven balun komete krime la signifika movimentu arte marsiais komete krime.

“Grupu sira arte marsiál no arte rituál bele sai elementu pozitivu ba dame iha rai laran sosiedade labele hakribii sira,” Horta subliña.

Jornalista: Vito Salvadór