Vitíma João Amaral hala’o tratamentu iha ospitál. Imajen/Espesiál

Hatutan.com, (16 Agostu 2021), Covalima-Komunidade iha área fronteira terrestre  Suku Fatumea, Postu Administrativu Fatumea, Munisípiu Covalima, oras ne’e, moris iha ‘trauma’ nia-laran tanba akontese beibeik ema deskoñesidu asalta sira bainhira sira ba haree sira-nia karau iha ai-laran Fatumea nian.  

João Amaral, tinan 23, domingu (15/08/2021), purvolta tuku 08:00 Oras Timor-Leste (Otl), hetan asaltu hosi ema deskoñesidu iha área  Loobetun, Suku Fatumea  bainhira nia ba haree nia karau.

Informasaun ne’ebé Hatutan.com sita hosi Radio Comunidade Cova Taroman (RCCT), segunda (16/08/2021), katak João Amaral nu’udar abitante Aldeia Belulik Kraik, hetan asaltu hodi rezulta nia isin loron balun kanek tanba ema sira asalta ne’e lori sasán kro’at hanesan diman, katana no sasán kro’at seluk tan.

Xefe Suku Belulik Leten, Quintino Jose Amaral, via komunikasaun WhatsApp informa katak, vítima haree rasik ho matan, ema hirak ne’e deskonfia mai hosi área Has Metan, Lamak Neen, Indonézia.

 “Ha’u nia komunidade ne’e ba haree nia karau depois hetan asaltu hosi komunidade ne’ebé deskonfia hosi Indonézia nian hosi parte Lamak Neen. Ema sira ne’e tama mai ita nia área kilo metru 10 hanesan ne’e. Ha’u nia komunidade ne’e kanek tanba ema sira-ne’e lori diman no taa hodi samurai,”  Xefe Suku Belulik Leten, Quintino Amaral haktuir.

Advertisement

Xefe Suku Quintino Amaral, fiar katak kazu ne’e iha relasaun forte ho kazu ida ne’ebé foin akontese  iha loron 28 Juñu 2021 , ne’ebé dehan ema balun iha Fatemua ba foti ema nia karau parte Atambua nian.

Ho akontesimentu ne’e, Xefe Suku Quintino Amaral, informa kedas ba autoridade polísia atu bele toma medida, liuliu oinsá maka rezolve dezentendimentu entre komunidade parte rua iha liña fronteira ne’ebé deskonfia malu na’ok karau ba malu.

Komandante PNTL Munisípiu Covalima, Superintendente António Maria de Sá. Imajen/Espesiál

Bainhira konfirma insidente ne’e ba Komandante Polísia Nasionál Timor-Leste (PNTL) Covalima, Superintendente António Maria de Sá, lia tun dehan, bainhira nia parte simu informasaun ne’e halo komunikasaun kedas ho Unidade Patrullamentu Fronteira (UPF) hodi halo operasaun to’o fatin akontesimentu. 

 “Ita nia UPF halo ona atuasaun no ba kazu ne’e ita sei prosesu no ha’u he’in relatóriu hosi Komandante Polísia Eskuadra Fatumea,” Superintendente Polísia António Maria de Sá tenik.

Situasaun ikus iha área akontesimentu kontroladu ona hosi UPF ho Unidade Espesiál Polísia (UEP) no UPF rasik  kontinua    asegura seguransa iha liña fronteira atu evita atividade no movimentu ilegál sira. (RCCT/ico)

Advertisement