Hatutan.com, (02 setembru 2021), Díli—Comissão Anti-Corrupção (CAC) kontinua ho seriedade akompaña prosesu investigasaun ba kazu ró Tranship II, ne’ebé oras-ne’e iha ona Ministériu Públiku (MP).

“Ita iha hela períodu konfinamentu domisiliáriu jerál iha Munisípiu Díli, tanba ne’e ita labele hetan informasaun hosi sasin-sira balun atu bele mai hato’o sira-nia deklarasaun. Maibé, prosesu investigasaun iha Ministériu Públiku  la’o hela no CAC  sei akompaña nafatin to’o konkluzaun,” Diretór Jerál Investigasaun CAC, José Verdial, hateten hodi responde Hatutan.com liuhosi telephone, kuarta (01/09/2021).

 Kronolojia

Ministru Transporte no Komunikasaun (MTK), José Agustinho da Silva anunsia ofisiálmente katak, ró KMP Tranship II, hosi  Surabaya, Indonézia hahú substitui ró-ahi Berlin Nakroma no Success, iha Tersa, 25 Maiu 2021.

MTK halo kontratu ho ró-ahi KMP Tranship II hosi kompañia estranjeiru Atralata Estrategi hosi Indonézia, ho kada fulan selu $220.000, ne’ebé iha kapasidade tula pasajeiru hamutuk na’in 300, inklui sasán ho tonelada 1.000-resin.

Razaun substituisaun ne’e tanba ró-ahi Berlin Nakroma avaria dezde tinan 2020, to’o agora seidauk hadi’a tanba situasaun COVID-19, no ró-ahi Success ba manutensaun durante fulan-tolu iha Indonézia, dezde tinan tolu hala’o operasaun iha Dili la halo manutensaun.

CAC hahú inspesaun

CAC halo apreensaun ba dokumentu sira. Foto/CAC

Iha loron 04 Juñu 2021, ekipa hosi CAC, akompaña hosi Diresaun Nasionál Transporte Marítima (DNTM), hahú halo inspesaun ba ró ne’e  hodi hatene kona-bá kondisaun no mós buka hatene kona-bá prosesu kontratu, molok hala’o operasaun.

CAC rasik halo prosesu inspesaun, bazeia ba mandatu ne’ebé hatuur ona iha Lei númeru 8/2009 kona-bá kriasaun CAC, nu’udár instituisaun independente ho knaar atu prevene no kombate krime korrupsaun.

Iha inspesaun ne’e, CAC hakarak hetan relatóriu hosi Ministériu Transporte no Komunikasaun, relasiona ho aluga ró ne’e, bainhira iha indísiu krime maka CAC sei submete ba Ministériu Públiku (MP).

Ho inísiu inspesaun ne’e, maka iha loron 08 Juñu 2021, Ministru MTK, José Agostinho da Silva, deklara katak, bazeia ba rezultadu inspesaun DNTM, katak ró KMP Tranship II iha kondisaun di’ak atu halo operasaun. Nune’e, iha loron tuir mai 11 juñu 2021, Ró ne’e transporta  Primeiru-Ministru (PM), Taur Matan Ruak  ho komitiva (Membru Governu lubuk ida), inklui Konselleiru másimu Partidu KHUNTO, José dos Santos Naimori Bucar ba Postu Administrativu  Ataúro, maibé susar atu atraka iha portu, ikus-mai tenke fila-fali mai Díli ho ró-ahi seluk.

Ho situasaun ne’e, iha loron 12 juñu 2021, Ministru MTK, José Agustinho da Silva, ezije fila-fali ba tékniku ró-ahi KMP Tranship II, atu submete relatóriu ofisiál ho loloos ba parte investigadór-sira tanba deskonfia mákina ró nian mak avaria.

Sosiedade Sivíl hato’o lamentasaun

Iha loron 14 juñu 2021, Sosiedade Sivíl liuhosi Forum Organizasaun Naun Governamentál Timor-Leste (FONGTIL), liuhosi Diretór Ezekutivu, Daniel Santos do Carmo, hato’o lamentasaun no preokupasaun hodi husu Primeiru-Ministru (PM), Taur Matan Ruak, kansela kontratu ró Tranship II.

FONGTIL husu tanba konsidera ró ne’e fó prejuizu ba Estadu Timor-Leste, bazeia ba informasaun ne’ebé FONGTIL  hetan katak, gastu ba mina bainhira viajen ba Rejiaun Administrativa Espesiál Oé-Cusse Ambeno (RAEOA) ka Ataúro gastu litru 31,000 no rendimentu hosi kada viajen hetan de’it $5,000 ka $6,000, enkuantu prosesu aluga ró kada fulan $220,000.

FONGTIL mós husu ba CAC atu halo kapturasaun imediata ba Ministru Transporte no Komunikasaun tanba konsidera hanesan flagrante delitu, tuir prosesu kódigu penál artigu 219.

CAC empede  operasaun

Iha loron ne’e kedan, liuhosi publikasaun CAC nian iha pájina Fcebook ofisial CAC (Comissao Anti Corrupcao CAC Timor Leste), Komisáriu Adjuntu CAC ba Asuntu Prevensaun no Sensibilizasaun, Luis de Oliveira Sampaio, orienta ekipa prevensaun korrupsaun hodi hala’o inspesaun ba ró Tranship II Gresik Indonesia ne’ebé Governu liuhosi MTK aluga hodi substitui Berlin Nakroma no Success ne’ebé avaria.

CAC rekolla evidensia balun. Foto/CAC

Iha prosesu inspesaun ne’e CAC rekomenda ba Ministru MTK, José Agostinho hosi partidu KHUNTO atu temporariamante suspende operasaun tanba iha prosesu aprovizionamentu aluga ró Tranship II hamosu dúvida no fatal tebes, ne’ebé bele prejudika funsionáriu públiku MTK sira bainhira Governu kontinua deside halo operasaun ba ró ne’e.

Baze legal ne’ebé gia CAC rekomenda ba MTK atu suspende temporariamante operasaun ró Tranship II Gresik mak CAC nu’udár instituisaun independente ne’ebé hala’o nia knaar atu prevene no kombate krime korrupsaun tuir mandatu ne’ebé hatuur ona iha Lei Nú. 8/2009 kona-ba Kriasaun CAC.

Iha artigu 5 Lei Kriasaun CAC, define katak CAC iha kompeténsia atu halibur (rekolla) no analiza informasaun hirak ne’ebé relasiona ho kauza sira ba korrupsaun no fó-hanoin (akonsella) ba kualkér instituisaun ka entidade públika sira kona-bá oinsá prevene no luta hasoru hahalok korrupsaun.

Iha artigu 9 Dekretu Lei Nú. 23/2015 kona-bá Estrutura Orgánika CAC, define katak Unidade Inspesaun no Monitorizasaun (UIM) responsavel ba apoiu partisipasaun no sensibilizasaun sosiál no emprezariál no mós monitorizasaun situasaun indikadu korrupsaun iha administrasaun direta no indireta Estadu.

Iha mós Lei Medida Prevensaun no Kombate Korrupsaun (MPCC), partikularmente iha artigu 7 kona-bá publisidade no transparénsia serbisu aprovizionamentu iha setór públiku no artigu 8 kona-bá aprovizionamentu ne’ebé justu no efisiente, fó espasu ne’ebé boot ba servisu prevensaun CAC atu intervein no asegura prosesu-sira tuir prinsípiu-sira ne’ebé lei define tiha ona.

MTC liu hosi Diresaun Nasional Transporte Marítima (DNTM) nu’udar autoridade ne’ebé ezekuta mandatu bazeia ba nomeasaun hosi Diretór DNTM ho númeru ofísiu: MTC/098/DNTM/VI/2021 – data 01/06/2021 ho asuntu nomeasaun inspesaun téknika ba ró-ahi Success no MTC/100/DNTM/VI/2021, datada 02/06/2021 ho asuntu nomeasaun inspesaun téknika ba Transip II.

Rezultadu inspesaun MTK nian kontráriu ho sá mak CAC hetan iha terrenu. CAC lori ona dadus ba kruza vervalmente ho Diretór Nasional ba Transporte Marítima. CAC rekomenda ona atu halo komparasaun no MTK halo re-inspesaun fali tuir dadus CAC nian.

Informasaun adisionál ne’ebé ekipa inspesaun prevensaun CAC nian hetan iha terrenu revela ró Tranship II Gresik ninian produsaun tinan 2007 no ró Success ne’ebé hala’o tiha ona ninian operasaun iha Timor tinan hirak nian laran fabrika iha tinan 2017.

CAC haree katak roo ne’e rasik oli suli hela iha ne’ebé perigu tebes ba ró no pasajeiru-sira nian salvasaun vida. Lampu sira mós kesi ho tali ráfia no AC ró nian aat hodi uza fali AC ne’ebé atu instala de’it ba iha uma nian.

Iha loron 18 juñu 2021, Primeiru-Ministru (PM), Taur Matan Ruak, hateten seidauk bele foti desizaun ruma ba Ministru José Agustinho da Silva, relasiona ho polémika ró ne’e.

Xefe Governu dehan, nia parte labele ezonera ema arbiru no tenke iha fundamentu ruma, maski kazu ne’e envolve ona CAC.

PN mós preokupa

Ho deklarasaun PM Taur Matan Ruak nian maka, iha 21 Juñu 2021, reprezentante povu iha uma fukun Parlamentu Nasionál (PN) mós deklara sei halo interpelasaun ba Governu, hodi husu justifikasaun ba Ministru Transporte no Komunikasaun, José Agostinho da Silva, kona-bá kontratu ró ne’e.

Xefe Bankada KHUNTO, Deputadu Olinda Guterres, hateten atu habadak deklarasaun polítika kona-bá korrupsaun ba ró-ahi ne’e tenke fó xamada ba ministru ne’e.

Xefe Bankada FRETILIN, Deputadu Francisco Miranda Branco, konkorda mós katak deputadu sira bele halo interpelasaun ba Governu, kona-bá ró ne’e. Ho nune’e  Deputadu Domingos de Carvalho hosi Bankada CNRT,  liuhosi deklarasaun polítika hateten ró-ahi ne’ebé aluga hosi Indonézia iha indísiu forte krime korrupsaun, bazeia ba rezultadu fiskalizasaun Komisaun E, tanba deskonfia iha prosesu aprovizionamentu no adjudikasaun mosu irregularidade barak no envolve Ministru Transporte no Komunikasaun.

Tuir informasaun ne’ebé Bankada CNRT rekolla iha loron 18 fevereiru 2021 katak, foufoun deside kontratu rihun $150, maibé derrepente folin aluga ró-ahi Tranship II ne’e sa’e ba rihun $220.

Membru PN sira husu bazeia ba Rejimentu Parlamentu Nasionál (RPN) Artigu 152 (Debate ho ministru sira) númeru 1 hateten, ministru idak-idak mai iha Plenáriu nia oin, pelu menus dala-ida iha kada sesaun lejizlativa, ba debate ho Parlamentu.

 CAC aprezenta notísia krime dahuluk ba MP

CAC halo buska no apreensaun. Foto/CAC

Iha  loron 24 Juñu 2021, CAC hato’o auto partisipasaun rezultadu analiza kona-bá inspesaun ba ró Tranship II Gresik Indonézia, ba Ministériu Públiku (MP).

CAC deteta katak, hafoin lori ro-ahí Tranship II mai Timor-Leste mak foin selebra kontratu no halo kontratu mak foin orienta halo prosesu aprovizionamentu.

Iha fali loron 01 Jullu 2021, CAC kontinua hala’o prosesu investigasaun kriminál ba ró Tranship II Gresik Indonézia, maski operasaun la’o hela.

Adjuntu Komisáriu CAC, Luis Oliveira Sampaio, ba jornalista sira la esplika detallu kona-bá indísiu irregularidade  ne’e, tanba nu’udár materiál investigasaun, tenke kumpre segredu justisa no labele fó-sai uluk.

Iha lei Medida Prevensaun no Kombate Korrupsaun (MPKK), artigu 7 kona-bá publisidade no transparénsia serbisu aprovizionamentu iha setór públiku no artigu 8 kona-bá aprovizionamentu ne’ebé justu no efisiente, fó espasu ne’ebé boot ba serbisu prevensaun CAC atu intervene no asegura prosesu sira tuir prinsípiu-sira ne’ebé lei define tiha ona.

Ministériu Publiku  analiza kazu

Iha loron 05 agostu 2021, Prokuradór Jerál Repúblika (PJR), Alfonso Lopes, hateten Ministériu Públiku (MP), halo hela analiza ba kazu ró Tranship II liu hosi Gabinete Kombate Korrupsaun no Krime Organizadu sekretária hamutuk ho prokuradór sira.

“Iha ne’e ita sei halibur prova liuhosi  rona sasin no rekolla dokumentu, bainhira iha prova forte bele prodús akuzasaun loke prosesu tuir-mai no karik prova la  sustenta maka bele arkiva,” Prokuradór Jerál Repúblika, Alfonso Lopez, hateten ba jornalista sira iha Faról, foin lalais ne’e.

Nia dehan, iha prosesu ne’e liga ba kazu natureza korrupsaun sei kolabora ho CAC iha faze investigasaun ka bele halo delegasaun kompeténsia ba CAC, hodi halo investigasaun.

Maski nune’e, nafatin respeita prezunsaun inosénsia tama iha faze investigasaun tenke kuidadu ho konfidensialidade.

CAC hala’o mandadu buska no apreensaun ba APORTIL

Iha loron 16 Agostu 2021, CAC, ezekuta tan mandadu buska apreensaun ba APORTIL, liuhosi Diresaun Cabotage, relasiona ho prosesu aluga ró ne’e.

CAC halo ezekusaun buska no domisíliu inklui prende sasán bazeia ba mandadu Tribunal Distritál Díli (TDD) ho NUC 007/21.CAC TL, ne’ebé hala’o iha edifísiu Cabotage portu Díli.

Iha prosesu buska ne’e, ekipa investigadór-sira rekolla dokumentu ne’ebé liga ba Prosesu aprovizionamentu, tanba diresaun ne’e  mak halo inspesaun ba ró no halo rekomendasaun  hodi fó ba  superiór  iha Ministériu Transporte no Komunikasaun (MTK), inklui Ministru rasik hodi foti desizaun aluga ró ne’e, maibé deskonfia ró ne’e ho kondisaun la favoravel, hodi halo operasaun inklui kustu kontratu selu boot  tebes.

Dokumentu sira sei sai hanesan matéria hodi reforsa investigasaun tuir-mai, atu dezenvolve prova, no bele loke prosesu investigasaun tuir-mai.

Iha loron ne’e mós  CAC ezekuta mandadu buska no apreensaun, hodi rekolla dokumentu no bolu Diretór Cabotage Nasionál  iha APORTIL, ho inisiál  FCC, hodi halo identifikasaun durante oras 12, relasiona ho prosesu kontratu ró Tranship II.

Dokumentu importante sira ne’ebé CAC rekolla mak hanesan, pedidu operasaun, kontratu, prosesu aprovizionamentu oinsá ró ne’e mai TL, dokumentu pedidu pagamentu ho commitement payment voicer (CPV), inklui asegura komunikasaun ekipamentu serbisu, ne’ebé Diretór Cabotage Nasionál uza hanesan telephone no komputadór ida.

Buska ne’e hala’o iha edifísiu Cabotage iha portu Dili  iha  tuku 9:40 no iha tuku 11:00 otl kontinua halo buska apreensaun dokumentu iha edifísiu sentrál APORTIL, no iha tuku 12:00 kontinua halo buska no apreensaun ba Diretór Nasionál Cabotage ninia rezidénsia iha Comoro, Díli.

Durante prosesu buska, Prezidente APORTIL, Flávio Cardoso Neves, hateten kontratu ba prosesu ró ne’e Ministru Transporte no Komunikasaun (MTK) mak aprova direta no APORTIL fasilita de’it.

Kona-bá prosesu pagamentu invoice, Ministru Transporte Komunikasaun mak aprova, maibé to’o agora pagamentu seidauk la’o.

CAC aprezenta notísia krime daruak ba MP

Iha loron 18 Agostu 2021, CAC kontinua verifika prova no dadus ne’ebé rekolla durante buska no apreensaun ba kazu krime ró Tranship II, no iha loro karik ne’e submete tan ba daruak ba iha MP.

Iha prosesu identifikasaun, ba suspeitu Diretór Cabotage Nasionál  ne’ebé sei halo analiza didi’ak ho prova sira ne’ebé suporta no temi iha prosesu nia laran, hetan verasidade atu posibilidade sei identifika tan suspeitu seluk ba koñesimentu, relasiona ho kazu ne’e.

Tuir prosesu normál, bainhira hetan duni faktu, sei halo validasaun hosi Tribunál mak foin loke prosesu investigasaun normál, hodi bolu testemuña ho suspeitu. (bit)