Hatutan.com, (06 Setembru 2021), Díli—Arkidioseze Metropolitana Díli, liuhosi nia reprezentante, segunda (06/09/2021), hasoru-malu ho Ministru Prezidénsia Konsellu Ministru (MPKM), Fidelis Leite Magalhães, iha Ministériu Finansas (MF), Aitarak-Laran, Díli, hodi aprezenta preokupasaun Arkidioseze Díli nian ba Governu kona-bá implementasaun regra konfinamentu obrigatóriu jerál ka lockdown iha Díli.

Parte Arkidioseze Díli husu Governu atu buka mekanizmu ne’ebé di’ak liu atu bele rigór liután iha implementasaun protokolu prevensaun  COVID-19 durante implementasaun konfinamentu domisiliáriu obrigatóriu jerál.

“Atu fó hanoin ba Governu kona-bá regra-sira prevensaun surtu COVID-19, durante impozisaun konfinamentu domisiliáriu jerál, populasaun barak mak la halo tuir,” reprezentante Arsebispu Arkidioseze Díli, Padre Graciano Santos Barros, hateten hafoin hasoru-malu ho MPKM.  

Durante ne’e Governu hapara atividade Uma Kreda liuliu iha Díli, maibé buat barak Uma Kreda haree katak ema barak la kumprimenta regra ho di’ak, nune’e husu atu buka dalan hodi bele hadi’a liután buat balun.  Ezemplu, bainhira hakoi ema mate, rezolusaun ne’e autoriza de’it ema na’in 10 mak marka prezensa iha rate, maibé iha prátika la la’o, tanba ema barak tebes, entaun ne’e susar tebes tanba kestaun kultura.

Situasaun ida ne’e, dala-ruma hamosu mós dezentendimentu to’o hirus-malu entre seguransa Igreja-nian ho Estadu-nian hanesan Polísia Nasionál Timor-Leste  (PNTL), dalaruma hanoin katak, parte Igreja mak autoriza.

Observasaun seluk hosi Uma Kreda hatudu katak, maski iha rezolusaun Governu hateten katak tenke uza máskara, fase-liman ho sabaun, halo dezinfetante, maibé iha prátika la akontese, tanba ne’e Igreja mós esforsu buka dalan atu hamutuk ho Governu buka rezolve hamutuk.

Padre Graciano Santos Barros apela ba sidadaun hotu-hotu tenke kumpre regra husi Organizasaun Mundiál Saúde (OMS), ligadu ba regra-sira ne’ebé Governu aprova no impoin iha konfinamentu obrigatóriu.

Biban ne’e, Ministru Prezidénsia Konsellu Ministru (MPKM), Fidelis Leite Magalhăes, hateten  iha sorumutuk ne’e, parte Igreja aprezenta hanoin balun, kona-bá progresu hirak ne’ebé mak la’o, no parte Igreja apresia tebes ho esforsu sira ne’ebé maka Governu halo.

Governu kontente tanba parte Igreja Katólika rekoñese katak, COVID-19 ne’e sériu duni, tanba akontese iha fatin barak no rejista mós  vítima ne’ebé monu barak, to’o Nai-Lulik sira mós kuandu ba administra mina-sarani, sira rekoñese katak, númeru ema ne’ebé maka mate iha kada loron aumenta.

Igreja hakarak atu halo esforsu posivel serbisu hamutuk ho Governu atu bele fó konsensializasaun ne’ebé di’ak liubá sarani no populasaun sira.

“Igreja nu’udár parseiru ida importante tebetebes. Ita-nia Igreja Katólika ninia papél ne’e ita labele tau sees hosi ita ninian, liuliu iha kontestu sosiál, kulturál, tanba ne’e mak Governu tenke komprometidu atu servisu hamutuk ho ita-nia Igreja,” nia esplika.

Iha sorumutuk ne’e Pároku Balide, Padre Graciano Santos Barros akompaña hosi Pároku Aimutin, no Pároku Katedrál.

Konfinamentu domisiliáriu jerál iha Dili, ne’ebé hatuur iha rezolusaun Governu iha 25 agostu hateten katak, iha área hotu-hotu munisípiu Dili-nian bandu transporte públiku, liuliu taxi, mikrolete no anguna atu halo sirkulasaun.

Suspende selebrasaun relijioza koletiva no bandu mós atu halo serimónia funerál, ne’ebé envolve partisipasaun ema na’in-10 liu no sira ne’ebé partisipa serimónia ne’e rasik tenke uza máskara, hodi taka inus no ibun, inklui mantein distánsia pelumenus metru ida ho ema seluk ne’ebé prezente iha serimónia ne’e.

Estabelesimentu komersiál, industriál, artezanál ka prestasaun serbisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustivel-nian, no instituisaun finanseira-sira.

Restaurante-sira bele fornese hahán, aplika rejime take away ka entrega iha uma de’it no estabelesimentu seluk  taka ba públiku bele dezenvolve ninia atividade liuhosi serbisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 Otl. (ger)