Connect with us
Pakote Ahi

Dili

Finaliza Igreja Aimutin presiza tan milaun rua

Published

on

Hatutan.com, (05 Setembru 2021), Díli—Atu finaliza projetu konstrusaun Igreja foun Parókia Saun José Operáriu, Aimutin, Díli, presiza tan orsamentu adisionál milaun rua USD ($2,000,000.00).  

Tuir estimasaun  tékniku hosi tékniku seniór balun iha Ajénsia Dezenvolvimentu Nasionál (ADN) ne’ebé lakohi temi nia identidade ba Hatutan.com katak, osan restu $480,000.00 ne’ebé iha hela Governu liuhosi Gabinete Apoiu Sosiedade Sivíl (GASC, sigla portugés)  la sufisiente atu bele finaliza 100% projetu ne’e ho kualidade no tuir padraun kontratu.

Dezeñu 3D Igreja Aimutin. Foto/Repro

“Ha’u nia estimasaun tékniku ba projetu ne’e nia estrutura foin atinje 60% -70%. Sei presiza materiál barak no karun atu finaliza, liuliu parte interiór, asesória, materiál ba eletrisidade nian, serámiku, no seluk tan.   Sasán sira-ne’e karun tebes,” tékniku ne’e hateten, foin lalais ne’e.

Fontes ne’e hatutan, se hakarak projetu ne’e termina 100%, inklui nia jardín sira kompletu, maka presiza tan orsamentu purvolta $2,000,000.00.  Maske nune’e, Cesar Moreira Vital Moreira, nudár konsultóriu tékniku ba projetu Igreja Aimutin, konsidera kalkulasaun tékniku  orsamentu ne’e razoavel no nesesáriu, maibé sira-nia aprezenta ona proposta tékniku ba Arkidioseze Metropolitana Díli ho GASC, katak ho  sira presiza tan orsamentu adisionál purvolta $1,800,000.00 bele finaliza 100%.

Advertisement

“Ami nia estimasaun no submete proposta estimasaun ne’e ba parte sira, katak ita presiza tan orsamentu  $1,600,000.00 ba estrutura nian no mais au menus $200,000.00 ba konsultóriu nian, ita bele finaliza projetu ne’e 100%,” Cesar Moreira hateten hodi responde Hatutan.com iha nia hela fatin, Comoro, Díli, sábadu (04/09/2021).

Inísiu projetu ne’e Governu commit  (kompromisu) orsamentu total $3,000,000.00.  Nune’e, informasaun ne’ebé  hatutan hosi koordenadór GASC, Filipe da Costa, katak hosi total orsamentu apoiu Governu nian ne’e hela de’it ona $480,000.00.

Hosi orsamentu commit Governu nian $3,000,000.00 ne’e halo ona pagamentu milaun $2,5, maibé Igreja ne’e la finaliza tanba osan $3,000,000.00 ne’e ekivalénsia 62% de’it hosi orsamentu avaliasaun ADN ho montante $4,859.540.81. Tanba ne’e, atu finaliza Igreja foun  Aimutin sei presiza tan milaun $1,8. 

 “Agora depende ba parte rua; Governu ho Igreja, oinsá maka buka solusaun atu finaliza konstrusaun Igreja Aimutin ne’e. Ha’u nia hanoin presiza tebes apoiu adisionál hosi Governu no sarani Timor-oan sira-nia kontribuisaun mós importante tebes,” Cesar Moreira hateten.

Sasidik boot

Advertisement

Kondisaun Igreja Aimutin atuál. Foto/Hatutan.com

Sasidik  (obstákulu) ne’ebé sai kauza prinsipál ba lala’ok projetu multi annual ne’ebé ezekuta hosi empreza lokál ARTHA Díli paradu dezde 2019 to’o mai 2021tanba kontratu ne’ebé estabelese entre Governu  liuhosi GASC ho parte Arkidioseze  Metropolitana Díli ‘expire’ tiha ona iha dezembru 2020.

“Dezde dezembru to’o agora laiha pagamentu tanba kontratu “expire” ona no presiza atu renova fali kontratu ne’e hodi fasilita pagamentu ba empreza no garante empreza kontinua nia servisu hodi finaliza tiha projetu ne’ebé la’o kedas dezde 2015 to’o agora seidauk finaliza,” Cesar Vital Moreira, nudár konsultóriu ba projetu Igreja foun Aimutin afirma.

Hatutan.com halo ona esforsu atu halo entrevista ho Padre Parókia Saun José, Aimutin, Díli,  Pe. Emanuel Lelo Talok, CMF, maibé seidauk iha tempu no promete karik Arsebispu Arkidioseze Díli, Dom Virgílio do Carmo da Silva, SDB, fó sai ona nia karta rekomendasaun ba  GASC maka foin bele fó komentáriu.

Loron hirak liubá, Hatutan.com mós hakat ba to’o Câmara Ekleziástika  Arkidioseze Díli atu halo audiénsia entrevista ho Administradór Apostoliku Arkidioseze Metropolitana Dioseze Díli, Dom Virgílio do Carmo da Silva, SDB kona-ba kestaun Igreja Aimutin, maibé Xanselér Padre Paulus Maia, dehan de’it katak,  konfinamentu obrigatóriu jerál iha Munisípiu Díli termina maka bele hasoru Amu Bispu. 

Parte GASC iha ona planu atu halo transferénsia osan restu $48,000.00 hodi halais prosesu konstrusaun ba Igreja Aimutinn bazeia ba pedidu hosi Komisaun Harii Igreja foun  ne’e, maibé infelizmente labele halo tanba parte Arkidioseze Metropolitana Dioseze Dili seidauk halo rekomendasaun ruma bazeia ba akta ne’ebé GASC prodús.

Molok ne’e, koordenadór GASC Filipe da Costa, esplika ba Hatutan.com katak iha tinan 2020 Governu lao de’it ho orsamentu duodesimu tanba ne’e laiha kbiit finanseiru atu finansia obra sira ne’ebé mai ho kustu orsamentu boot.

Advertisement

Ho situasaun ne’e halo Governu labele atu halo transferénsia tuir akordu ne’ebé iha no prejudika konstrusaun Igreja Aimutin tenke pauza durante tinan ida. Maske nune’e, Filipe da Costa  mós preokupa tanba iha situasaun sira hanesan ne’e, parte Igreja la halo pedidu estensaun ba kontratu multi annual ne’ebé GASC ho Igreja iha no ida seluk mak kompañia hamutuk ho Igreja la submete relatóriu progresu servisu bazeia ba orsamentu ne’ebé antes ne’e parte GASC halo ona pagamentu ho montante $2,500,000.00.

GASC nafatin hein pedidu estensaun hosi parte Igreja, atu nune’e, bele halo transferénsia ikus hodi kompleta kuota orsamentu ne’ebé Governu komprometidu ona atu fó ba obra Igreja Aimutin $48,000.00.

Istória balun kona-ba Projetu Igreja Aimutin

Igreja Aimutin uluk. Foto/Repro

Iha inísiu planu projetu Igreja Saun José Operáriu, Aimutin, Díli, submete proposta orsamentu totál  milaun $5,1 ho nia postura Igreja modernu no multi-funsaun ka kalkulasaun tékniku atu hanesan otél sinco estrela. Maibé   bainhira submete ba Ajénsia Dezenvolvimentu Nasionál (ADN) tempu ne’ebá lidera hosi Diretór Jerál Samuel Marsal, elimina tiha orsamentu balun hodi prevee fali orsamentu avaliasaun hosi ADN nian $4,859.540.81. 

Dezeñu 3D ba projetu konstrusaun Igreja foun Aimutin nian ne’e ho medida luan 5167 metru kuadradu hosi basement  to’o balkaun. 

Iha basement (ruang bawah tanah) ne’e sei prepara fasilidade hanesan, loja, armazén, kartóriu parókia, kapela ida tan, aula ne’ebé bele akomoda ema 400-500 no   iha mós fatin ba meditasaun

Advertisement

Iha leten to’o balkaun misa fatin ho akomoda sarani 1,200. Igreja ho nia aprezentasaun arkitetura kombinasaun tradisionál ho modernu ne’ebé nia valor relójiu ne’e mosu tanba ne’e Igreja ne’e karik hotu, bele dehan  hanesan íkone ida ba Timor-Leste hodi reprezenta sarani Timor nia fiar ba mundu.

Sarani sira iha Igreja ida-ne’e besik 40,000 no  sarani barak presiza duni Igreja ne’ebé boot atu halo nia atividade relijiozu no atividade estra sira seluk.

Istória Parókia Saun José Aimutin

Parókia  Saun José Operáriu Aimutin, antes sai parókia nia hola parte ba iha Parókia Santa Maria Auxiliadora, Comoro, Díli, molok ida-ne’e nia hola parte ba iha Parókia Motael. Sai quase parókia iha tinan 2008 no depois sai parókia iha loron 1 fulan-Maiu 2011.

Parókia Aimutin ninia padrueiru mak Saun José Operáriu ne’ebé ninia festa selebra kada tinan iha loron 1 fulan-Maiu.

Advertisement

Dokumentu balun ne’ebé Hatutan.com asesu hosi Arkidioseze Metropolitana Díli haktuir Parókia Saun José Aimutin adopta pastoral ida ho modelu Konsíliu Vatikanu II nian, katak servisu hamutuk iha partisipasaun ativa no kolaborasaun entre Nai-lulik no sarani sira nian.  (bit)

Notísia iha Relesaun : Selu ona milaun $2,5, konstrusaun Igreja Aimutin “nunca terminou”

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Dili

Laiha Resibu, Fulan-Rua Ona Munisípiu Díli La Rekolla Reseita hosi Estasionamentu Sira

Published

on

Hatutan.com, (12 Abríl 2024), Díli—Autoridade Munisípiu Díli liuhosi Diresaun Servisu Obras Públiku, fulan-rua (2) ona, la rekolla reseita hosi pagamentu estasionamentu nian iha Dili laran tanba la iha resibu ka billete.

(more…)

Kontinua Le'e

Dili

Munisípiu Díli Prepara Rekursu Superviziona Regra Soe Fo’er iha Kada Aldeia To’o Bairru Sira

Published

on

Hatutan.com, (09 Abríl 2024), Díli—Autoridade Munisípiu Díli prepara daudaun rekursu hodi halo supervizaun no monitorizasaun bá regra soe fo’er hosi kedas aldeia to’o bairru sira iha Dili laran.

(more…)

Kontinua Le'e

Dili

Dom Virgílio Husu Devotu Jesus Divina Mizerikórdia Aplika Obra Mizerikórdia iha Moris Loron-Loron

Published

on

Hatutan.com, (07 Abríl 2024), Díli—Iha selebrasaun Domingu dahuluk bá Domingu Paskua nian Domingu Divina Mizerikórdia, Dom Virgílio Kardeál do Carmo da Silva, SDB  husu bá sarani sira liu-liu Devotu Jesus Divina Misericordia atu aplika obra misericordia iha moris loron-loron.

(more…)

Kontinua Le'e
Advertisement

Trending