Diretór Ezekutivu Fundasaun Mahein (FM), Joăo Almeida, koalia liuhosi konfetensia imprénsa, iha knaar fatin Lecidere, Suku Gricenfor, segunda (27/09/2021). Foto: Hatutan.Com

Hatutan.com (27 Setembru 2021), Dili—Organizasaun Sosiedade Sivíl, hosi Fundasaun Mahein (FM), deskonfia Vise-Ministru Interiór (VMI), António Armindo, hala’o politizasaun ba setór seguransa, tanba halo nomeasaun ba adidu seguransa foun-sira, la tuir méritu no kompeténsia iha área Serbisu Migrasaun-nian.

Rezultadu monitorizasaun hosi FM hatudu katak, Ministériu Interiór (MI), planeia atu halo nomeasaun ba adidu Servisu Migrasaun foun, hodi hala’o funsaun iha rai-liur no troka mós adidu-sira anteriór.

Nomeasaun ida-ne’e, hodi prienxe vaga ba adidu iha Portugál, Singapura, Darwin-Austrália no Indonézia iha Konsuladu Bali, Kupang no Atambua.

“FM nota katak, nomeasaun adidu foun ba vaga-sira ne’ebé temi ne’e, barak liu mai hosi ema foun ne’ebé laiha koñesimentu iha Servisu Migrasaun. Ema hirak ne’e mós durante ne’e la hala’o Servisu iha área Migrasaun no iróniku liu tán, balun komete hela krime no hetan ona sansaun dixiplinár hosi MI, maibé kontinua nomeia ba adidu hodi reprezenta no hala’o funsaun iha estranjeiru,” Diretór Ezekutivu FM, João Aldmeida, deklara liuhosi konferénsia imprensa iha kna’ar fatin, Lecidere, Suku Gricenfor, Segunda (27/09/21).

Tuir dadus, maski la temi naran, maibé FM nota katak, MI nomeia ajente polísia ida hosi Kuartél Jerál PNTL ba adidu Migrasaun iha Portugál, maski laiha kursu ruma ne’ebé iha ligasaun ba migrasaun-nian.

Adidu Migrasaun ba Singapura no Darwin-Austrália, nomeia ema foun ida ne’ebé laiha kursu ruma kona-bá Serbisu Migrasaun-nian.

Nune’e mós adidu Migrasaun ba Konsuladu Bali, MI nomeia ajente migrasaun ida ne’ebé komete hela krime no hetan ona medida dixiplinár hosi eis Ministru Interiór interinu, Filomeno da Paixăo de Jesus ne’ebé hasai ona hosi Servisu Migrasaun-nian.

Kona-bá adidu Migrasaun ba Konsuladu Kupang no Atambua, Vise Ministru Interiór, nomeia ema foun ida ne’ebé laiha koñesimentu no laiha kursu ruma kona-bá Servisu Migrasaun-nian.

“Partikularmente, adidu Migrasaun ba Atambua mai hosi ema sivíl ida, ida-ne’e deskonfia hetan ona bensaun hosi partidu no koñesidu ho juramentu,” Joăo Almeida, deskonfia.

Maski kompeténsia Vise-Ministru Interiór limite de’it ba asuntu administrasaun tuir despaixu Ministru Interiór númeru 062/MI/VII/2020, loron 22 jullu 2020, maibe, FM haree katak, António Armindo, koko haksoit sai hosi kompeténsia ne’ebé atribui no ignora tiha despaixu ne’e.

FM konsidera situasaun ne’e, hanesan Vise-Ministru Interiór kontinua halo intervensaun polítika iha setór seguransa fora hosi kompeténsia rasik.

FM rekomenda ba Primeiru Ministru (PM) hanesan mós Ministru Interiór (MI), Taur Matan Ruak, atu toma atensaun ho sériu ba asuntu Servisu Migrasaun-nian no hasees interese partidária iha setór seguransa. Nune’e, bele ajuda Servisu Migrasaun sai instituisaun ida ne’ebé profisionál no servi de’it ba interese komún.

FM rekomenda ba Ministru Interiór, Taur Matan Ruak, atu husu Komandu Jerál Polísia Nasionál Timor Leste (PNTL), hodi rekomenda pesoál Migrasaun ne’ebé iha esperiénsia di’ak ba iha adidu, nune’e hasees hosi politizasaun ba nomeasaun.

Rekomenda mós ba Komisaun B Parlamentu Nasionál (PN), atu bolu urjente Ministru Interiór no Vise- Ministru Interiór, responde Komisaun B kona-bá asuntu ne’ebé deskreve iha leten, no Komisaun B tenke ativu mós hodi halo fiskalizasaun ba Servisu Migrasaun ne’ebé Vise-Ministru Interiór politiza, hodi servi de’it ba interese partidária.

Kona-bá deskonfiansa hosi FM ne’e, Vise-Ministru Interiór, António Armindo rezeita tanba nomeasaun ne’e nia parte simu de’it naran no proposta hosi Diretór Jerál no la intervein direta.

“Baibain nomeasaun ne’e Diretór Jerál mak propoin, Ministru Interiór halo konfirmasaun mak ita halo administrasaun. Ne’ebé la’ós halo tanba partidu,” António Armindo, hateten liu hosi WhatsApp.

Ko’alia kona-bá méritu, António Armindo dehan, ne’e Diretór Jerál mak haruka naran, no naran sira ne’ebé rekomendadu klaru katak, ema hirak ne’e iha méritu, tanba sira hotu-hotu funsionáriu Imigrasaun nian, nune’e laiha dalan atu halo intervensuan polítika. (ger)