Hatutan.com, (22 Novembru 2023), Díli-Iha ámbitu kampaña eleisaun prezidénsial 2022, partidu Congresso Nacional de Reconstrucção Timorense (CNRT) ne’ebé lidera hosi Kay Rala Xanana Gusmão hodi la’o haleu territóriu nasionál halo kompromisu eleitorál.  Hosi kompromisu lubun, Xanana ho partidu CNRT mós kompromete atu atu loke auditória bá projetu konstrusaun Ró Haksolok, tanba gasta osan barak ona, maibé ró ne’e seidauk mai Timor-Leste.

Lee Mós: Lere-Falur Vizita Ró Haksolok, Konstrusaun Atinje 80% no 2024 Haksolok Povu TL

Primeiru-Ministru (PM), Xanana Gusmão. Foto/Elio dos Santos da Costa

La to’o de’it iha ne’e, iha kampaña Eleisaun Parlamentár 2023, foin lalais, CNRT mós kontinua hato’o nia kompromísiu polítiku bá povu Timor-Leste tomak katak, bainhira manán iha eleisaun, hodi forma Governu Da-sia, sira sei halo duni auditória bá konstrusaun Ró Haksolok.

Nune’e, iha Kuarta, 22 fulan-Novembru 2023, Hatutan.com konfirma direta ho Primeiru-Ministru, Kay Rala Xanana Gusmão, kona-bá sira ninia kompromísiu ida ne’ebé atu halo auditória bá Ró Haksolok ne’e. Infelizmente, Xanana Gusmõa, lakohi koalia.

“Aah, ne’e nusu bá ró,” Primeiru-Ministru, Kay Rala Xanana Gusmão, hatán bá Hatutan.com hafoin fó pose bá estrutura foun Comissão Função Pública (CFP)  iha Matadouro, Díli, Kuarta (22/11/2023).

Hein Desizaun PM Xanana

Aproveita okaziaun hanesan Hatutan.com buka konfirma ho Ministru Transportes no Telekomukasaun (MTK), Miguel Marques Manetelo, kona-bá kompromísiu Governu ninia hirak durante ne’e, maibé nia hatán katak, autoridade ida mak kaer hela buat ne’e.

Uluk, foin hahú projetu sosa no konstrusaun bá ró ne’e, Governu sentrál mak responsábiliza. Mais prosesu sira tesik mai ne’e, autoridade Rejiaun Administrativa Espesial Oé-Cusse Ambeno (RAEOA) maka responsábiliza.

“Ne’ebé, bom, auditória ne’e la’ós ministériu transporte mak atu halo, mais, ne’e oras ida sei iha orientasaun ida hosi Sua-Exelénsia Primeiru-Ministru,” Ministru Miguel Manetelo hateten.

Iha loron, 21 fulan-Novembru 2023, bainhira fila hosi viajen estranjeiru, Tenente Jenerál reformadu Tito Cristóvão da Costa “Lere Anan Timur” ho Xefe Estadu Maior FALINTIL-Forsa Defeza Timor-Leste (F-FDTL), Domingos Raul Falur Rate Laek, hateten, sira-nain rua hakat liubá duni vizita Ró Haksolok, ne’ebé oras ne’e halo hela prosesu konstrusaun iha estaleiru Fogueira de Voz, Portugál.

Durante vizita, komandante FALINTIL na’in-rua, husu tuir mós kona-bá prosesu rekonstrusaun bá kondisaun ró ne’e nian. No informasaun ne’ebé simu direta hosi na’in bá kompañia no tékniku sira ró nian, katak, progresu konstrusaun bá ró ne’e atinje ona 80%, no possível iha 2024, Ró Haksolok bele to’o Timor-Leste.

Hatán bá ida ne’e, Ministru Manetelo dehan, ne’e, husu bá ema sira ne’ebé hateten dehan tinan oin ró ne’e hotu, no dala-ruma sira iha ona informasaun. Tanba ne’e, husu bá sira-ne’ebé hatete katak, ró ne’e atu hotu.

“No depois atu mai, konserteza ró mai ne’e ema maka lori. Ne’e sira nia planu. Ha’u la hetan informasaun ne’e, agora, sira ne’ebé hetan informasaun, sé informasaun loos, kala mak ida ne’e duni. Mais, ha’u rasik laiha informasaun kona-bá prosesu ne’e rasik. To’o agora, ha’u laiha planu atu bá vizita. Sira promete katak atu hotu, ita hein katak atu hotu,” Miguel Manetelo hateten.

Governante ne’e dehan, bainhira Ró Haksolok to’o Timor-Leste konserteza nia tutela ministériu transportes no telekomunikasaun, no karik iha futuru bele mós tau-matan bá sasán sira ne’e hotu, tanba ró ne’e Timor Oan hotu nian, liu-liu Oé-Cusse oan sira.

 Jornalista: Rogério Pereira Cárceres