Hatutan.com, (09 Outubru 2021), Afeganistaun—Governu Afeganistaun ne’ebé oras ne’e lidera hosi rejime Taliban, konfirma katak ema na’in  46 mate no sai vítima hosi esplozaun bomba suisida  iha Meskita Syiah iha Kunduz, sesta (8/10/2021).

Ajénsia notisioza estadu Bakhtar haktuir  katak total ema 46 mate no na’in  143 seluk kanek rezulta hosi esplozaun bomba suisida ne’ebé reklama hosi Estadu Izlámiku  ka ISIS-Khorasan (ISIS-K) sira. Maske nune’e, autoridade saúde Afeganistaun nian realsa katak vítima ne’ebé mate bele to’o ema 70-80.

Total vítima mate ne’ebé relata hosi Bakhtar diferente ho dadus ne’ebé aprezenta hosi Misaun Nasoins Unidus ba  Afeganistaun molok ne’e.

Bomba rebenta iha Meskita iha ámbitu sarani musulmanu sira halo hela orasaun Sesta nian (salat Jumat). Foto: AP/Abdullah Sahil

Hatutan hosi Reuters, misaun ONU antes ne’e konfirma katak purvolta ema 100 mate iha atake iha ámbitu sarani musulmanu sira halo hela orasaun Sesta nian (salat Jumat).

Hosi gravasaun video ne’ebé espalla hatudu mate isin barak latan hela iha rai-leten meskita nian ho ran ne’ebé kona iha didi-lolon sira hafoin esplozaun bomba ne’e.

Sasin sira hateten esplozaun bomba ne’e akontese iha kedas ámbitu sarani sira hala’o hela orasaun iha meskita refere.

Atake ba meskita komunidade musulmanu Syiah ne’e hanesan atake ba datoluk iha Afeganistaun iha semana ikus ne’e.
Loron haat antes akontese bomba suisida Meskita iha Kunduz,  akontese uluk atake bomba hanesan ba meskita ida iha kapitál Kabul to’o rezulta ema nain lima mate. ISIS-Khorasan mós pronunsia katak sira maka responsabiliza ba terór ne’e.

Grupu Estadu Izlámiku ka ISIS-K kontinua lansa atake hafoin Taliban domina  Afeganistaun hosi Governasaun anteriór.
Grupu ISIS-K, inimigu prinsipál  Taliban, ne’ebé  destaka sira-nia  kuartél iha Provínsia Nangarhar ho Provínsia Khorasan.
Iha fulan-Agostu liubá, grupu ISIS-K reafirma responsabiliza ba atake bomba iha Aeroportu Internasionál Hamid Karzai, ne’ebé rezulta Afeganistaun  na’in 169  mate no korpu fuzileiru navál Estadu Unidus Amérika nian mate. (*/Ger)