Hatutan.com, (19 Outubru 2021), Díli—Governu-sira hosi Austrália, Kanadá, Nova Zelándia, Noruega, Repúblika Korea, Timor-Leste, Reinu Unidu, Estadus Unidus, Reprezentante Altu ba Asuntu Externu no Polítika Seguransa nian, hodi naran Uniaun Europeia, kontinua preokupa profundamente ho situasaun terrível iha Myanmar.

Manifestante-sira fó ondra ho símbolu hiit liman-fuan tolu, durante halo manifestasaun kontra kudeta militár iha Yangon (03/06/2021). Forsa seguransa oho ona ema na’in 840 desde inísiu kudeta, tuir dadus hosi ativista-sira ne’ebé Organizasaun Nasaun Unida (ONU) publika ona. (AFP/STR).

Preokupasaun ne’e mosu tanba númeru povu Myanmar ne’ebé mate aumenta ba bebeik, nune’e mós nia implikasaun aat liu tanba estabilidade rejionál.

Rezolusaun pasifíka no naun-violénsia ba krize ida-ne’e, fila hikas ba dalan demokrasia hanesan kestaun urjénsia ida.  

Rekoñese papél sentrál ASEAN nian iha rejiaun Indo-Pasífiku, reafirma apoiu totál ba esforsu ASEAN nian ne’ebé la’o hela, atu trasa solusaun ba krize atuál iha Myanmar.

“Ami bemvinda vizita possível ba Myanmar hosi Ministru Negósiu Estranjeiru (II) Brunei Darussalam nian, Dato Erywan, nu’udár Enviadu Espesiál Prezidente ASEAN nian ba kestaun Myanmar, no mós ami kompromitidu atu apoia nia esforsu sira ba implementasaun pontu-lima konsesu ba Myanmar no urjente, tuir desizaun Líder sira ASEAN nian no Xefe Komandante Militár Myanmar iha loron 24 fulan Abril,” Nota ba Imprenza ne’ebé Hatutan.com asesu, Tersa (19/10/2021).

Iha deklarasaun konjunta ne’e mós subliña apoiu ba objetivu sira hosi vizita Dato Erywin nian, inklui nia intensaun atu hasoru parte hotu ligadu ho Pontu-Lima Konsensus-nian, no mós bolu-atensaun ba rejíme atu fasilita ninia asesu.

Dala ida tán, liu hosi deklarasaun konjunta ne’e hakarak apoiu papél enviadu espesiál-nian atu kontinua avansa, no prontu hamrik fó apoiu ba esforsu hotu mai hosi Prezidente ASEAN nian.

Alende ne’e, bolu atensaun ba Myanmar atu partisipa ativamente ho Enviadu Espesiál Prezidente ASEAN nian atu implementa mós aspetu-sira seluk hosi Pontu-Lima Konsensus nian ho lalais no kompletu.

Ligadu ho Pontu-Lima Konsensus nian, hakarak bolu-atensaun ba militár Myanmar, atu imediatamente hapara violénsia; partisipa iha diálogu konstrutivu no inkluzivu ho parte hotu; atu fasilita ho seguru, la impede asisténsia umanitária, inklui asegura seguransa ba traballadór umanitária no saúde-nian.

Bolu atensaun atu respeita kompleta direitus umanus, inklui husik livre imediata tiha sira ne’ebé detidu la ho justisa, inklui estranjéiru-sira.

Ikus liu, bolu-atensaun ba militár Myanmar atu fasilita vizita regulár hosi Enviadu Espesiál Prezidente ASEAN nian tama ba Myanmar, nune’e mós nia bele livremente movimenta no ko’alia ho parte hotu-hotu.

Jornalista: Vito Salvadór