Hatutan.com (18 Outubru 2021), Dili—Tribunál Distritál Díli (TDD), kontinua halo julgamentu ba krime kontra bandu, ne’ebé komete hosi funsionáriu Provedoria Direitus Humanus no Justisa (PDHJ), arguidu MNP, tanba importa no fa’an farda FALINTIL Forsa Defeza Timor-Leste (F-FDTL) no Polísia Nasionál Timor-Leste (PNTL) ho illegalmente.

Iha audiénsia julgamentu kontinuasaun ne’e, TDD kontinua rona sasin hosi membru PNTL ho inisiál MA, ne’ebé deklara katak, iha apreensaun konsege hetan duni evidénsia farda F-FDTL no PNTL hamutuk saku tolu (3).

Iha deklarasaun ne’e mós MA esplika katak, bainhira atu hatama farda ba instituisaun PNTL normalmente tenke liu hosi prosesu aprovizionamentu no lisensa, maibé realidade arguidu laiha dokumentu komprovativu no karta lisensa, enkuantu durante ne’e PNTL simu de’it farda hosi instituisaun no bainhira medida bo’ot liu isin bele ba muda iha alfayate.

Sasin FN haforsa katak, bainhira halo auto-notísia ba Ministériu Públiku (MP), arguidu esplika katak nia parte servisu hamutuk ho ajénsia RTD, hodi importa no fa’an farda, maski arguidu rasik laiha lisensa importasaun no la selu taxa ba Estadu.

Antes ne’e, iha 04 fulan Outubru iha audiénsia julgamentu arguidu rekoñese fa’an duni farda F-FDTL no PNTL iha nia-uma no sasan hirak-ne’e tama mai Timor-Leste  fasilita hosi ajénsia RTD no arguidu ba foti iha ajénsia hodi selu tuir kilograma ka todan ne’ebé iha.

Tuir akuzasaun hosi MP katak, iha loron 16 Fevereiru 2018, membru PNTL ba iha arguidu nia-uma hodi halo apreensaun ba farda ne’ebé arguidu importa hosi Indonézia liuhosi ajénsia RTD, maski arguidu rasik la’ós kompañia ne’ebé manan tenderizasaun sosa farda hosi instituisaun rua ne’e sem lisensa importasaun.

Ho hahalok arguidu, MP akuza ba krime kontra bandu ne’ebé previstu iha artigu 316 hosi kódigu penál Timor-Leste.

Audiénsia julgamentu ne’e prezide hosi juiz koletivu, Arjentino Luisa Nunes, António Gonçalves, Alvaro Freitas, MP reprezenta hosi Prokuradór Adérito Tilman no arguidu hetan asisténsia legál hosi Defensór Públiku, Manuel Exposto.

Jornalista: Carmelita Isaac