Hatutan.com (22 Outubru 2021), Díli—Embaixadór Uniaun Europeia (UE) iha Timor-Leste (TL), Andrew Jacobs ho Diretór CARE International iha TL, Peter Goodfellow, vizita komunidade Manleuana, hodi observa apoiu-sira kona-bá programa uma mahon ba komunidade, ne’ebé finansia hosi Uniaun Europeia no implementa hosi CARE International iha TL no komunidade iha suku Manleuana, postu administrativu Dom Aleixo, Munisípiu Dili.

Embaixadór Uniaun Europeia (EU) iha Timor-Leste (TL), Andrew Jacobs vizita projetu ne’ebé implementa hosi CARE International iha TL no komunidade iha suku Manleuana, postu administrativu Dom Aleixo, Munisípiu Dili, Sesta (22/10/21). Foto/CARE

Inundasaun boot ne’ebé akontese iha TL hosi loron 29 Marsu to’o 04 Abríl, rezulta mós rai-halai ne’ebé afeta makás iha kapitál Dili.

CARE apoia hela família afetadu-sira liuhosi implementasaun programa inovativu ne’ebé lidera hosi komunidade rasik ho distribuisaun pakote ai-han no sasan esensiál-sira seluk bazeia ba deskobrimentu hosi prosesu konsulta iha avaliasaun hosi jéneru no uma mahon ba komunidade.

Projetu EU-CARE nian ne’e apoia família afetadu hosi inundasasaun liohusi fornese pakote ai-han no sasan esensiál sira seluk, reabilita no hadi’a infrastrutura komunidade, nune’e mós distribui revista edukasaun CARE nian ne’ebé eziste ona iha tempu naruk.

Apoiu hirak-ne’e diretamente benefisia uma-ka’in vulnerável 203, ema na’in 2.500 ne’ebé hela iha aldeia 10 nia laran iha suku Manleuana no liu uma-ka’in 103.000 iha TL laran tomak, ne’ebé sei simu informasaun no edukasaun kona-bá harii uma ho seguru liuhosi revista Lafaek ba Komunidade.

“Iha Abríl ita sai sasin ba estragus signifikativu, sasan lakon no sofrimentu oin-oin nu’udár rezultadu hosi inundasaun no membru vulnerável hosi sosiedade mak afetadu liu,” Diretór CARE International iha Timor-Leste, Peter Goodfellow, hateten bainhira  hala’o vizita ba Komunidade iha Manleuana, Sesta (22/10/21).

CARE orgullu hodi servisu hamutuk ho Sekretária Estadu ba Protesaun Sivíl (SEPS) no UE hodi hatán ba nesesidade imediata no kontínua ba sira ne’ebé afetadu liu, ne’ebé foka makás ba feto no labarik feto-sira, nune’e mós prepara sira atu hatán ba kualkér situasaun emerjénsia no rekonstrusaun iha futuru.

Nune’e mós Embaixadór UE iha TL, Andrew Jacobs, espressa katak, UE kontente loos hodi apoia inisiativa ida-ne’e ne’ebé tulun tebes komunidade hodi rekopera hosi inundasaun boot iha inísiu fulan Abril.

“Ida-ne’e apoia ona sira atu bele prepara an dia’k liu ba kualkér posibilidade inundasaun iha futuru. Ha’u partikulármente orgullu ho apoiu ne’ebé fornese ba ema vulnerável liu,” nia espressa.

Durante vizita iha Manleuana, Embaixadór no delegasaun vizita, observa mós atividade hamoos no rehabilita drainázen, atividade hadi’a no rehabilita kanál bee moos inklui halo konstrusaun ba ponte kiik, konstrui mós fasilidade ba lixu fatin.

Grupu ida-ne’e vizita mós traballadór-sira, xefe grupu-sira hosi komunidade no autoridade lokál sira hosi aldeia Mane-Mesak, Lidun, Mundu-Perdidu no Lemocari.

Infrastrutura hirak-ne’e importante teb-tebes atu harii hikas komunidade nia fasilidade-sira ne’ebé afetadu hosi inundasaun no asegura katak, família hirak-ne’e bele asesesu hikas ba bee moos hafoin inundasaun.

Alende ne’e, prepara mós komunidade atu sai reziliente liu tan hasoru kualkér inundasaun ka dezastre ne’ebé hanesan iha futuru.

Programa Umanitária Hosi Komisaun Europeia

Departementu apoiu umanitáriu hosi Komisaun Europeia (ECHO), liu hosi finansiamentu ba asaun ida-ne’e, ho objetivu atu harii fila-fali protesaun ba komunidade nia reziliénsia ne’ebé foin daudaun  hasoru inundasaun, rai halai no rai maran.

 CARE International Timor-Leste

CARE Servisu iha mundu tomak atu salva moris, kombate ki’ak no atinji justisa sosiál. CARE tau feto no labarik sira iha sentru hosi servisu hotu-hotu tanba CARE hatene katak, labele ultrapasa ki’ak to’o ema hotu iha direitu no oportunidade hanesan.

CARE servisu ona iha Timor-Leste desde 1994. CARE servisu iha Timor-Leste konsentra ba resposta umanitária no projetu sira longu prazu ba dezenvolvimentu sustentável ba redusaun risku dezastre, edukasaun, saúde no nutrisaun comunidade, reprodusaun sexuál no saúde maternál, feto nia partisipasaun no igualdade jéneru.

Asessmentu Uma Mahon ba Jéneru

CARE dezenvolve protokolu inovativu ida hodi kaptura dadus komunidade relasiona ho uma no komunidade liu hosi avalisaun kualitativu hanesan diskusaun focus grupu no entrevista informante sira.

Grupu ida-ne’e involve feto, mane, labarik mane no feto, ferik-katuas no ema ho defesiénsia sira.

Perspetiva jéneru sira ne’e ajuda haforsa lian komunidade no forma projetu liu hosi komunidade nian no forma projetu liu hosi konsultasaun no envolvimentu ne’ebé la’o hela.

Jornalista: Vito Salvadór