Connect with us
Pakote Ahi

Dili

Amu Foun Na’in-Haat Tenke Badinas Hala’o Misaun Saserdósiu

Published

on

Hatutan.com (22 Outubru 2021), Dili—Arsebispu Arkedioseze Metropolitana Dili, Dom Virgílio do Carmo da Silva, SDB, husu ba Amu foun na’in-haat ne’ebé foin simu Sakramentu órdem atu hala’o misaun saserdósiu ho badinas iha kualkér tempu no situasaun.

Ordenasaun Saserdotál ba Diákonu na’in haat iha Katedrál, Sesta (22/10/21). Foto kontribuidór: Aje Bata.

Dom Virgílio do Carmo da Silva, SDB husu ne’e iha omilia misa ordenasaun ba Diakonu na’in-haat, festa São João Paulo II, ne’ebé hala’o iha Igreja Imaculada da Conceiçao Katedrál Dili, Sesta (22/10/21).

“Amu Lulik eskollidu atu haklaken Maromak Nia Lia-fuan, presija hala’o knaar ne’e ho badinas iha tempu di’ak nune’e mós iha tempu susar ho sentidu responsabilidade no iha santidade,” Arsebispu ko’alia iha omilia.

Diákonu Diosezanu na’in-haat ne’ebé simu ordenasaun Saserdotál ne’e mak hanesan, Elio da Costa Nunes hosi Parókia Nossa Senhora Imaculada da Conceição Maubisse, Diákonu Inocêncio Barreto hosi Parókia Maubisse, Diákonu Carlos Ruben hosi Parókia Sagrado Coração de Jesus Becora no Diákonu Florindo de Jesus, hosi Parókia Saun Pedro ho Saun Paulo Aileu.

Advertisement

Arsebispu fó-hanoin katak, vokasaun nu’udár eskolla ida atu ema iha desizaun hodi hili, maibé iha hili ida-ne’e ema tenke iha mós kbiit atu halo desizaun hodi husik parte seluk, nune’e bele iha fidelidade ba desizaun ne’e rasik.

“Atu hili ka husik ema, presiza iha kapasidade atu halo desizaun, hili ho domin, iha fiar no esperansa,” Dom Virgílio do Carmo da Silva, SDB subliña.

Vokasaun Amu Lulik mai hosi Maromak rasik, Maromak mak bolu hodi fó marka no halulik atu bele fó-sasin kona-bá Nia domin iha mundu rai-klaran.

Ordenasaun Saserdotál ba Diákonu na’in haat iha Katedrál, Sesta (22/10/21). Foto kontribuidór: Aje Bata.

Ordenasaun nu’udár enkontru domin nian entre Maromak ho ema. Liuhosi enkontru domin ne’e, Maromak tau ba Nai Lulik ida nia aan dignidade prezbíteru, halo foun iha Nai Lulik ida nia laran, Espíritu santidade.

Arsebispu mós husu ba sarani-sira atu reza nafatin ba Amu Lulik foun sira nune’e sira bele la’o iha dalan santidade-nian hodi lori Kristu ba ema hotu ho intersesaun Na’in-Feto.

Nune’e mós reprezentante Núnsiu Apostóliku iha TL, Marco Sprizzi, sente kontente ho ordenasaun ne’e tanba hatudu komuñaun ida atu la’o hamutuk lori naroman ba mundu.

Advertisement

“Fo sasin ba lia loos Kristu-nian no haboot misaun iha mundu atu lori dame no domin ba ema hotu,” nia akresenta.

Bispu Dioseze Baucau, Dom Basílio do Nascimento husu ba ordenadu sira atu perseverante no fiel nafatin komprimisu ne’ebé halo ona ho Maronak no halo orasaun beibeik ba povu Maromak-nian.

“Loke liman ba Maromak hodi hasa’e  mundu nia susar no terus atu simu grasa hosi Maromak, hodi fó bensaun,” Dom Basílio husu.  

Padre Carlos Roben ne’ebé foin simu ordenasaun lori Padre Ordenadu sira agradese ba karan grasa ordenasaun-nian ne’ebé simu ho Maromak nia bensaun.

“Agradese ba parte hotu-hotu ne’ebé ho laran luak fó apoiu no tulun ona ami, iha dalan vokasaun nian to’o ohin loron. Ami hakat mai iha Nai Nia Altar Santo ne’e,” Padre Carlos Roben agradese.

Advertisement

Serimónia ko’a cake Ordenasaun Saserdotál ba Diákonu na’in haat iha salaun Katedrál, Sesta (22/10/21). Foto kontribuidór: Aje Bata.

Reprezentante família, João Baptista mós agradese ba Maromak ne’ebé bolu ona foin-sa’e na’in-haat atu sai Amu Lulik hodi servi Uma-Kreda iha Timor.

“Família saran sira na’in-haat ba Uma-Kreda, atu sira servi Maromak Nia povu,” João Baptista, hateten.

Partisipa iha misa ordenasaun Saserdotál ho lema ordenasaun ‘Hau Neon Haksolok, iha Maromak Ha’u mak Soin” (LC.1-47), mak hanesan Bispu Dioseze Maliana Dom Norberto do Amaral, Vigáriu Jerál-sira hosi dioseze tolu, Nai Lulik sira inklui sarani sira.

Sakramentu Órden nu’udár sakramentu ne’ebé halo ordenadu simu vokasaun hanesan Bispu, Padre no Diákonu, sai hanesan imajen Kristu nian (In persona Christi). Bispu de’it inklui patriarka no Papa, ne’ebé iha direitu no bele hala’o Sakramentu ida-ne’e.

Ema sira ne’ebé hakarak atu sai Padre, obrigadu tenke kumpre Direitu Kanónika ne’ebé hatuur iha livru Direitu Kanónika 1032, atu hala’o programa formasaun iha semináriu ne’ebé alende tenke estuda Filozofia no Teolojia kompletu, nune’e mós tenke tuir formasaun espirituál, apsotoladu no seluk tan.

Knaar Saserdósiu

Advertisement

Karateristika ida hosi Igreja Katólika maka “apostólika” mai hosi Apóstolu-sira. Nune’e ordenasaun hotu-hotu iha Igreja Katólika, hahú kedan dezde tempu apóstolu-sira ne’ebé Jesus Kristu rasik mak haruka. Orden hosi Jesus nian ne’e, Igreja kontinua to’o tempu nia rohan liu hosi  grau ordenasaun tolu:

  • Episkopat: ka espiskopál, Bispu nu’udár saseluk Apostolu Kristu-nian.
    Ordena ema ida atu sai Bispu, nia simu grasa Sakramentu órden kompletu, halo nia sai duni saseluk apostolu Kristu nian kompletu no hetan misaun atu hanorin no hasantu.
  • Presbiterat: Presbíteru, Padre
    Ordena ema ida atu sai Padre konfigura an sai Kristu hanesan Xefe Igreja, fó podér ba nia hanesan asistente Bispu, atu hala’o sakramentu-sira no atividade litúrjiku-sira seluk, espesialmente Eukaristia.
  • Diakonat: diakonál ka diákonu
    Ordena ba diákonu konfigura an sai hanesan Kristu, hanesan mós servidór, simu knaar atu serbí Bispu, espesialmente haklaken Maromak Nia Lia-fuan.

Jornalista: Vito Salvadór

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Dili

Laiha Resibu, Fulan-Rua Ona Munisípiu Díli La Rekolla Reseita hosi Estasionamentu Sira

Published

on

Hatutan.com, (12 Abríl 2024), Díli—Autoridade Munisípiu Díli liuhosi Diresaun Servisu Obras Públiku, fulan-rua (2) ona, la rekolla reseita hosi pagamentu estasionamentu nian iha Dili laran tanba la iha resibu ka billete.

(more…)

Kontinua Le'e

Dili

Munisípiu Díli Prepara Rekursu Superviziona Regra Soe Fo’er iha Kada Aldeia To’o Bairru Sira

Published

on

Hatutan.com, (09 Abríl 2024), Díli—Autoridade Munisípiu Díli prepara daudaun rekursu hodi halo supervizaun no monitorizasaun bá regra soe fo’er hosi kedas aldeia to’o bairru sira iha Dili laran.

(more…)

Kontinua Le'e

Dili

Dom Virgílio Husu Devotu Jesus Divina Mizerikórdia Aplika Obra Mizerikórdia iha Moris Loron-Loron

Published

on

Hatutan.com, (07 Abríl 2024), Díli—Iha selebrasaun Domingu dahuluk bá Domingu Paskua nian Domingu Divina Mizerikórdia, Dom Virgílio Kardeál do Carmo da Silva, SDB  husu bá sarani sira liu-liu Devotu Jesus Divina Misericordia atu aplika obra misericordia iha moris loron-loron.

(more…)

Kontinua Le'e
Advertisement

Trending