Hatutan.com, (15 Novembru 2021), Díli—Ministru Asuntu Parlamentár no Komunikasaun Sosiál (MAPKOMS), Francisco da Costa Pereira Jerónimo, Segunda (15/11/2021), iha Rezidénsia Primeiru-Ministru nian iha Faról, Díli, aprezenta rekomendasaun organizasaun jornalista Timor-Leste Press Union (TLPU) nian ba Primeiru-Ministru (PM), Taur Matan Ruak.  

Prezidente TLPU, Candido Alves, entrega rekomendasaun TLPU nian ba Ministru MAPKOMS, Francisco Jerónino iha ámbitu kongresu estraordinariu TLPU nain iha Salaun Delta Nova, Sabadu (13/11/2021). Foto/Espesiál

Liuhosi enkontru semanál ne’e, Ministru Francisco Jerónimo, informa ba Primeiru-Ministru (PM), Taur Matan Ruak, kona-ba nia partisipasaun iha konrgresu estraordináriu TLPU nian ne’ebé hala’o iha Salaun Delta Nova, Sábadu (13/11/2021).   

“Ha’u informa ona ba Primeiru-Ministru katak iha Sábadu liubá, ha’u ba iha TLPU hodi ensera  kongresu TLPU nian no ha’u hetan rekomendasaun  balun ne’ebé jornalista sira halo iha kongresu hodi aprezenta mai ha’u no ha’u halo ona esplikasaun ba Primeiru-Ministru,” Ministru Francisco Jerónimo hateten b jornalista sira hafoin enkontru ho Primeiru-Ministru Taur Matan Ruak.

Primeiru-Ministru rasik  hateten esplikasaun mak hanesan ne’e dunik tanba  lei ba jornalista sira hodi simu osan liña frente (front line) ne’e la hanesan ho sira seluk, tanba Primeiru-Ministru  dehan nia akompaña no konkorda katak ida-ne’e mak bele halo, tanba haree mós ba posibilidade Governu liu-liu MAPKOMS ho ninia orsamentu ne’ebé prevee no alokadu ona. Tanba ne’e, nia parte seidauk bele deside buat ruma liga ho montante osan ne’ebé Konsellu Ministru aprova ona ba front line sira liu-liu ba jornalista sira $5.00 kada pesoa jornalista.

Rekomendasaun TLPU ba Governu

REKOMENDASAUN

No. 002/TLPU/XI/2021

Rekomendasaun ba Governu 

Pozisaun TLPU kona-bá Insentivu Jornalista Liña Frente

Timor Leste Press Union (TLPU) lamenta ho desizaun Governu nian, ne’ebé konsidera jornalista Liña Frente hanesan traballadór  “Non Skill”.

Liu hosi pozisaun ne’e, TLPU husu ba Governu atu revee desizaun ne’e, tanba jornalista hala’o knaar profisionál ho risku ne’ebé boot iha situasaun pandemia COVID-19.

Mak ne’e de’it pozisaun TLPU iha Kongresu Estraordináriu, hein katak bele hetan atensaun hosi Governu.

Dili, 13 Novembru 2021

Estrutura TLPU tinan 2021-2025

1. Prezidente: Candido Alves
2. Vise Prezidente: Embelina Amaral
3. Sekretáriu Jerál: Zezito Silva
4. Vise Sekretáriu Jerál: Marcelino Bata
5. Tezoureira: Efigenia Texeira

Jornalista : Carmelita Isaac